ޓެކްސްއަށް މަކަރު ހެދިކަމަށް ރެއާލް މެޑްރިޑަށް ކުޅެމުން އަންނަ ބްރެޒިލްގެ ފުލްބެކް މާސެލޯގެ މައްޗަށް ސާބިތުވުމުން އެކަމަށް އިއުތިރާފުވުމުން ހަތަރު މަހުގެ ޖަލު ހުކުމެއް އަތުވެއްޖެކަމަށް ސްޕެއިނުގެ މީޑިއާ ރިޕޯޓްތަކުގައިވެއެވެ.
އުމުރުން 30 އަހަރުގެ މާސެލޯގެ މައްޗަށް ސްޕެއިންގެ ކަމާ ގުޅޭ އިދާރާއިން ތުހުމަތުކުރާގޮތުގައި އެހެން ގައުމެއްގެ ކުންފުންޏެއްގެ ބޭނުން ކޮށްގެން ގާތްގަނޑަކަށް 490،000 (ހަތަރު ލައްކަ ނުވަދިހަ ހާސް) ޔޫރޯގެ އަދަދަކުން ޓެކްސް އަށް މަކަރު ހަދާފައިވާކަމަށެވެ.
މީގެއިތުރުން 750،000 (ހަތް ލައްކަ ފަންސާސް ހާސް) ޔޫރޯގެ ޖޫރިމަނާ ދެއްކުމަށް މާސެލޯ މައްޗަށް އަމުރުކޮށްފައިވެއެވެ.
މި މައްސަލައިގެ އަޑުއެހުމުގައި ޓެކްސް އަށް މަކަރު ހެދިކަމަށް މާސެލޯ ވަނީ އެއްބަސްވެފައެވެ. އެގޮތުން އޭނާވަނީ މި އަދަދަށް ސްޕެއިންގެ އިދާރާތަކަށް ފައިސާ ދައްކަން ނިންމާފައެވެ. މާސެލޯ ފައިސާ ދައްކަން އެއްބަސްވުމާއި ވިދިގެން އޭނާ ޖަލުގެ ހުކުމެއް ތަންފީޒުކުރަން ނުޖެހޭނެއެވެ.
ސްޕެއިންގެ ޤާނޫނުގައިވާ ގޮތުން، ފުރަތަމަ ފަހަރަށް މިފަދަ ކުށެއް ކުރާ މީހަކަށް ދެއަހަރަށް ވުރެން މަދު މުއްދަތެއްގެ ޖަލު ހުކުމެއް އައިސްފިނަމަ ޖޫރިމަނާ ދައްކައިގެން ޖަލު ހުކުމް ތަންފީޒު ނުކޮށް ސަލާމަތްވެވޭނެ އުސޫލެއް ސްޕެއިންގައި އޮންނާތީ މާސެލޯ އެންމެ ދުވަހަކުވެސް ޖަލުގައި ހުންނާކަށް ނުޖެހޭނެއެވެ.
މާސެލޯއަކީ ސްޕެއިންގައި ޓެކްސް އަށް މަކަރު ހެދި ކަމުގެ ތުހުމަތު ކުރި ފުރަތަމަ ކުޅުންތެރިޔާއެއް ނޫނެވެ. މީގެކުރީން، ޓެކްސް އަށް މަކަރު ހެދި ކަމުގެ ތުހުމަތު ކުރެވުނު ކުޅުންތެރިންގެ ތެރޭގައި ބާސެލޯނާ އަށް ކުޅޭ އާޖެންޓީނާގެ ފޯވާޑް ލިއޮނަލް މެސީ އާއި ބާސެލޯނާ އަށް ކުޅުނު ބްރެޒިލްގެ ފޯވާޑް ނޭމާ އަދި ރެއާލް މެޑްރިޑަށް ކުޅުނު ޕޯޗުގަލްގެ ފޯވާޑް ކްރިސްޓިއާނޯ ރޮނާލްޑޯ ހިމެނެއެވެ.