އައްޑޫ ސިޓީ ހިތަދޫގެ ރައްޔިތުންގެ ގަޔަށް ވެކްސިން ޖަހަން ޖެހޭނެ ކަމަށް ރައީސް އަބްދުﷲ ޔާމީން ދެއްކެވި ވާހަކަފުޅަށް ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ހޫނު ރައްދެއް ދެއްވައިފިއެވެ.
ހިތަދޫގައި މިހާރު ކުރިއަށްދާ ޖަލްސާއެއްގައި ވާހަކަ ދައްކަވަމުން އަސްލަމް ވިދާޅުވީ "މަނިކުފާނުގެ ވަގު ވެކްސިން ޖަހާކަށް ނެތިން" ކަމަށެވެ.
ހިތަދޫގެ ރައްޔިތުން ނަޝީދަށް ތާއީދު ކުރައްވާތީ ސުވާލު އުފައްދަވައި ހިތަދޫ ރައްޔިތުން ގަޔަށް ވެކްސިން ޖެހުމަށް ރައީސް ޔާމީން އެދިވަޑައިގަތީ މިމަހުގެ 13 ވަނަ ދުވަހު ފޭދޫގައި ވާހަކަ ދައްކަވަމުންނެވެ. އެވާހަކަތަކާއި ގުޅިގެން ހިތަދޫގެ ގިނަ ބަޔަކު ވަނީ ރައީސް ޔާމީނަށް ވަރަށް ބޮޑަށް ފާޑު ކިޔާފައެވެ.
މިރޭގެ ޖަލްސާގައި އަސްލަމް އިތުރަށް ވިދާޅުވީ، ރައީސް ޔާމީނަށް އައްޑޫން ލިބޭނެ ވޯޓެއް ނޯންނާނެ ކަމަށް މީގެ ކުރިން ވެސް ވިދާޅުވާ ވާހަކަ ތަކުރާރު ކުރައްވާފައެވެ.
"އަޅުގަނޑު ކުރިން ވެސް ދެންނެވިން އަދިވެސް ތަކުރާރުކޮށްލާނަން. ރައީސް ޔާމީން މި އައްޑޫން ހޯއްދަވާނެ ވޯޓެއް ނެތް." އަސްލަމް ވިދާޅުވިއެވެ.