ރެއާލް މެޑްރިޑަށް ކުޅެމުން އަންނަ ސްޕެއިނުގެ ހުނަރުވެރި މިޑްފީލްޑަރު އިސްކޯ، އެޕެންޑިކްސްގެ އޮޕަރޭޝަނެއް ކުރުމާއި ގުޅިގެން އެއްމަސް ދުވަހަށް ކުޅުމާއި ދުރަށް ދާން ޖެހިއްޖެއެވެ.
ލީގުގައި ރެއާލަށް ކުރިއަށް އޮތް ސެވިއްޔާ މެޗަށް ތައްޔާރުވުމުގެ ގޮތުން އެޓީމުގެ ފަރިތަކުރުންތަކުގައި ބައިވެރިވުމަށް އިސްކޯ ހާޒިރުވިނަމަވެސް ތަމްރީންތަކުގައި ބައިވެރިވެވޭގޮތްނުވުމުން ރެއާލްގެ މެޑިކަލް ޓީމުން ހެދި ޓެސްޓްތަކަށްފަހު އޭނާގެ އެޕެންޑިކްސް ދުޅަވެފައިވާކަމަށް ނަތީޖާއިން ދައްކާތީވެ އިއްޔެގެ ވަގުތެއްގައި އޮޕަރޭޝަނެއް ކޮށްފައިވެއެވެ.
މި އޮޕަރޭޝަނަށްފަހު، މަދުވެގެން އެއްމަސް ދުވަހަށް އިސްކޯ ކުޅުމާއި ދުރުގައި ހުންނަން ޖެހޭއިރު، ރެއާލަށް ކުރިއަށް ހަތަރު މެޗުގެ އިތުރުން ސްޕެއިނުގެ ޤައުމީޓީމު ކުޅުމަށް ހަމަޖެހިފައިވާ ދެމެޗުވެސް އޭނާ އަށް ގެއްލޭނެއެވެ.
އެގޮތުން، ރެއާލަށް ލީގުގައި ކުރިއަށް އޮތް މުހިއްމު ދެމެޗުގައި ސެވިއްޔާ އާ އެތުލެޓިކޯ މެޑްރިޑާ ދެކޮޅަށް އެޓީމު ނިކުންނައިރު އިސްކޯ ނެތްތަން ފޫބައްދައިދޭނީ މިސީޒަނުގައި މޮޅު ކުޅުމެއް ދައްކަމުން އަންނަ އުމުރުން 22 އަހަރުގެ މާކޯ އަސެންސިއޯ އެވެ.
ފަހަކަށް އައިސް ސްޕެއިނުގެ ޤައުމީ ޓީމުގައި މޮޅު ކުޅުމެއް ދައްކަމުން އަންނަ އިސްކޯ އަށް ޔޫއެފާ ނޭޝަންސް ލީގުގައި އިންގްލެންޑާއި ސްޕެއިން ބައްދަލުކުރާ މެޗުގެ އިތުރުން ވޭލްސް އާ ދެކޮޅަށް އެޓީމު ކުޅުމަށް ހަމަޖެހިފައިވާ އެކުވެރިކަމުގެ މެޗުގައި ވެސް އޭނާ އަށް ނުކުޅެވޭނެއެވެ. އޭނާ ވަނީ 2013 ވަނަ އަހަރުން ފެށިގެން މިހާތަނަށް އައިއިރު ޤައުމީ ޓީމަށް ކުޅެދިން 34 މެޗުގައި 12 ގޯލް ކާމިޔާބުކޮށްފައެވެ.