މާތްﷲގެ އިރާދަފުޅާއި އެކު ގުޅިފައިވާ ސިޔާސީ ޕާޓީތަކުގެ ވެރިކަމެއް ޤާއިމްކުރެއްވިއްޖެ ނަމަ ދިވެހި އެންމެ ރައްޔިތަކު ވެސް ބާކީ ނުކުރައްވާނެ ކަމަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް ވިދާޅުވެއްޖެވެ.
ހިތަދޫގައި މިހާރު ކުރިއަށްދާ ޖަލްސާގައި ވާހަކަ ދައްކަވަމުން އިބޫ ވިދާޅުވީ ކޯލިޝަނުގެ ވެރިކަމެއްގައި ކޮންމެ ރައްޔިތަކަށް ވެސް ހަމަހަމަކޮށް ހިތާ މުޖްތަމައު އެއް ބިނާ ކުރައްވާނެ ކަމަށެވެ.
އިބޫ ވިދާޅުވި ގޮތުގައި ކުލައެއް ރީތިވީމާ ނުވަތަ ވަކި ސިޔާސީ ޕާޓީއަކަށް ނިސްބަތްވާ މީހުންނަށް ގޮންޖެހުންތައް ކުރިމަތި ނުކުރައްވާނެ ކަމަށެވެ.
އަދި މީގެ އިތުރުން ތާއީދު ކުރާ ވަކި ފިކުރެއްގެ ސަބަބުން ޖަލަށް އެއްވެސް މީހަކު ނުލައްވާނެ ކަމަށާއި ވަކި ޕާޓީއަކަށް ނިސްބަތްވީތީ ފްލެޓް ނުލިބުން ފަދަ ކަންތައް ދިމާނުވާނެ ކަމުގެ ޔަގީންކަން ވެސް އިބޫ ދެއްވިއެވެ.
ރިޔާސީ އިންތިޚާބު ބާއްވާ ދުވަހަކީ މުހައްރަމް މަހުގެ 13 ވަނަ ދުވަސްކަން ފާހަގަކުރައްވައި އިބޫ ވިދާޅުވީ، "މުހައްރަމް މަހުގެ 14 ވިލޭރޭ ރައްޔިތުން ތިބޭނީ ކާމިޔާބުވެ ހިނިތުންވެފައި" ކަމަށެވެ.