ގިނަ ދުވަސްތަކެއް ވަންދެން ރައްޔިތުންގެ މަޖިލީހުގެ އައްޑު ގޮނޑި ފުރުއްވާފައިވާ މުހައްމަދު ރަޝީދު(ހިޔަލީ) ލަންކާގައި ރައީސް މުހައްމަދު ނަޝީދާއި ބައްދަލުކޮށްފިއެވެ.
ހިޔަލީ ރައީސް ނަޝީދާއި ބައްދަލުކުރެއްވި ސަބަބު އަދި ވަނީ ސާފުވާގޮތް ނުވެފައެވެ. އެހެން ނަމަވެސް ހިޔަލީ އާއި އެބޭފުޅާގެ އާއިލާގެ ބައެއް ފަރާތްތަކުން އިދިކޮޅު ކޯލިޝަނާއި ގުޅެން އުޅޭ ކަމުގެ އަޑުތައް ފެތެރުމުން އަންނަތާ މިހާރު ވަނީ ދުވަސްތަކެއް ވެފައެވެ.
އަދި ހިޔަލީ އާއި އިދިކޮޅު ކޯލިޝަނުގެ ކެންޑިޑޭޓް އިބްރާހިމް މުހައްމަދު ސޯލިޙް ބައްދަލުކުރައްވާ މަންޒަރު ފެންނަ ފޮޓޯތަކެއް ވެސް ސޯޝަލް މީޑިޔާގައި ވަނީ އާއްމުވެފައެވެ.
ހިޔަލީ އަކީ ޕީޕަލްސް އެލަޔަންސް(ޕީއޭ) އުފެއްދެވުމުގައި މިހާރުގެ ރައީސް އަބްދުﷲ ޔާމީނާއި އެކު ވަރަށް ގާތްކޮށް މަސައްކަތް ކުރެއްވި ބޭފުޅެކެވެ. ޕީއޭ އުފެއްދެވުމަށް ފަހު އެ ޕާޓީގެ ރަޖިސްޓަރާގެ މަގާމު އަދާކުރެއްވި ހިޔަލީ އަކީ 2013 ވަނަ އަހަރު ހިތަދޫ މެދު ދާއިރާގައި ހުންނެވި ޕީޕީއެމްގެ ކެމްޕެއިން މެނޭޖަރެވެ.
ރައީސް މައުމޫންގެ ވެރިކަމުގައި ހިޔަލީ ވަނީ ސްޓޭޓް ޓްރޭޑް އޯގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރު ކަމުގެ މަގާމު އަދާކުރައްވާފައެވެ. އަދި މީގެ އިތުރުން އެފްއޭއެމްގެ ނައިބް ރައީށް ކަން ވެސް ހިޔަލީ ވަނީ ކުރައްވާފައެވެ.
2014 ވަނަ އަހަރުގެ މަޖިލިސް އިންތިޚާބުގައި ޕީޕީއެމްގެ ޓިކެޓުގައި ވާދަކުރެއްވި ނަމަވެސް ހިޔަލީ އަށް އެ އިންތިޚާބުގައި ވަނީ ނާކާމިޔާބު ވެފައެވެ. ހިތަދޫ މެދު ދާއިރާގެ ގޮޑި ކާމިޔާބް ކުރެއްވީ ކުރީގެ ބްރިގޭޑިއަ ޖެނެރަލް (ރިޓަޔާޑް) އިބްރާހިމް ދީދީއެވެ. އިބްރާހިމް ދީދީއަށް 1099 ވޯޓު ލިބިވަޑައިގަތް އިރު ހިޔަލީ އަށް ލިބިވަޑައިގަތީ 898 ވޯޓެވެ. އަދި އަމިއްލަގޮތުން ވާދަކުރެއްވި ހުސައިން ސާލިހަށް ލިބިވަޑައިގަތީ 554 ވޯޓެވެ.