ޕީޕީއެމްގެ ރަނިންމޭޓަކަށް ހޯމް މިނިސްޓަރުގެ މަގާމުގައި ހުންނެވި ޑރ. މުހައްމަދު ޖަމީލް އަހުމަދު ހަަމަޖެއްސުމާ ގުޅިގެން، އޭނާ އިއްޔެ މަގާމުން ވަކި ކުރި މައްސަލާގައި މަޝްވަރާ ކުރުމަށް އައްޑޫގައި މިއަދު ބޭއްވި ކުއްލި ބައްދަލުވުމުގެ ނިންމުން އައްޑޫގައި ހާމަ ނުކުރަން އެ ޕާޓީން ނިންމައިފި އެވެ.
ސަރުކާރު ކޯލިޝަނުގައި ހިމެނޭ ޕީޕީއެމް އިން އެ ގޮތަށް ނިންމީ ހިތަދޫގައި ހުންނަ ޕީޕީއެމްގެ އޮފީހުގައި ބޭއްވި ކައުންސިލް ބައްދަލުވުމަށް ފަހު، އައްޑޫގައި ތިބި ނޫސްވެރިންނަށް ބައްދަލުވުމާ ބެހޭ މައުލޫމާތު ދޭނެ ކަމަށް ބުނެ ނޫސްވެރިން ގެންދިޔުމަށް ފަހު އެވެ. ހެނދުނު 11:00 ޖެހި އިރު ފެށި ކައުންސިލް ބައްދަލުވުން ނިންމާލާފައި ވަނީ މެންދުރު 12:38 ގަ އެވެ.
މިއަދު އެތަނަށް ދިޔަ ނޫސްވެރިންގެ ތެރޭގައި ޓީވީއެމް އައްޑޫ ނިއުސްކާސްޓަރާއި ހަވީރު އައްޑު ކޮރެސްޕޮންޑެންޓާއި އައްޑޫ ލައިވްގެ ރިޕޯޓަރުންގެ އިތުރަށް އެމްވީ ޔޫތުގެ ނޫސްވެރިން ހިމެނެ އެވެ.
ކައުންސިލް ބައްދަވުން ނިންމާލުމަށް ފަހު ނިކުމެ ވަަޑައިގެން ނޫސްވެރިންނާ ވާހަކަ ދައްކަވަމުން ޕީޕީއެމްގެ ކައުންސިލް މެމްބަރު އަދި ރައްތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް ވިދާޅުވީ ކައުންސިލްގެ ނިންމުން ހާމަ ކުރާނީ މާލޭގައި ބާއްވާ ޕްރެސްއެއްގައި ކަމަށެވެ.
އެހެންވެ އައްޑޫގައި ތިބި ނޫސްވެރިންނަށް ކައުންސިލްގެ ނިންމުމާ ބެހޭ އެއްވެސް މައުލޫމާތެއް ދޭން މަހުލޫފް އިންކާރު ކުރެއްވި އެވެ.
އޭނާ ވިދާޅުވީ ބޭނުން ވަނީ މިއަދު މާލެ ވަޑައިގެން ހުރިހާ ނޫސްވެރިންނާ އެކު ޕްރެސްއެއް ބާއްވައި ކައުންސިލްގެ ނިންމުން ހާމަ ކުރަން ކަމަށެވެ. އެހެންވެ އައްޑޫގައި ތިބި ނޫސްވެރިންގެ ފަރާތުން އޭނާ ވަނީ މައާފަށް ވެސް އެދިވަޑައިގެންފަ އެވެ.
އެހެން ނަމަވެސް ޕީޕިއެމްގެ ދައުވަތު ދީގެން ނޫސްވެރިން ގެންދިއުމަށް ފަހު، ކައުންސިލްގެ ނިންމުން ހާމަ ނުކުރަން ނިންމުމުން ނޫސްވެރިން ވަނީ އެކަމާ ކަންބޮޑުވުން ފާޅުކޮށް، ޕާޓީގެ ބައެއް ފަރާތްތަކާ އެ ޝަކުވާކޮށްފަ އެވެ.
މީގެ ކުރިން ވެސް އައްޑޫގައި ތިބޭ ނޫސްވެރިންނާ ދޭތެެރޭ ބައެއް ފަރާތްކުން މިގޮތަށް އަމަލުކޮށްފައިވެ އެވެ. އެގޮތުން 2009 ވަނަ އަހަރު މަސްތުތާތަކެތީގެ ހަ ބޮޑުންގެ ތެރޭގައި ހިމެނޭ ކަމަށް ބުނެ ފުލުހުން އައްޑޫން އަތުލައިގަތް ހ. ރީނދޫގޭ އާދަމް ނަސީރު އަބޫބަކުރުގެ މައްސަލަ އާ ގުޅިގެން ފުލުހުން އައްޑޫގައި ބޭއްވި ޕްރެސްއަކަށް އައްޑޫގައި ތިބޭ ނޫސްވެރިން ގެންދިއުމަށް ފަހު، ވީޑިއޯ ކޮންފަރެންސް މެދުވެރިކޮށް މާލޭގައި ތިބި ނޫސްވެރިންނަށް މައުލޫމާތު ދީފައިވެ އެވެ.
އަދި 2011 ވަނަ އަހަރުގެ ސާކް ސަމިޓަށް ޓްރޭނިން ހަދަމުން ދަނިކޮށް ރ. އަލިފުށީ، ޝަބާނާ، އިބްރާހީމް ޝައުކަތު ލ. ކައްދޫގައި ބޮލަށް ވަޒަނެއް އަރައިގެން މަރުވި ހާދިސާ އާ ގުޅިގެން އެމްއެންޑީއެފް ސަދަން އޭރިއާގައި ބޭއްވި ނޫސް ކޮންފަރެންސަކަށް އައްޑޫގައި ތިބި ނޫސްވެރިން ގެންދިއުމަށް ފަހު، ވީޑިއޯ ކޮންފަރެންސް ހަދައި މާލޭގައި ތިބި ނޫސްވެރިންނަށް މައުލޫމާތު ދިނުމަށް އިސްކަން ދީފައިވެ އެވެ.