ސްޕެނިޝް ލީގުގެ އެންމެ ކުރީގައި އުޅޭ ބާސެލޯނާ ކުޅުނު މެޗުން ބަލިވުމުގެ ފައިދާ ނަގަން ރެއާލް މެޑްރިޑަށް ލިބުނު ފުރުޞަތު އެޓީމުން ގެއްލުވާލައިފިއެވެ.
ލަލީގާގައި ރޭ ކުޅުނު ފުރަތަމަ މެޗުގައި ތާވަލްގެ އެންމެ ފުލުގައި އުޅޭ ލެގާނެސް އަތުން 2-1 އިން ބާސާ ބަލިވިއިރު ސެވިއްޔާ އަތުން 3-0 ގެ ނަތީޖާއަކުން ރެއާލް ބަލިވެފައިވެއެވެ.
ލެގާނެސްގެ ދަނޑުގައި ކުޅުނު މެޗުގައި ބާސާ އަށް ލީޑް ނަގައިދިނީ މެޗުގެ 12 ވަނަ މިނެޓުގައި ލިއޮނަލް މެސީ ތަނަވަސްކުރި ފުރުޞަތަކުން ފިލިއްޕޭ ކުޓީނިއޯ އެވެ.
އޭގެފަހުން، މެސީ އަށް ލިބުނު ފުރުޞަތެއްގައި އޭނާ ފޮނުވާލި ހަމަލާއެއް ގޯލްގެ ހުރަސްދަނޑީގައި ޖެހިފައިވާއިރު މިހާފުގައި ލެގާނެސް އިން ބާސާގެ ގޯލަށް އަމާޒުކޮށް ގިނަ ހަމަލާތަކެއް ވަނީ ފޮނުވާލައިފައެވެ. މިމެޗުގެ ފުރަތަމަ ހާފު ނިމުނީ 1-0 އިން ބާސާ ކުރީގައިއޮވެގެންނެވެ.
ދެވަނަ ހާފު ފެށިގެން، ކުޑައިރުކޮޅެއްގެ ތެރޭގައި ލެގާނެސް ވަނީ ދެލަނޑު ކާމިޔާބުކޮށްފައެވެ. އެގޮތުން، މެޗުގެ 52 ވަނަ މިނެޓުގައި ލެގާނެސްގެ ޖޮނަތަން ސިލްވާ ނަގައިދިން ހުރަހަކުން ލިބުނު ބޯޅައެއް ގޯލްގެތެރެއަށް ބޮލުން ވައްދާލައިގެން ނަބީލް އެލް ޒާ އެއްވަރުކޮށްދިންއިރު އޭގެ މިނެޓެއްފަހުން އެޓީމުގެ އޮސްކާ ރޮޑްރިގޭޒް ވަނީ ބާސާގެ ޑިފެންޑަރު ޖެރާޑް ޕީކޭ އަށް ހެދުނު ގޯހެއްގެ ފައިދާނަގައި ލެގާނެސް އަށް ފުރަތަމަ ފަހަރަށް ލީޑް ނަގައިދީފައެވެ.
ލެގާނެސްގެ ލަނޑުތަކަށްފަހު، ބާސާގެ ކުޓީނިއޯ އާއި އިވާން ރަކިޓިޗް އަށް ލިބުނު ފުރުޞަތުތަކުގައި އެދެކުޅުންތެރިން ފޮނުވާލި ހަމަލާތަކުގެ ހުރަހަކަށްވީ ލެގާނެސް ގޯލްކީޕަރު އިވާން ކުއެލާ އެވެ.
މިމުބާރާތުގައި ރޭ ކުޅުނު މެޗުގައި، ރަށުން ބޭރުގައި ސެވިއްޔާ އަތުން ރެއާލް ބަލިވެ ތާވަލްގެ އެންމެ ކުރިއަށް ޖެހިލުމަށް ލިބުނު ފުރުޞަތު އެޓީމަށް ގެއްލިއްޖެއެވެ. ރެއާލް ރޭގެ މެޗަށް ނިކުތީވެސް ބާސާ ކުޅުނު މެޗުން ލެގާނެސް އަތުން ބަލިވެފައިވާކަން އެނގިތިބެއެވެ.
ރޭ އަމިއްލަ ދަނޑުގައި ކުޅުނު ސެވިއްޔާގެ ފުރަތަމަ ލަނޑު، މެޗުގެ 17 ވަނަ މިނެޓްގައި ކާމިޔާބު ކުރީ އަންދްރޭ ސިލްވާ އެވެ. މިއީ އެޓީމުގެ ޖެސޫސް ނަވާސް ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ.
އޭގެ ހަތަރު މިނެޓުފަހުން ސިލްވާ ވަނީ އިތުރު ލަނޑެއް ޖަހައި އެޓީމަށް ލީޑް ފުޅާކޮށްދީފައެވެ.
ސެވިއްޔާ ވަނީ ފުރަތަމަ ހާފު ނިމުމުގެކުރީން ތިން ލަނޑުގެ ލީޑެއް ނަގާފައެވެ. މެޗުގެ 39 ވަނަ މިނެޓުގައި މިލަނޑު އެޓީމަށް ކާމިޔާބުކޮށްދިނީ ވިސާމް ބެން ޔެޑާ އެވެ.
މިމެޗުގެ ފުރަތަމަ ހާފުގައި ސެވިއްޔާ އިން ލަނޑުޖަހާނެ ގިނަ ފުރުޞަތުތަކެއް ތަނަވަސްކޮށްފައިވާއިރު މިހާފުގައި ރެއާލަށް ލިބުނު އެންމެ ރަނގަޅު ފުރުޞަތު ގަރެތު ބޭލް އަށް ލިބުމުން އޭނާ ފޮނުވާލި ނަމަވެސް ގޯލެއް ކާމިޔާބުކުރެވޭގޮތެއްނުވިއެވެ.
ދެވަނަ ހާފު ފެށިގެން، ރެއާލް އިން ފުލުފުލުގައި ތިން ހަމަލާއެއް އުފައްދާފައިވެއެވެ. ނަމަވެސް، އެޓީމުގެ ސާޖިއޯ ރަމޯސް އާއި ކަރީމް ބެންޒެމާގެ އިތުރުން ބޭލް ފޮނުވާލި ބޯޅަތައް ގޯލަށް އަމާޒުވާގޮތެއްނުވިއެވެ.
މެޗުގެ 53 ވަނަ މިނެޓުގައި ރެއާލްގެ ލޫކާ މޮޑްރިޗް ގޯލެއް ކާމިޔާބުކުރިނަމަވެސް ރެފްރީ ވަނީ ވީއޭއާރްގެ އެހީ ހޯދުމަށްފަހު އެއީ ގޯލެއް ނޫން ކަމަށް ނިންމާފައެވެ.
އޭގެފަހުން، ރެއާލްގެ ބޭލް އަށް ލަނޑުޖެހުމަށް ލިބުނު ފުރުޞަތުގައި އޭނާ ފޮނުވާލި ބޯޅަ ސެވިއްޔާގެ ގޯލްކީޕަރު ތޯމަސް ވަސްލިކް މަތަކުރިއިރު މަރިއާނޯ ޑިއަޒް އާއި ކަސެމީރޯ ފޮނުވާލި ހަމަލާތައް ގޯލަށް އަމާޒުވާގޮތެއްނުވިއެވެ.
މިމެޗުގެ 76 ވަނަ މިނެޓުގައި މާސެލޯ އަށް އަނިޔާވުމުން ބަދަލުގައި އިތުރު ކުޅުންތެރިއަކު އެރުވޭނެ ގޮތެއް ނެތުމުން ރެއާލުން ކުޅުނީ އެއް ކުޅުންތެރިއަކު މަދުންނެވެ. މާސެލޯ އަށް ލިބުނު އަނިޔާގެ ސަބަބުން ރެއާލަށް ކުރިއަށް އޮތް މެޑްރިޑް ޑާބީގައި އޭނާ އަށް ކުޅެވޭނެ ކަމާއި މެދު ވަނީ ސުވާލު އުފެދިފައެވެ.
ސްޕެނިޝް ލީގުގައި ރޭ ކުޅުނު މެޗުތަކަށްފަހު، ތާވަލްގެ އެންމެ ކުރީގައި އަދިވެސް އުޅެނީ ބާސާ އެވެ. އެއީ ކުޅުނު ހަ މެޗުން 13 ޕޮއިންޓް ހަމަކޮށްގެންނެވެ. ދެވަނައިގައި އޮތް ރެއާލަށް ވެސް މިއަދަދަށް ޕޮއިންޓް ލިބިފައިވާއިރު ބާސާ އަށް ކުރި ލިބެނީ ގޯލްގެ ތަފާތުންނެވެ. ސީޒަންގެ ކުރީކޮޅު އާދައިގެ ކުޅުމެއް ފެނިގެންދިޔަ އެތުލެޓިކޯ މެޑްރިޑް ވަނީ އެންމެ ފަހުން ކުޅުނު މެޗުން މޮޅުވެ 11 ޕޮއިންޓާއެކު ތިންވަނަ އަށް ޖެހިލައިފައެވެ. ރެއާލް އަތުން މޮޅުވި ސެވިއްޔާ އޮތީ 10 ޕޮއިންޓާއެކު ހަތަރުވަނައިގައެވެ.