އައްޑޫ ސިޓީ ހިތަދޫ ބަނދަރު ސަރަހައްދުގައި އަޅާފައިވާ ޓްރެކާއި ދިމާލަށް މޫދަށް އެރޭ މީހުންނަށް ޚާއްސަކޮށްގެން އައްޑޫ ސިޓީ ކައުންސިލުން ފެން އިސްކުރު ބަރިއެއް ބެހެއްޓުމަށް ނިންމީ އެކަމަށް ގިނަ އަދަދެއްގެ ރައްޔިތުން އެދިގެންނެވެ.
އެ މަސައްކަތް ކައުންސިލުން ކޮންޓްރެކްޓަރަކާ ހަވާލުކޮށްގެން ކުރަމުން ދަނިކޮށް ހައުސިން މިނިސްޓްރީގެ އެންގުމަކަށް މަސައްކަތް ހުއްޓާލަން ފުލުހުން އެންގިއެވެ. އެ އެންގުމަށް ފަހުވެސް ކޮންޓްރެކްޓަރު މަސައްކަތް ނިންމާލިއެވެ.
މައްސަލަ ދިމާވީ އިސްކުރު ބަރިތައް ހަދައި ނިންމުމަށް ފަހު ފެނުގެ ޚިދުމަތް ގުޅަން ޖެހޭ ހިސާބަށް ދިއުމުންނެވެ. ހިތަދޫގައި ފެނުގެ ޚިދުމަތް ދޭ ފެނަކައަށް ހައުސިން މިނިސްޓްރީން އެންގުމުން މިއަދާއި ހަމައަށް ވެސް އައްޑޫ ސިޓީ ކައުންސިލުން ބެހެއްޓި އިސްކުރުތަކާއި ފެން މާގަނޑުތަކަށް ފެން ލިބޭނެ ގޮތެއް ނުވެއެވެ.
ސްކޫލް ކުދިންނާއި އާއްމުންގެ އެތައް ބަޔަކު ކޮންމެ ދުވަހަކު ވެސް މޫދަށް އެރޭ ދިމާލުގައި ސާފު ފެން ލިބޭން އިންތިޒާމް ހަމަޖެހޭނެ ދުވަހަކަށް އެމީހުން ތިބީ އެދިއެދިއެވެ. އެމީހުންގެ އުއްމީދު ފުރިހަމަ ވުމަށް އޮތް ހުރަހަކީ، ސަރުކާރުން އައްޑޫ ސިޓީ ކައުންސިލަށް ކުރާ "ސިޔާސީ ޖެއްސުމާއި ފުރައްސާރަ" އެވެ.
އައްޑޫ ސިޓީ ކައުންސިލުން ފެން އިސްކުރުތައް ބެހެއްޓުމުން އެކަން ހުއްޓުވި ނަމަވެސް، ހައުސިން މިނިސްޓްރީގެ އައްޑޫ ޑިޕާޓްމަންޓުން ވެސް އެކަން ކުރަން އުޅޭ މަންޒަރެއް ވެސް ނުފެނެއެވެ. އެކަމުގެ ތަސައްވުރެއް ވެސް އޮތް ހެނެއް ހިއެއް ނުވެއެވެ.
ސިޔާސީ ވާދަވެރިކަމުގައި "އޮޅިގެން" ނަމަވެސް ރައްޔިތުންނަށް ކުރެވޭ މިފަދަ ޖެއްސުމާއި ފުރައްސާރައިގެ ހުރިހާ ތުރާލެއް ކުރިމަތިވަނީ ރައްޔިތުންނަށެވެ. މޫދަށް އެރެންދާ ކޮންމެ މީހެއް ނުވަތަ ކުއްޖެއްގެ ބެލެނިވެރިޔާ މިއަދު ޖެހެނީ ގެއިން ދާއިރު ފެންފުޅިއެއް ހިފައިގެން ދާށެވެ.
އެއީ ހައުސިން މިނިސްޓްރީގެ އައްޑޫ ޑިޕާޓްމަންޓުން ނުވަތަ މައި ސަރުކާރުގެ "ހެޔޮފުޅުކަމުން" ފެން ހޮޅި ގުޅުމުގެ ހުއްދަ ނުދިނުމުގެ ނަތީޖާއެވެ.