ސާފް ސުޒުކީ ކަޕްގެ ގްރޫޕް ބީގައި އިއްޔެ ކުޅުނު މެޗުން 2-0 ގެ ނަތީޖާއަކުން އިންޑިޔާ އަތުން ބަލިވިނަމަވެސް ގުރުއަތުލައިގެން ދިވެހިރާއްޖެ ސެމީ ފައިނަލަށް ދަތުރުކޮށްފިއެވެ.
މިމުބާރާތުގެ ގްރޫޕް ސްޓޭޖުގެ ކުޅުން ނިންމާލިއިރު އިންޑިޔާ އިން ކުޅުނު ދެމެޗުން މޮޅުވެ 6 ޕޮއިންޓާއިއެކު އެއްވަނަ ޓީމުގެ ގޮތުގައި ސެމީ އަށް ދަތުރުކުރިއިރު ރާއްޖެ އާއި ސްރީ ލަންކާ އަށް އެއް ޕޮއިންޓް ލިބި، ގެއްލުން ދެގޯލާއިއެކު ދެޓީމު އެއްވަރުވުމުން މުބާރާތުގެ ގަވާއިދުގައިވާ ގޮތުން، ހުރިހާ ގޮތަކުން ގުރޫޕްގައި ހިމެނޭ ދެ ޓީމު އެއްވަރު ވެއްޖެނަމަ މުބާރާޓުގެ ސެމީ ފައިނަލަށް ދާނެ ޓީމެއް ކަނޑައަޅާނީ ގުރު އަތުލައިގެންނެވެ. އެގޮތުން، ލަންކާ އަދި ރާއްޖޭގެ ކެޕްޓަނުންގެ މެދުގައި ގުރުއަތުލައިގެން ސެމީ އަށް ދަތުރުކުރީ ރާއްޖެއެވެ.
ރާއްޖެއިން މިމެޗަށް ނިކުތްއިރު އެޓީމު އެންމެ ފަހުން ސްރީ ލަންކާ އާ ދެކޮޅަށް ކުޅުނު މެޗުގެ ފުރަތަމަ އެގާރައަށް ތިން ބަދަލެއް ގެނެސްފައިވެއެވެ. އެގޮތުން، އަލީ ފާސިރު (ސެންޓޭ) އާއި ނާއިޒް ހަސަން (ދާދު) އަދި ހަމްޒަތު މުހައްމަދު (ހަމްޕު)ގެ ބަދަލުގައި އަސަދުﷲ އަބްދުﷲ އާއި އިބްރާހިމް މަހުދީ (ފޭދޫ އިއްބެ)ގެ އިތުރުން އަހުމަދު އިމާޒް (އާއްކޮ) ވަނީ ފުރަތަމަ އެގާރައިގައި ހިމަނާފައެވެ.
ބަންގްލަދޭޝްގެ ބަންގަބަންދު ސްޓޭޑިއަމްގައި ކުޅުނު މިމެޗުގެ ކުރީކޮޅު ރާއްޖެ އަށް ލަނޑުޖަހާނެ ރަނގަޅު ފުރުޞަތެއްލިބިފައިވެއެވެ. އިންޑިޔާގެ ސުބަސިޝް ބޯސް އަށް ހެދުނު ގޯހަކުން ރާއްޖޭގެ ފޯވާޑް އަސަދުﷲ އަށް ލިބުނު ބޯޅަ އޭނާ ފޮނުވާލުމުގެކުރީން އިންޑިޔާގެ ގޯލްކީޕަރު ވިޝާލް ކައިތު ވަނީ ސަލާމަތްކޮށްފައެވެ.
މެޗުގެ 9 ވަނަ މިނެޓުގައި އިންޑިޔާ އިން ލީޑް ނެގުމާއި ގާތަށް ޖެހިލިއެވެ. އެޓީމުގެ ލަލިއަންޒުއާލާ ޗަންގްޓޭ ފޮނުވާލި ބޯޅައެއް ރާއްޖޭ ޓީމުގެ މުހައްމަދު އާރިފް (ބަކާ) ދިފާއުކުރަން ބޮލުން ޖައްސާލި ބޯޅަ ގޯލްގެ ހުރަސްދަނޑީގައި ޖެހިފައި ލިބުނީ ކީޕަރު މުހައްމަދު ފައިސަލް އަށެވެ.
އޭގެ މިނެޓެއްފަހުން، ރާއްޖޭގެ ކެޕްޓަން އަކްރަމް އަބްދުލް ޣަނީ އަށް ވަނީ ލަނޑުޖަހާނެ ވަރަށް ރަނގަޅު ފުރުޞަތެއްލިބިފައެވެ. އިންޑިޔާގެ ގޯލްކީޕަރު ކައިތު ކުރިއަށް ނިކުމެ ހުއްޓާ އަކްރަމް ފޮނުވާލި ބޯޅަ ގޯލްގެ ތެރެއަށް ވަނުމުގެކުރީން ކައިތު ވަނީ ކޯނަރަކަށް ބޭރުކޮށްލައިފައެވެ.
އިންޑިޔާ އަށް މިމެޗުގައި ލީޑްނަގައިދިނީ 36 ވަނަ މިނެޓުގައި ނިކިލް ޕުޖާރީ އެވެ. މިއީ އެޓީމުގެ ފަރޫކް ޗައުދަރީ ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ. އޭގެ ތިން މިނެޓުފަހުން، އިންޑިޔާގެ ލީޑް ފުޅާކުރުމަށް މަންވީރު ސިންގ އަށް ލިބުނު ފުރުޞަތުގައި އޭނާ އަށް މާ ރަނގަޅަށް ފޮނުވާލެވޭގޮތް ނުވުމުން ރާއްޖޭގެ ކީޕަރު ފައިސަލް ވަނީ ދިފާއުކޮށްފައެވެ.
މިމެޗުގައި އިންޑިޔާއިން ކާމިޔާބުކުރި ދެވަނަ ލަނޑު، ފުރަތަމަ ހާފު ނިމެން މިނެޓަކަށްވެފައިވަނިކޮށް ޖަހައިދިނީ ޖެރީ ލަރިންޒުއާލާ ދިން ބޯޅައަކުން މަންވީރް ސިންގ އެވެ. ފުރަތަމަ ހާފުގެ އިތުރު ވަގުތުގައި ފޭދޫ އިއްބެ އަށް ލަނޑުޖަހާނެ ފުރުޞަތެއް ލިބުނު ނަމަވެސް އޭނާ ފޮނުވާލި ބޯޅަ ދިޔައީ ދަނޑިކައިރިން ބޭރަށެވެ. މިހާފު ނިމުނީ 2-0 ގެ ނަތީޖާއަކުން އިންޑިޔާ ކުރީގައިއޮވެގެންނެވެ.
ދެވަނަ ހާފަށް ނިކުތްއިރު ދެޓީމުންވެސް ވަނީ އެއް ބަދަލު ގެނެސްފައެވެ. އެގޮތުން، އިންޑިޔާގެ ލަލިއަންޒުއާލާގެ ބަދަލުގައި ވިގްނޭޝް ޑަކްޝިނަމުރުތީ ކުޅެން ނިކުތްއިރު ރާއްޖޭ ޓީމުގެ އާއްކޮގެ ބަދަލުގައި ހަމްޕު ވަނީ ކުޅެން ނިކުމެފައެވެ.
ދެވަނަ ހާފު ފެށިގެން ތިންވަނަ މިނެޓުގައި ހަމްޕު އަށް ލިބުނު ފުރުޞަތުގައި އޭނާ ފޮނުވާލި ބޯޅަ ގޯލްގެ ބޭރު ދާގަނޑުގައި ޖެހުނުއިރު 64 ވަނަ މިނެޓުގައި އިންޑިޔާގެ ލީޑް ފުޅާކުރުމަށް ފަރޫކް އަށް ލިބުނު ބޯޅަ އޭނާ ގޯލަށް ފޮނުވާލުމުގެކުރީން ރާއްޖޭގެ ކީޕަރު ފައިސަލް ވަނީ މަތަކޮށްފައެވެ.
އޭގެފަހުން، މެޗުގެ 72 ވަނަ މިނެޓުގައި ދާދު އަށް ރަނގަޅު ފުރުޞަތެއް ލިބުނުނަމަވެސް އޭނާ ފޮނުވާލި ބޯޅަ ދިޔައީ ގޯލްގެ ދަނޑިކައިރިން ބޭރަށެވެ.
ރާއްޖޭގެ ޓީމުން ލަނޑެއްޖެހުމަށް ކުރި މަސައްކަތުގައި މެޗުގެ ފުރިހަމަ ވަގުތު ހަމަވާން މިނެޓަކަށްވެފައިވަނިކޮށް ރާއްޖެ އަށް ލިބުނު ހިލޭޖެހުމަކުން ފާސިރު ފޮނުވާލި ބޯޅަ އިންޑިޔާގެ ކީޕަރު ކައިތު ވަނީ ކޯނަރަކަށް ބޭރުކޮށްލާފައެވެ.
މިއީ އިންޑިޔާ އާ ދެކޮޅަށް ރާއްޖެ މިހާތަނަށް ކުޅުނު 19 މެޗުގެ ތެރެއިން ބަލިވި 14 ވަނަ ފަހަރެވެ. ރާއްޖެއަށް މޮޅުވެވުނީ އެންމެ ތިން މެޗުންނެވެ. މީގެއިތުރުން، މިމުބާރާތުގައި އިންޑިޔާ އާ ދެކޮޅަށް ރާއްޖެ ކުޅުނު 12 މެޗުގެ ތެރެއިން ބަލިވި 9 ވަނަ މެޗެވެ.
ސާފް ސުޒުކީ ކަޕްގެ ސެމީގެ ފުރަތަމަ މެޗުގައި އަންނަ ބުދަ ދުވަހުގެ މާލޭގަޑިން 15:00 ގައި ރާއްޖެ އާއި ނޭޕާލް ބައްދަލުކުރާއިރު ސެމީގެ ދެވަނަ މެޗުގައި މާލޭގަޑިން އިރުއޮއްސި 6:00 ގައި ޕާކިސްތާން ނިކުންނާނީ އިންޑިޔާ އާ ދެކޮޅަށެވެ. މިމުބާރާތުގެ ފައިނަލް މެޗު ކުޅެވޭނީ މިމަހުގެ 15 ވަނަ ދުވަހުގައެވެ.