މިމަހުގެ 23 ވަނަ ދުވަހު ބޭއްވި ރިޔާސީ އިންތިހާބުގެ ނަތީޖާ ފަސްކޮށްދޭން ޕީޕީއެމް އިން ކޯޓަށް ހުށަހަޅަން އުޅޭ ކަމުގެ މައުލޫމާތު އިތުބާރު ހުރި ގޮތެއްގައި 'އައްޑޫލައިވް' އަށް ލިބިއްޖެއެވެ.
މައުލޫމާތު ލިބިފައިވާ ގޮތުގައި އިންތިހާބުގެ ނަތީޖާ ހުށަހެޅުން ފަސްކުރުމަށް އެދި ޕީޕީއެމުން ކޯޓަށް ހުށަހަޅަނީ އިލެކްޝަންސް ކޮމިޝަނާއި ގުޅިގެން އިދިކޮޅު ފަރާތްތަކުން އިންތިހާބަށް ނުފޫޒު ފޯރުވި ކަމަށް ބުނެއެވެ.
ޕީޕީއެމްގެ ފަރާތުން މިފަދަ ތުހުމަތު ތަކެއް އިލެކްޝަންސް އަށް ކުރާއިރު މިއަދުގެ ވަގުތެއްގައި އެ ކޮމިޝަނުގެ ރައީސް އަހްމަދް ޝަރީފް ވަނީ، ހައްޔަރު ކުރަންޖެހޭ ވަރުގެ އެއްވެސް ޖިނާއީ ކުށެއް ކޮށްފައި ނުވާނެކަމަށް ވިދާޅުވެފައެވެ.
އަދި އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވަނީ އިންތިހާބުގައި މައްސަލަތަކެއް ހުރިކަން ފާހަގަކޮށް ދާއިމީ ނަތީޖާ އިއުލާން ކުރުން ފަސްކޮށް ދިނުމަށް ޕީޕީއެމުން އެދިފައިވާ ކަމަށް ވިދާޅުވެފައެވެ.
މައުލޫމާތު ލިބިފައިވާ ގޮތުގައި ޕީޕީއެމުން އިލެކްޝަންސް އަށް ހުށަހެޅި މައްސަލަ އާއި މެދު ގޮތެއް ނިންމުމަށް ހަމަޖެހިފައިވަނީ މާދަމާގެ ވަގުތެއްގައެވެ.