ޕީޕީއެމް އިން ކުރިޔަށް ގެންދާ "އާދަޔާ ހިލާފު" ކޮންގްރެސް އިރުކޮޅެއް ކުރިން ފަށައިފި އެވެ. ފަސް އަހަރަށް ފަހު އެ ޕާޓީ އިން ކުރިޔަށް ގެންދާ ކޮންގްރެސްއަށް އެއްވެސް މީޑިއާއެއް އަދި ވައްދާފައެއް ނުވެއެވެ.
މިއަދު މެންދުރު 2:30 ހާއިރު ފެށި ޕީޕީއެމްގެ ކޮންގްރެސްގައި އެޖެންޑާކޮށްފައި ވަނީ އެ ޕާޓީގެ އަސާސީ ގަވާއިދުގައިވާ ގޮތުގެ މަތިން އަސާސީ ގަވާއިދަށް ބަދަލު ގެނައުމާއި ޕާޓީގެ ހިންގާ ގަވައިދަށް ބަދަލު ގެނައުމެވެ.
މީގެ އިތުރުން ޕީޕީއެމްގެ ރައީސްގެ މަގާމާއި ނައިބު ރައީސް އަދި ޕީޕީއެމްގެ ކައުންސިލްއަށް މެންބަރުން އިންތިހާބު ކުރުމަށް ވެސް ވަނީ އެޖެންޑާކޮށްފަ އެވެ.
ޕީޕީއެމް އިން ބުނާ ގޮތުގައި އެ ކޮންގްރެސްގައި، 442 މަންދޫބުން ބައިވެރިވެ އެވެ. އެެހެން ނަމަވެސް މީޑިއާ ނުވައްދާތީވެ އެ އަދަދުގެ ކަށަވަރުކަން ބަޔާންކުރަން ވަނީ އުނދަގޫ ވެފައެވެ.
ޕީޕީއެމްގެ ރަސްމީ ޓްވިޓާގައި ޕޯސްޓް ކުރި ފޮޓޯތަކުން ފެންނަ ގޮތުގައި ޕީޕީއެމްގެ ކޮންގްރެސްގެ ރިޔާސަތުގައި ތިއްބަވަނީ، އެޑިއުކޭޝަން މިނިސްޓަރު އައިޝަތު ޝިހާމް އާއި ސްރީލަންކާގެ ކޮޅުބުގައި ހުންނަ ދިވެހި ސަފީރު މުހައްމަދު ޝަރީފް، މުންދު އާއި ހޯމް މިނިސްޓްރީގެ ސްޓޭޓް މިނިސްޓަރު ތޮލާލް އަދި ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރެވެ.
ކުރީ ގޮނޑިބަރީގައި ރައީސް ޔާމީނާއި އިންތިޚާބަށް އެ މަނިކުފާނާއެކު ނިކުންނެވި ރަނިންމޭޓް ޑރ. މުހައްމަދު ޝަހީމް އަލީ ސައީދު ތިއްބެވި މަންޒަރު ފޮޓޯތަކުން ފެނެއެވެ.
އެ ޕާޓީގެ އޮފިޝަލަކާ ހަވާލާދެއްވާ އޮންލައިން ނޫސް އަވަސް އިން ރިޕޯޓްކޮށްފައިވާ ގޮތުގައި ކޮންގްރެސްގެ އެބައިތައް ކުރިޔަށް ދާއިރު އެއްވެސް މީޑިއާއެއް ކަވަރު ކުރަން ފުރުސަތު ދޭ ގޮތަށް ހަމަޖެހިފައި ނުވެއެވެ. މީޑިއާތަކަށް ފުރުސަތު ލިބޭނީ މިރޭ ކޮންގްރެސް ނިންމާލުމަށް ބާއްވާ ހަފްލާއަށް ކަމަށް އެނާ ވިދާޅުވި ކަމަށް ވެސް އެނޫހުގައި ބުނެފައިވެއެވެ. ނަމަވެސް ފޭސްބުކް އާއި ޓްވިޓަރުން ލައިވް ކުރަމުން ގެންދާނެ ކަމަށެވެ.
ނަމަވެސް މިހާތަނަށް ލައިވް ކޮށްފަ ނުވާކަން ފާހަގަކުރެވެއެވެ. ހަމައެކަނި ގެންދަނީ ފޮޓޯތަކެއް ޕޯސްޓް ކުރަމުން އެވެ.
ކޮންމެ ފަސް އަހަރަކުން އެއް ފަހަރު ޕާޓީތަކުގެ ގައުމީ ޖަލްސާ ބޭއްވުމަށް ގާނޫނު ލާޒިމްކުރާއިރު ޕީޕީއެމްގެ ގައުމީ ޖަލްސާއެއް އެންމެ ފަހުން ބޭއްވީ 2013 ވަނަ އަހަރުގެ ތެރޭގަ އެވެ. އެ ޖަލްސާގައި ރައީސް މައުމޫން އަބްދުލްގައްޔޫމް ވަނީ ޕާޓީގެ ރައީސްއެއްގެ ގޮތުގައި އިންތިހާބުކޮށްފަ އެވެ.
ނަމަވެސް ޕާޓީއިން އެމަނިކުފާނު މިހާރު ވަނީ ވަކިކޮށްފަ އެވެ. ގައުމީ ޖަލްސާގެ ބަހެއް ނެތި އެމަނިކުފާނު މަގާމުން ވަކިކުރީ ޕާޓީގެ ކައުންސިލުންނެވެ. ޕީޕީއެމްގެ ގައުމީ ޖަލްސާއެއް ބޭއްވުމަށް ސިވިލް ކޯޓުން ވެސް ހުކުމްކުރި އެވެ.
ޕީޕީއެމްގެ ބާރުތައް ރައީސް އަބްދުﷲ ޔާމީންއާ ހަވާލުކުރި ސިވިލް ކޯޓުގެ ހުކުމްގައި ޕާޓީގެ ގައުމީ ޖަލްސާއެއް ޕާޓީގެ މުސްތަޝާރު، ރައީސް ޔާމީންގެ ބެއްލެވުމުގެ ދަށުން ބޭއްވުމަށް އަމުރުކޮށްފައިވެ އެވެ. ނަމަވެސް 2016 ވަނަ އަހަރުގެ އެ ހުކުމާ އެއްގޮތަކަށް ގައުމީ ޖަލްސާއެއް މިހާތަނަށް ބާއްވާފައެއް ނުވެ އެވެ.