ރާއްޖޭން އުތުރުގެ މައި ރަށް، ހދ. ކުޅުދުއްފުށީގެ ކުޅި ހިއްކައިގެން ހެދި ޑޮމެސްޓިކް އެއާޕޯޓަށް ޓެސްޓް ފްލައިޓް މިއަދު ޖައްސައިފި އެވެ.
މިއަދު މެންދުރު 2:20 ގައި ވެލާނާ އިންޓަނޭޝަނަލް އެއާޕޯޓުން ފުރި މޯލްޑިވިއަންގެ ޑޭޝް މަރުކާގެ ފްލައިޓް ކުޅުދުއްފުށީ އެއާޕޯޓުގައި ޖެއްސީ ހަވީރު 3:10 ގަ އެވެ.
ކުޅުދުއްފުށީ އެއާޕޯޓަށް ބޭއްވި ޓެސްޓް ފްލައިޓުގައި ގިނަ އަދަދެއްގެ އިއްޒަތްތެރިން ބައިވެރިވިއެވެ. އޭގެ ތެރޭގައި ޓޫރިޒަމް މިނިސްޓަރު މޫސާ ޒަމީރާއި ބަންޑާރަ ނައިބު މުހައްމަދު އަނިލް އާއި ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ވެސް ވަޑައިގެންނެވިއެވެ. އަދި ޗީފް އޮފް ޑިފެންސްފޯސް އަހުމަދު ޝިޔާމާއި އައިލެންޑް އޭވިއޭޝަނާއި އޭވިއޭޝަން ދާއިރާގެ އިސް ބޭފުޅުން ޓެސްޓް ފްލައިޓުގައި ކުޅުދުއްފުއްޓަށް ވަޑައިގެންނެވި އެވެ.
އާބާދީގައި 9،000 އަށް ވުރެ ގިނަ މީހުން ރަޖިސްޓަރީ ވެފައިވާ ކުޅުދުއްފުށީ އެއާޕޯޓަކީ މި ރަށާއި އަތޮޅުގެ ގިނަ ބައެއްގެ އުންމީދަކަށް ވާއިރު، ފުރަތަމަ ފްލައިޓް ޖެއްސުމާ އެކު ހޫނު މަރުހަބާއެއް ރަށުގެ މީހުންގެ ފަރާތުން ވަނީ ކިޔައިފަ އެވެ.
މި އެއާޕޯޓުގައި އަދި ނިމިފައި ވަނީ ރަންވޭ އެކަންޏެވެ. އެއީ 1،200 މީޓަރު ދިގު 30 މީޓަރު ފުޅާ ރަންވޭއަކާއި އޭޕްރަންގެ އިތުރުން ޓެކްސީ ވޭ އެވެ. ރަންވޭގައި ތާރު އަޅައި ނިމުނީ މިދިޔަ އާދިއްތަ ދުވަހު އެވެ.
ކުޅުދުއްފުށީގައި އެއާޕޯޓެއް ހެދުމަކީ 2013 ގެ ރިޔާސީ އިންތިހާބުގެ ކެމްޕެއިންގައި ރައީސް ޔާމީން ވެވަޑައިގެންނެވި ވައުދެކެވެ. އޭރު ވައުދުވެ ވަޑައިގަތީ ވެރިކަމާ ހަވާލުވެވަޑައިގަންނަވާތާ ދެ އަހަރުގެ ތެރޭގައި އެ އެއާޕޯޓު ހަދައި ދަތުރުތައް ފައްޓަވާނެ ކަމަށެވެ. ނަމަވެސް ތަފާތު ގޮންޖެހުތަކުގެ ސަބަބުން، ހަމައެކަނި ރަންވޭގެ މަސައްކަތް ނިމިފައިި ވަނީ ދައުރު ނިމެން ކައިރިވެފައި ވަނިކޮށެވެ.
މިދިޔަ އަހަރު ރައީސް ޔާމީން ފައްޓަވައި ދެއްވި މި މަޝްރޫއު ދިގުލައިގެން ދިޔައީ އެއާޕޯޓް ހެދުމަށްޓަކައި ހުސްކުރަން ޖެހޭ 18 ގޭގެ ތެރެއިން 12 ގެއެއް ހުސް ނުކުރެވި ލަސްވެގެން ކަމަށް ސަރުކާރުން ބުނެފައިވެ އެވެ. އެ މައްސަލަ ހައްލުކޮށް، އޭގެ ތެރެއިން ދެ ގެ ފިޔަވާ އެހެން ގެތަކުގެ ބަދަލު ދީ ވަނީ ނިންމާފަ އެވެ.
އެއާޕޯޓް ހެދުމަށްޓަކައި އެރަށުގެ އާސާރީ ކުޅިން ބޮޑުބައެއް ހިއްކުމުގެ ސަބަބުން ކުޅިއަށް ވަރަށް ބޮޑަށް ވަނީ ގެއްލުން ވެފައެވެ. އެކަމުގެ ސަބަބުން ރާއްޖޭގެ 12 މަދަނީ ޖަމިއްޔާއަކުން ދާދި ފަހުން ފަނީ ކުޅީގެ ބާކީއޮތްބައި ހިމާޔަތް ކުރުމާއިބެހޭ ގޮތުން ނޫސް ބަޔާނެއް ވެސް ނެރެފައެވެ.