ކުރީގެ ނައިބު ރައީސް އަހްމަދް އަދީބު އެ މަގާމަށް އައްޔަން ކުރެވިގެން ދިޔުމަކީ ނިޒާމުގެ މައްސަލައެއް ކަމަށާއި، އެއީ ރައީސުލްޖުމްހޫރިއްޔާގެ މައްސަލައެއް ނޫން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރޭ ގައުމީ ޔުނިވާސިޓީން ކުރިއަށް ގެންދިޔަ "ބަހުސް" ގައި ވާހަކަ ދައްކަވަމުންނެވެ.
އެމްއެމްޕީއާރުސީގެ ޚިޔާނާތުގެ މައްސަލަ ކުރީގެ ނައިބު ރައީސް އަހްމަދް އަދީބާއި ހިސާބުން ނިމޭކަމަށް ރައީސް ޔާމީން ވަނީ މީގެ ކުރިން ވިދާޅުވެފައެވެ. އަދި އަދީބު ގެނެސްދެއްވި "ހަލާލު ނޫން ފައިސާ" ގެކޮޅަށް ވެއްދި ކަމަށް ވެސް ރައީސް ޔާމީން ވިދާޅުވެފައިވެއެވެ.
އެހެން ނަމަވެސް ރޭ ރައީސް ޔާމީން ވިދާޅުވީ ނިޒާމުގައި މައްސަލައެއް ނެތްނަމަ، އަދީބު ނައިބު ރައީސަކަށް އައްޔަން ކުރުމުގެ ކުރިން ހިޔާނާތުގެ މުއާމަލާތްތައް ހާމަވެގެންދާނެ ކަމަށެވެ.
އަދި ޚިޔާނާތުގެ އަމަލުތައް ހިންގި ކަން އެނގިވަޑައިގެންނެވި ނަމަ ވަޒީރުކަމުގެ މަގާމުގައި ވެސް ދެމިނުހުންނެވޭނެ ކަމަށް ރައީސް ވިދާޅުވިއެވެ.