ރައީސް އަބްދުﷲ ޔާމީން 2013 ވަނަ އަހަރު ދިވެހިރާއްޖޭގެ ވެރިކަމަށް ވަޑައިގެންނެވީ އައްޑޫގެ ރައްޔިތުންނަށް "އުއްމީދުން ފުރިގެންވާ ވައުދުތަކެއް" ވެވަޑައިގަތުމަށް ފަހުގައެވެ. އައިޓީ ޕާކާއި، ފަތުރުވެރިކަން ކުރިއެރުވުމުގެ ވައުދާއި، މަގުތައް ރަނގަޅު ފެންވަރަކަށް ހެދުމުގެ ވައުދާއި އެކުއެވެ. އާބާދީ ބޮޑު އަތޮޅުގެ ސިއްހީ ނިޒާމު ހަރުދަނާކޮށް ސަރަހައްދީ ފެންވަރުގެ ޓާޝަރީ ހޮސްޕިޓަލެއްގެ ވައުދާއި އެކުއެވެ.
މީގެ އިތުރުންވެސް އެމަނިކުފާން ވިދާޅުވެފައިވަނީ އައްޑޫ ތަރައްޤީ ކުރައްވާނީ އެމަނިކުފާން ކަމަށާއި އެމަނިކުފާން ނޫން ބޭފުޅަކަށް އައްޑޫ ތަރއްޤީ ކޮށް ނުދެއްވޭނެ ކަމަށެވެ.
ވެރިކަމުގެ ފުރަތަމަ ދައުރު ނިމެން ކައިރިވެފައިވާ އިރު އެމަނިކުފާން އޭު ވެވަޑައިގެންނެވި ވައުދުތަކަށް ވީ ކިހިނެއް ހެއްޔެވެ؟ އެ ވައުދުތަކުގެ ތެރެއިން ފުއްދުނީ ކިތައް ވައުދު ހެއްޔެވެ؟
އިތުރު ދައުރަކަށް އިންތިޚާބުކޮށް ދިނުމަށް އެދި ރައީސް ޔާމީން އައްޑޫގެ ރައްޔިތުންގެ ގާތަށް ވޯޓު ހޯދަން ވަޑައިގަންނަވާ އިރު އެންމެ މުހިއްމު ސުވާލަކީ މިއެވެ.
އައްޑޫގެ މަގުތައް ހެދުމުގެ ވައުދު ނުފުއްދުނު
އައްޑޫގެ ގުޅިފައިވާ އަވަށްތަކުގެ މަގުތައް ރަނގަޅު ފެންވަރަކަށް ހެދުމުގެ ވައުދު ރައީސް ޔާމީންގެ ސަރުކާރުން ވެވަޑައިގެންނެވި އެވެ. އެހެން ނަމަވެސް ވެރިކަމުގެ ދައުރު ނިމެން 3 މަސް ދުވަހަށް ވުމާއި ހަމައަށް ވެސް އެ މަޝްރޫޢު ކުރިއަށް ގެންދިޔައީ، ހައުސިން މިނިސްޓަރުގެ ޓްވިޓަރ އެކައުންޓްގައެވެ.
އެއްފަހަރު މަގުހަދަން ބަޖެޓުގައި ހިމެނި ވާހަކައެވެ. ދެން އިވެނީ ކޮންޓްރެކްޓަރާއި ހަވާލު ކުރަން އުޅޭ ވާހަކަ އެވެ. 2017 ވަނަ އަހަރުގެ ލޯކަލް ކައުންސިލް އިންތިޚާބާއި ދިމާކޮށް މަގު ހެދުމުގެ މަޝްރޫޢު ބަޔަކާއި ހަވާލުކުރި ވާހަކަވެސް ސަރުކާރުން ހާމަކުރިއެވެ. އެހެން ނަމަވެސް އެ މަސައްކަތް ފެށޭތަނެއް ނުފެނެއެވެ.
ރިޔާސީ އިންތިޚާބަށް މަސް ދުވަހަށް ވެފައި ވަނިކޮށް، އަވަސް އަރުވާލާފައި މަގުތަކެއްގައި ތާރު އެޅުމުގެ މަޝްރޫޢެއް ވަނީ ފަށާފައެވެ. ހައުސިން މިނިސްޓްރީގެ އައްޑޫ ޑިޕާޓްމަންޓުގެ މުވައްޒަފުން ނެރެގެން ހިންގާ މި މަޝްރޫޢު އައްޑޫ ރައްޔިތުން ސިފަކުރަނީ ރިޔާސީ އިންތިޚާބަށް ރައްޔިތުންގެ ލޮލުގައި އަޅުވާ "އަނދުނެއް" ގެ ގޮތުގައެވެ.
އެހެން ރައްޔިތުން ބުނަން ޖެހެނީ ސަބަބުތަކެއް ނެތިއެއް ނޫނެވެ. ރައީސް ޔާމީން ވެރިކަމަށް ވަޑައިގެންނެވި އިރު އައްޑޫގެ މަގުތައް ހުރި ހާލުގައެވެ. ނުވަތަ މަގުތަކުގެ ހާލަތު ހަމަ އިތުރަށް ގޯސްވީއެވެ.
ބައެއް ފަހަރު ފަރުބަދަމަތިން ދަތުރުކުރާކަމުގެ އިޙުސާސެވެ. މަގުތަކުގެ އަޑިގުޑަންކަމާއިއެކު ވާރޭ ވެހިއްޖެނަމަ ދެން ދުއްވާ އެއްޗަކަށް ހިނގާ ބިނގާވެ އުޅޭމީހަކަށްވެސް ސަލާމަތެއްނެތެވެ.
ފަތުރުވެރިކަމުގެ އެންމެ އެނދެއް ވެސް އިތުރެއް ނުކުރެވުނު!
ރައީސް ޔާމީން ވެރިކަމަށް ވަޑައިގެންނެވުމުގެ ކުރިން އައްޑޫގެ ޓޫރިޒަމް ބެޑް ކެޕޭސިޓީ 5000 އެނދަށް އިތުރުކުރައްވާނެ ކަމުގެ ވައުދު ރައްޔިތުންނަށް ވެވަޑައިގެންނެވިއެވެ. އެހެން ނަމަވެސް ދައުރު ނިމިގެން ދަނީ އައްޑޫގައި ފަތުރުވެރިކަމުގެ އެންމެ އެނދެއް ވެސް އިތުރު ނުވެއެވެ.
2015 ވަނަ އަހަރުގެ އޭޕްރީލް މަހު އިއުލާންކުރި އިސްމެހެލާ ހެރަ ޕްރޮޖެކްޓް ނިމޭނެ ދުވަހެއް ނޭނގެއެވެ. އަދި 2017ގައި އިއުލާންކުރި ގެސްޓް ހައުސް ޕްރޮޖެކްޓް ނިންމަން ބުނި މުހުލަތު ފަހަނަޅައި ދިޔައިރު އެ މަޝްރޫޢުގެ އަމަލީ އެއްވެސް މަސައްކަތެއް ނުފެށެއެވެ.
އައްޑޫގައި ފާއިތުވި 4 އަހަރު ދުވަހުގެ ތެރޭގައި އިތުރުވި ފަތުރުވެރިކަމުގެ އެނދުތަކަކީ ހަމައެކަނި އަމިއްލަ ފަރާތްތަކުން އަޅާފައިވާ ގެސްޓް ހައުސްތަކުން އިތުރުވި އެނދުތަކެކެވެ.
އައިޓީ ޕާކްގެ ވައުދު، ބިލާހެއް!
އައްޑޫގެ ޒުވާނުންނަށް އައިޓީ ޕާކެއް ގާއިމްކޮށްދެއްވާނެ ކަމަށް ރައީސް ޔާމީން ވިދާޅުވީ 2013 ވަނަ އަހަރުގެ ނޮވެމްބަރު މަހުގެ 5 ވަނަ ދުވަހުއެވެ. އޭރު އެމަނިކުފާނު ގެންދެވީ ވެރިކަމަށް ވަޑައިގަތުމަށް ފޯރީގައި ކެމްޕެއިން ކުރައްވަމުންނެވެ.
ވެރިކަމަށް ވަޑައިގެންނެވި ހިސާބުން އައިޓީ ޕާކުގެ ވައުދުގެ ވާހަކައެއް ނުދައްކަވައެވެ. އައިޓީ ޕާކްގެ ވައުދަށް 4 އަހަރާއި 7 މަހާއި 10 ދުވަސް ވެއްޖެއެވެ. އެ މަޝްރޫޢާއި ބެހޭ އެއްވެސް މައުލޫމާތެއް އެނގޭ ސަރުކާރުގެ އެއްވެސް އިދާރާއެއް ނެތެވެ.
އައިޓީ ޕާކުގެ ވައުދުގެ ވާހަކަ ސަރުކާރުގެ އެއްވެސް ވަޒީރަކު އަދި ޕީޕީއެމްގެ މަޖިލިސް މެންބަރަކު ވެސް ވިދާޅެއް ނުވެއެވެ.
ހޮސްޕިޓަލްގެ ވައުދު
އައްޑޫގައި 100 އެނދުގެ ހޮސްޕިޓަލެއް ގާޢިމްކޮށްދެއްވުމަށް ވެވަޑައިގެންނެވި ވައުދު ފުއްދައި ދިނުމުގައި ވެސް ރައީސް ޔާމީންގެ ސަރުކާރު ވަނީ ނުކުޅެދިފައެވެ. ހޮސްޕިޓަލް އެޅުމަށް ބިން ހަމަޖެހި، ކުރެހުން ވެސް ނިމިފައި ވަނިކޮށް ކުއްލިގޮތަކަށް ރައީސް ޔާމީންގެ ސަރުކާރުން ނިންމީ، 2011 ވަނަ އަހަރުގެ ސާކް ސަމިޓަށް އައްޑޫގައި ބިނާކުރި ކޮންވެންޝަން ސެންޓަރު ހޮސްޕިޓަލަކަށް ބަދަލުކުރުމަށެވެ.
2017 ވަނަ އަހަރުން ފެށިގެން އީސީސީ ހޮސްޕިޓަލަކަށް ބަދަލުކުރުމުގެ މަސައްކަތް ފަށާފައި ވާއިރު އެ މަސައްކަތް އަދިވެސް ނުނިމެއެވެ. މިހާރު އިވޭ އަޑަކީ، ހޮސްޕިޓަލަށް ބޭނުންވާ ސާމާނު ގަތުމަށް ބަޖެޓް ނެތް ވާހަކައެވެ.
އީސީސީ ހޮސްޕިޓަލަކަށް ހަދަން ސަރުކާރުން ނިންމީ "މުޅިން އާ އިމާރާތެއް ހަދައިގެން މިވަރުގެ ހޮސްޕިޓަލެއް ހަދާ ކަމުގައިވާ ނަމަ ވަރަށް ބޮޑު ހަރަދެއް ދާނެ." ކަމަށް ބުނެއެވެ.
އީސީސީ ހޮސްޕިޓަލަކަށް ބަދަލުކުރުމަށް ކޮންޓްރެކްޓާރާއި ހަވާލު ކުރި މުއްދަތު ފާއިތުވެގެން ދިޔައިރުވެސް އަދިވެސް އެ މަސައްކަތެއް ނުނިމެއެވެ. ހޮސްޕިޓަލަށް ބޭނުންވާ ސާމާނު ހޯދުމަކީ ހައުސިން މިނިސްޓްރީން ބުނާ ގޮތުގައި އެ ހޮސްޕިޓަލްގެ މަސައްކަތް ނިމުމަށްފަހު ފަށަން ހަމަޖެހިފައިވާ މަސައްކަތެކެވެ.
ރައީސް ޔާމީންގެ ވެރިކަން އައްޑޫގެ ގިނަ ރައްޔިތުން ސިފަ ކުރަނީ ވީރާނާ 5 އަހަރުގެ ގޮތުގައެވެ. ދެމެހެއްޓެނިވި ތަރައްޤީއަށް ކުރެެއްވި ކަމެއް ނެތް ކަމަށެވެ. ފޭދޫގެ ބިން ހިއްކުމުގެ މަޝްރޫއު ނިންމީ މި ސަރުކާރުންނެވެ. ބިމުގެ ދަތިކަން އިންތިހާއަށް އޮތް ފޭދޫގެ ބިން ހިއްކި ނަމަވެސް ދައުރު ނިމިގެންދާއިރު ގޯއްޗެއް، ފްލެޓެއް އިމާރާތެއް އަޅައި ރައްޔިތަކަށް ނުދެވެއެވެ. ހިއްކި ބިން އޮތް ގޮތަށް އޮތީއެވެ.
ރައީސް ޔާމީންގެ ވެރިކަމުގައި އައްޑޫގެ ފެނާއި ނަރުދަމާ ނިމި ރައްޔިތުންނަށް އެ ހިދްމަތުގެ ފޮނި މީރުކަމެއް ނުދެވެއެވެ، ކޮންމެ ކަމަކާއި އެކު ކުރިން ކޮށްފައިވާ ކަންކަން ހަލާކުކޮށް ސުންނާފަތި ކުރުމެވެ.
ނަރުދަމާ އަޅަން ފޭދޫ، މަރަދޫ، މަރަދޫފޭދޫގެ ބޮޑު މަގު އެއްކޮށް ހަލާކުކޮށްލީއެވެ. ހޮސްޕިޓަލެއް އަޅަން ކަމަށް ބުނެ އީސީސީ ރޫޅާލައި ތަން ފަނާކޮށާްލީއެވެ. މަގެއް ނެހެދިތާ މަގު ހަދަން ގެނެސްފައިވާ ސާމާނާ އަތޮޅުން ބޭރުކޮށްލީއެވެ. ނުވިތާކަށް ކައުންސިލްގެ ބާރު ނަގައި، މުޅި މުނިސިޕަލް ހިދްމަތް އެފުށް މިފުށައް ޖަހާލީއެވެ.
ތަރައްޤީގެ ގޮތުގައި ދެއްކޭނެކަމެއް މަޝްރޫއެއް، ފުއްދުނު ވައުދެއް ނެތެވެ. ރައްޔިތުންގެ ދިރިއުޅުމުގެ ހާލަތު މިވަނީ އިންތިހާއަށް ދަށައް ގޮސް ނިމިފައެވެ.