އިނގިރޭސި ޕްރިމިއާ ލީގުގައި އިއްޔެ ކުޅުނު މެޗުގައި އެވަޓަން އަތުން އާސެނަލް މޮޅުވިއިރު ވެސްޓްހޭމް ޔުނައިޓެޑާ ދެކޮޅަށް ޗެލްސީ ކުޅުނު މެޗުން އެއްވަރުވުމުން ލީގުގައި އެޓީމުން ދަމަހައްޓަމުން އައި މޮޅުވުމުގެ ސިލްސިލާ ނިމުމަކަށް އަތުވެއްޖެއެވެ.
އަމިއްލަ ދަނޑުގައި އެވަޓަން އަތުން އާސެނަލް 2-0 ގެ ނަތީޖާއަކުން މޮޅުވިއިރު ރަށުން ބޭރުގައި ވެސްޓްހޭމް އާ ދެކޮޅަށް ޗެލްސީ ކުޅުނު މެޗު ނިމުނީ 0-0 އިން އެއްވަރުވެގެންނެވެ.
ރޭގެ މެޗުތަކަށްފަހު، ލީގު ތާވަލްގެ އެންމެ ކުރީގައި އަދިވެސް އުޅެނީ ލިވަޕޫލެވެ. އެޓީމަށް ހަމެޗުން 18 ޕޮއިންޓް ލިބިފައިވާއިރު ވެސްޓްހޭމް އަތުން ލިބުނު ޕޮއިންޓާއެކު ޗެލްސީ ވަނީ 16 ޕޮއިންޓާއެކު ތިންވަނަ އަށް ވެއްޓިފައެވެ. ދެވަނައިގައި އޮތް މެންޗެސްޓަރ ސިޓީ އަށް ވެސް ހަމަ މިއަދަދަށް ޕޮއިންޓް ލިބިފައިވާއިރު އެ ޓީމަށް ކުރި ލިބެނީ ފައިދާ ގޯލްގެ ތަފާތުންނެވެ. އެވަޓަން އަތުން ހޯދީ މޮޅާއެކު 12 ޕޮއިންޓް ހަމަކޮށްގެން އާސެނަލް އޮތީ ތާވަލްގެ ހަވަނައިގައެވެ.
އާސެނަލްގެ އެމިރޭޓްސް ސްޓޭޑިއަމްގައި އެވަޓަން އާ ދެކޮޅަށް ކުޅުނު މެޗުގެ ފުރަތަމަ ހާފުގައި ދެޓީމަށް ލަނޑެއް ކާމިޔާބުނުކުރެވުނު ނަމަވެސް އެވަޓަންގެ ރިޗާލިސަން އާއި ތިއޯ ވަލްކޮޓް ފޮނުވާލި ހަމަލާތައް އާސެނަލްގެ ތަޖުރިބާކާރު ގޯލްކީޕަރު ޕީޓަ ޗެކް ވަނީ މަތަކޮށްފައެވެ.
މިމެޗުގެ ފުރަތަމަ ހާފުގެ ފަހުކޮޅު، އާސެނަލްގެ ގްރީސް ޑިފެންޑަރު ޕަޕަސްޓަތޮޕޫލޯސް ސޮކްރާޓިސް އަށް އަނިޔާވެގެން ބަދަލުކޮށްފައިވެއެވެ. އޭނާގެ ބަދަލުގައި ކުޅެން ނިކުމެފައިވަނީ އިނގިރޭސި ޑިފެންޑަރު ރޮބް ހޯލްޑިން އެވެ.
އާސެނަލުން މިމެޗުގައި ކާމިޔާބުކުރި ދެލަނޑު ވެސް ޖެހީ ފަހު ހާފުގައެވެ. އެގޮތުން، މެޗުގެ 56 ވަނަ މިނެޓުގައި ފުރަތަމަ ލަނޑު އެލެކްސެންޑަ ލަކަޒޭ ޖެހިއިރު، އޭގެ ތިން މިނެޓުފަހުން، އެޓީމުގެ ދެވަނަ ލަނޑު ކާމިޔާބުކުރީ ޕިއޭރް އެމެރިކް އޯބާމަޔަން އެވެ. މިދެގޯލް ކާމިޔާބުކުރުމަށް ދެފުރުޞަތުވެސް ތަނަވަސްކޮށްދިނީ ވޭލްސްގެ ހުނަރުވެރި މިޑްފީލްޑަރު އާރޮން ރަމްސީ އެވެ.
ޕްރިމިއާ ލީގުގައި އިއްޔެ ކުޅުނު ފުރަތަމަ މެޗުގައި ލަންޑަންގެ ދެކުލަބު ކަމަށްވާ ޗެލްސީ އާ ވެސްޓްހޭމްގެ ކުރިމަތިލުން ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.
މިމެޗަށް ނިކުތުމުގެ ކުރީން، ލީގުގައި އެންމެ ފުރަތަމަ ކުޅުނު ހަތަރު މެޗުން ބަލިވިނަމަވެސް، އެންމެފަހުން ކުޅުނު މެޗުގައި އެވަޓަން ބަލިކޮށް ވެސްޓްހޭމް މިވަގުތު ރަނގަޅު ފޯމެއްގައި އޮތް އިރު އެޓީމަށް ދިމާވެފައިވާ އެންމެ ބޮޑު މައްސަލައަކީ އަނިޔާގެ ސަބަބުން ފޯވާޑްލައިންގައި މޮޅު ކުޅުމެއް ދައްކަމުން އަންނަ މާކޯ އާނައުޓޮވިޗަށް މިމެޗުގައި ނުކުޅެވުމެވެ.
ލަންޑަން ސްޓޭޑިއަމްގައި ކުޅުނު މިމެޗުގެ ފުރަތަމަ ހާފުގައި ވެސްޓްހޭމްގެ މިޚައިލް އެންޓޯނިއޯ އަށް ލިބުނު ފުރުޞަތެއްގައި އޭނާ ފޮނުވާލި ބޯޅަ ޗެލްސީގެ ގޯލްކީޕަރު ކެޕާ އަރިޒަބަލަގާ މަތަކުރިއިރު މިހާފުގައި ޗެލްސީގެ ކުޅުންތެރިންނަށް ވެސްޓްހޭމްގެ ގޯލަށް އަމާޒުކޮށް ނުރައްކާތެރި ހަމަލާއެއް ފޮނުވާލެވިފައެއްނުވެއެވެ.
މިމެޗުގެ ދެވަނަ ހާފުގައި، ޗެލްސީގެ އަލްވާރޯ މޮރާޓާ އަށް ލަނޑުޖެހުމަށް ލިބުނު ފުރުޞަތުގެ ބޭނުންހިފޭގޮތްނުވިއިރު ވެސްޓްހޭމްގެ އެންޑްރެއި ޔާމޮލެންކޯ އަށް ވަނީ ރަނުގެ ފުރުޞަތެއް ލިބިފައެވެ. އެޓީމުގެ ރޮބަޓް ސްނޮޑްގްރާސް ނަގައިދިން ހުރަހަކުން ލިބުނު ބޯޅަ އޭނާ ބޮލުން ފޮނުވާލުމުން ދިޔައީ ގޯލްގެ ދަނޑިކައިރިން ބޭރަށެވެ.
އޭގެފަހުން، މެޗުގެ އިތުރުވަގުތުގައި ޗެލްސީގެ ރޮސް ބާކްލޭ އަށް ލިބުނު ބޯޅަ އޭނާ ފޮނުވާލުމުން ވެސްޓްހޭމްގެ ގޯލްކީޕަރު ލޫކަސް ފަބިއާންސްކީ ވަނީ މަތަކޮށްފައެވެ.