ދިވެހިރާއްޖޭގެ ގައުމީ ޔުނިވާސިޓީގައި ރޭ ރިޔާސީ "ބަހުސް"ގެ ނަމުގައި ބޭއްވި ޕްރޮގްރާމަށް ހިތަދޫ ދެކުނު ދާއިރާގެ މަޖިލިސް މެންބަރު އަލީ ނިޒާރު ނުސީދާގޮތެއްގައި ފާޑުވިދާޅުވެއްޖެއެވެ.
"ބަހުސެއް" ނަމުގައި ގައުމީ ޔުނިވާސިޓީން ކުރިއަށް ގެންދިޔަ މި ޕްރޮގްރާމްގައި ބައިވެރިވެވަޑައިގެންނެވީ ރައީސް އަބްދުﷲ ޔާމީން އެކަންޏެވެ. އިދިކޮޅު ކޯލިޝަނުގެ ކެންޑިޑޭޓް މި ބަހުސްގައި ބައިވެރިވެވަޑައި ނުގެންނެވީ ޔުނިވާސިޓީން ކުރިއަށް ގެންދާ މި ބަހުސްގެ މިނިވަންކަމާއި މެދު ސުވާލު އުފައްދަމުންނެވެ.
ނިޒާރު ކުރެއްވި ޓްވީޓެއްގައި ވިދާޅުވީ، "އޭނާ އިންތިޒާމްކޮށްގެން އޭނާގެ ބާރު އޮންނަ ޔުނިވާސިޓީގައި އޭނާ ލިޔުނު ސުވަލުތަކަށް އޭނާ އަމިއްލައަށް ޖަވާބު ދީ އެކަނި މާއެކަނި ބަހުސްކޮށްފި" ކަމަށެވެ.
ނިޒާރުގެ ޓްވީޓްގައި ރައީސް ޔާމީންގެ ނަންފުޅު ވިދާޅު ނުވި ނަމަވެސް ބެލެވޭ ގޮތުގައި ފާޑުކިޔުންތައް އަމާޒު ކުރެއްވި ރޭ އެކަނިމާއެކަނި ބަހުސް ކުރެއްވި ރައީސް ޔާމީނަށެވެ.