އިނގިރޭސި ލީގު ކަޕްގައި ރޭ ކުޅުނު މެޗުގައި ރަށުން ބޭރުގައި އެޑެން ހަޒާޑު ކާމިޔާބުކުރި ލަނޑުން ޗެލްސީ އިން ލިވަޕޫލް ބަލިކުރިއިރު ބްރެންޓްފޯޑް އަތުން އާސެނަލް މޮޅުވެއްޖެއެވެ.
އަމިއްލަ ދަނޑުގައި ޗެލްސީ އަތުން 2-1 އިން ލިވަޕޫލް ބަލިވިއިރު، ބްރެންޓްފޯޑް އަތުން 3-1 އިން އާސެނަލް ކުރިހޯދައިފިއެވެ.
ލިވަޕޫލްގެ އެންފީލްޑްގައި ޗެލްސީ އާ ދެކޮޅަށް ކުޅުނު މިމެޗުގެ ފުރަތަމަ ހާފުގައި ދެޓީމަށްވެސް ގޯލެއް ކާމިޔާބުކުރެވިފައެއްނުވެއެވެ. މިހާފުގައި ޗެލްސީގެ އަންދްރެއަސް ކްރިސްޓެންސަން އާއި އަލްވާރޯ މޮރާޓާ ފޮނުވާލި ހަމަލާތައް ލިވަޕޫލްގެ ގޯލްކީޕަރު ސައިމަން މިނޮލޭ މަތަކުރިއިރު ލިވަޕޫލުން ތަނަވަސްކުރި ފުރުޞަތުތަކުގައި އެޓީމުގެ ނަބީ ކެއިޓާގެ އިތުރުން ސަޑިއޯ މާނޭ ފޮނުވާލި ބޯޅަ ޗެލްސީގެ ކީޕަރު ވިލީ ކަބަލޭރޯ ދިފާއުކޮށްފައިވެއެވެ.
ދެވަނަ ހާފުގެ ކުރީކޮޅު، ލިވަޕޫލުން ލަނޑުޖަހާނެ ގިނަ ފުރުޞަތުތަކެއް ތަނަވަސްކުރިިއިރު މެޗުގެ 58 ވަނަ މިނެޓުގައި ޑެނިއަލް ސްޓަރިޖް ވަނީ ބައިސިކަލް ކިކަކުން ފޮނުވާލި ބޯޅައަކުން އެޓީމަށް ލީޑް ނަގައިދީފައެވެ.
ޗެލްސީ އަށް ނަތީޖާ ހަމަހަމަކޮށްދިނީ މެޗުގެ 79 ވަނަ މިނެޓުގައި އެމާސަން ޕަލްމިއެރީ އެވެ. އޭގެ ކުޑައިރުކޮޅެއްކުރީން، އެޓީމުގެ ރޮސް ބާކްލޭ އަށް ލަނޑުޖެހުމަށް ލިބުނު ފުރުޞަތުގައި އޭނާ ފޮނުވާލި ބޯޅަ ލިވަޕޫލްގެ ކީޕަރު މިނޮލޭ މަތަކޮށްފައިވެއެވެ.
އޭގެފަހުން، މެޗުގެ 84 ވަނަ މިނެޓުގައި ލިވަޕޫލްގެ ސްޓަރިޖް އަށް ވަނީ އެޓީމަށް އަލުން ލީޑް ނަގައިދިނުމަށް ލިބުނު ފުރުޞަތުގައި އޭނާ ފޮނުވާލި ބޯޅަ ގޯލްގެ ހުރަސްދަނޑީގައި ޖެހިފައިވެއެވެ.
ލިވަޕޫލަށް ލިބުނު ފުރުޞަތުގެ ބޭނުން ނުހިފުމުގެ ނަތީޖާއަކަށްވީ އޭގެ މިނެޓެއްފަހުން، ޗެލްސީގެ ހަޒާޑް ކާމިޔާބުކުރި ރީތި ގޯލަކުން އެޓީމުން ފުރަތަމަ ފަހަރަށް ލީޑް ނެގުމެވެ. މިއީ ޗެލްސީގެ ފުލްބެކް ސެޒާ އަޒްޕިލިކުއެޓާ ދިން ބޯޅައަކުން އޭނާ ކާމިޔާބުކުރި ގޯލެކެވެ.
ގިނަ ބަދަލުތަކާ އެކު ރޭ އެމިރޭޓްސް ސްޓޭޑިއަމްގައި ބްރެންޓްފޯޑް އާ ދެކޮޅަށް އާސެނަލް ކުޅުނު މެޗު ފެށިގެން ފަސްވަނަ މިނެޓުގައި މަޓެއޯ ގެންޑޫޒީ ތަނަވަސްކުރި ފުރުޞަތަކުން އެޓީމަށް ލީޑް ނަގައިދިނީ އިނގިރޭސި ފޯވާޑް ޑެނީ ވެލްބެކް އެވެ.
ފުރަތަމަ ހާފުގެ 37 ވަނަ މިނެޓުގައި ވެލްބެކް ވަނީ އިތުރު ލަނޑެއްޖަހައި އާސެނަލަށް ދެލަނޑުގެ ލީޑެއްނަގައިދީފައެވެ. މިއީ އެޓީމުގެ ނާޗޯ މޮންރެއާލް ދިން ބޯޅައަކުން އޭނާ ކާމިޔާބުކުރި ގޯލެކެވެ. މެޗުގެ ފުރަތަމަ ހާފު ނިމުނީ 2-0 އިން އާސެނަލް ކުރީގައިއޮވެގެންނެވެ.
މިމެޗުގައި ބްރެންޓްފޯޑުން ޖެހި ހަމައެކަނި ގޯލް، 58 ވަނަ މިނެޓުގައި ލިބުނު ހިލޭޖެހުމަކުން އެލަން ޖަޖް ކާމިޔާބުކުރިއިރު މެޗުގެ އިތުރު ވަގުތުގައި އާސެނަލްގެ ފަހު ލަނޑު ޖަހައިދިނީ އަލެކްސެންޑަ ލަކަޒޭ އެވެ. މިއީ އެޓީމުގެ ލޫކަސް ޓޮރެއިރާ ދިން ބޯޅައަކުން އޭނާ ކާމިޔާބުކުރި ގޯލެކެވެ.
މިމުބާރާތުގައި ރޭ ޓޮޓެންހަމް ހޮޓްސްޕާ ވަނީ ވަޓްފޯޑް އާ ދެކޮޅަށް އަމިއްލަ ދަނޑުގައި ކުޅުނު މެޗު ފުރިހަމަ ވަގުތު ހަމަވިއިރު ދެޓީމު 2-2 އިން އެއްވަރުވުމުން ޕެނަލްޓީ ޖަހައިގެން 4-2 އިން ކާމިޔާބުކޮށްފައެވެ. މިމެޗުގައި ޓޮޓެންހަމްގެ ގޯލްތައް، ޑެލޭ އަލީ އާއި އެރިކް ލަމެލާ ޖަހައިދިންއިރު ވަޓްފޯޑްގެ ލަނޑުތައްޖަހައިދިނީ އިސާކް ސަކްސެސް އާއި އެޓިއެން ކަޕޫއޭ އެވެ.
ވެސްޓްހޭމް ޔުނައިޓެޑް ވަނީ ރޭ އަމިއްލަ ދަނޑުގައި 8-0 ގެ ތަފާތު ބޮޑު ނަތީޖާއަކުން އިނގިރޭސި ތިންވަނަ ޑިވިޝަނުގެ މެކްލެސްފީލްޑް ޓައުން އަތުން މޮޅުވެފައެވެ. ނޮޓިންހަމް ފޮރެސްޓް ވަނީ 3-2 އިން ސްޓޯކް ސިޓީ ބަލިކޮށްފައެވެ.