ބައިނަލްއަޤްވާމީ ދުނިޔޭގައި ރައީސް އަބްދުﷲ ޔާމީން މަޝްހޫރުވެފައި ވަނީ އިންޑިޔާ ކަނޑުގެ މުޤާބޭގެ ގޮތުގައި ކަމަށް ކުރީގެ ބަންޑާރަ ނައިބު ދިޔާނާ ސައީދު ވިދާޅުވެއްޖެއެވެ.
ހިތަދޫގައި މިހާރު ކުރިއަށްދާ ޖަލްސާއެއްގައި ވާހަކަ ދައްކަވަމުން ދިޔާނާ ވިދާޅުވީ، ރައީސް ޔާމީންގެ ވެރިކަމުގައި ފަސާދަ ގިނަވެ ޤައުމުގެ ހުރުމަތް ކަނޑާލައިފި ކަމަށެވެ.
އަދި ދިވެހި ރައްޔިތުން ވެސް ރައީސް ޔާމީން ސިފަކުރަނީ އަނިޔާވެރި ވެރިއެއްގެ ގޮތުގައި ކަމަށް ދިޔާނާ ވަނީ ވިދާޅުވެފައެވެ.
ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިޙް(އިބޫ) ތާއީދު ކުރައްވަން ނިންމެވި ސަަބަބު ވެސް ދިޔާނާ ވަނީ ހާމަކުރައްވާފައެވެ. އެގޮތުން ދިޔާނާ ވިދާޅުވީ އިބޫއަށް ތާއީދުކުރައްވަން ނިންމެވީ، އަމާނާތްތެރިކަމާއި އެކު ވާޖިބު އަދާކުރެއްވި ބޭފުޅަކަށް ވާތީ ކަމަށެވެ.
"ފަސްބައިގައި ކިލަނބުކަމެއްވާ ބޭފުޅެއް ނޫން، ކެތްތެރި ކޯފާ މަޑު ހިތްތިރި ބޭފުޅެއް." އިދިކޮޅު ކޯލިޝަނުގެ ކެންޑިޑޭޓް އިބޫއަށް ތާއީދު ކުރައްވާ ސަބަބު ހާމަކުރައްވަމުން ދިޔާނާ ވިދާޅުވިއެވެ.
މީގެ އިތުރުން ދިޔާނާ ވަނީ ވޯޓު އޮޅުވާލުމަށް މަސައްކަތް ކުރެވޭ ކަމަށް ތުހުމަތުކުރެވޭތީ އެކަމަށް ރައްޔިތުން ސަމާލުވުމަށް އެދިވަޑައިގެންފައެވެ. އެގޮތުން ވޯޓު ލުމަށްފަހު ނަތީޖާ އިއުލާން ކުރެވެންދެން ވޯޓު ފޮށިތައް ކައިރީގައި މަޑު ކުރުމަށް ދިޔާނާ ވަނީ އިލްތިމާސްކުރައްވާފައެވެ.