މެންޗެސްޓަރ ޔުނައިޓެޑަށް ކުޅޭ އިނގިރޭސި ފޯވާޑް މާކަސް ރަޝްފޯޑު ކާމިޔާބުކުރި ގޯލުން ސްވިޒަލޭންޑް އަތުން އިންގްލެންޑް މޮޅުވިއިރު ބްރެޒިލް ވަނީ ފަސޭހަކަމާއިއެކު އެލް ސެލްވަޑޯ ބަލިކޮށްފައެވެ.
އިންގްލެންޑުން މި މެޗަށް ނިކުތްއިރު ހޮނިހިރު ދުވަހު ވެމްބްލީ ސްޓޭޑިއަމްގައި ކުޅެ ސްޕެއިން އަތުން 2-1 އިން ބަލިވި މެޗަށް ނެރުނު ޓީމަށް 9 ބަދަލެއް ގެނެސްފައިވެއެވެ. އެގޮތުން، ޖެކް ބަޓްލޭންޑް، ގޯލް ބެލެހެއްޓިއިރު ޑިފެންސްލައިންގައި ކުޅުނީ ޖޭމްސް ޓާކޯސްކީ އާއި ހެރީ މެގުއަޔާ އެވެ. ފޯވާޑްލައިންގައި އެންމެ އިސްކޮށްހުރީ ޑެނީ ވެލްބެކްގެ އިތުރުން ރަޝްފޯޑް އެވެ.
މިމެޗުގެ ފުރަތަމަ ހާފުގައި ސްވިޒަލޭންޑުން ޑޮމިނޭޓްކުރިއިރު އެޓީމަށް ލިބުނު އެންމެ ރަނގަޅު ފުރުޞަތުގައި މެޗުގެ ކުރީކޮޅު ގޯލްގެ އަރިމަތީ ދަނޑީގައިޖެހިފައިވެއެވެ. ނަމަވެސް މިހާފުގައި ދެޓީމަށްވެސް ގޯލެއް ކާމިޔާބުކުރެވޭގޮތްނުވެ ނިމުނީ ލަނޑެއް ނުޖެހި އެއްވަރުވެގެންނެވެ.
މި މެޗުގައި އިންގްލެންޑުން ކާމިޔާބުކުރި ހަމައެކަނި ގޯލް، ދެވަނަ ހާފު ފެށިގެން 9 ވަނަ މިނެޓުގައި ޖަހައިދިނީ ކައިލް ވޯކާ ދިން ބޯޅައަކުން ރަޝްފޯޑް އެވެ. މިއީ އިންގްލެންޑްގެ ޤައުމީ ޓީމަށް އޭނާ ކުޅެދިން 27 ވަނަ މެޗުގައި ކާމިޔާބުކުރި ފަސްވަނަ ގޯލެވެ.
އިއްޔެ އާއި ރޭ ކުޅުނު އެކުވެރިކަމުގެ އެހެން މެޗުތަކުގެ ނަތީޖާއަށް ބަލާއިރު، އެލް ސެލްވަޑޯ އަތުން ބްރެޒިލް މޮޅުވީ 5-0 އިންނެވެ. މިމެޗުގައި އެވަޓަންގެ ރިޗާލިސަން ދެލަނޑު ޖެހިއިރު ނޭމާ އާއި ފިލިއްޕޭ ކުޓީނިއޯގެ އިތުރުން މާކީނިއޯސް ވަނީ ގޯލެއް ކާމިޔާބުކޮށްފައެވެ.
ދެކުނު އެމެރިކާގެ ގަދަ ބާރެއް ކަމަށްވާ އާޖެންޓީނާ ރޭ ކުޅުނު މެޗުގައި ކޮލަމްބިއާ އަތުން މޮޅުވެވޭގޮތެއްނުވިއެވެ. އެމެރިކާގެ ނިއު ޖާޒީގައި ކުޅުނު މިމެޗު ނިމުނީ 0-0 އިން ދެޓީމު އެއްވަރުވެގެންނެވެ. އާޖެންޓީނާގެ ވަގުތީ ކޯޗު ލިއޮނަލް ސްކަލޯނީ މިމެޗަށް ވަރަށް ޒުވާން ޓީމެެއް ނެރުނުއިރު ކޮލަމްބިއާ ޓީމުގައި ތަޖުރިބާ ގިނަ ކުޅުންތެރިންނާއި ދެކޮޅަށް އުނދަގޫތަކާއި ކުރިމަތިލާން ޖެހިފައިވެއެވެ.