ޔޫއެފާ ޗެމްޕިއަންސް ލީގުގައި ރަށުން ބޭރުގައި ވެލެންސިއާ އަތުން 2-0 އިން ޔުވެންޓަސް މޮޅުވި މެޗުގައި އެޓީމުގެ ކްރިސްޓިއާނޯ ރޮނާލްޑޯ އަށް ދެއްކި ރަތް ކާޑަށް އިތުރު ސަސްޕެންޝަނެއް ނުދޭން ޔުއެފާ އިން ނިންމައިފިއެވެ.
މިއީ ޗެމްޕިއަންސް ލީގުގެ ތާރީޚުގައި ރޮނާލްޑޯ އަށް ރަތްކާޑު ދެއްކި ފުރަތަމަ ފަހަރެވެ.
ވެލެންސިއާއާ ދެކޮޅަށް ކުޅުނު މެޗުގައި ރޮނާލްޑޯ އަށް ސީދާ ރަތް ކާޑެއް ދެއްކީ ބޯޅަ ނެތީސް ވެލެންސިއާގެ ޑިފެންޑަރު ޖެއިސަން މުރީއޯއާ ދެމެދު ހިނގި ހަމަނުޖެހުމެއްގެ ތެރެއިން, މުރީއޯ ވެއްޓުނު ވަގުތު އޭނާ ބޮލުގެ އިސްތަށީގައި ހިފުމުންނެވެ. ރޮނާލްޑޯ އަށް ރަތްކާޑު ދައްކަން މެޗުގެ ރެފްރީ ފެލިކްސް ބްރައިޗް ނިންމީ ގޯލުގެ ރޮނގު ކައިރީގައި ހުންނަ އޮފިޝަލުގެ ލަފާ ހޯދުމަށް ފަހުގައެވެ. އެއަށްފަހު، ރޮނާލްޑޯ ދަނޑުން ފައިބައިގެންދިޔައީ ރޮމުންނެވެ.
މި ރަތްކާޑާއި ގުޅިގެން ރޮނާލްޑޯ އަށް އޭނާގެ ކުރީގެ ކުލަބް މެންޗެސްޓަރ ޔުނައިޓެޑާ ދެކޮޅަށް އޯލްޑް ޓްރެފޯޑްގައި އަންނަ މަހުގެ 23 ވަނަ ދުވަހު ކުޅޭ މެޗުގައި ނުކުޅެވޭނެކަމަށް ކުރިން ބެލެވުނު ނަމަވެސް ޔުއެފާ އިން ރޮނާލްޑޯ އެއް މެޗަށް ސަސްޕެންޑްކުރުމުން އޭނާ އަށް ގެއްލޭނީ އަންނަ މަހުގެ ދެވަނަ ދުވަހު ސްވިޒަލޭންޑްގެ ޔަންގް ބޯއީސް އާ ބައްދަލުކުރާ މެޗު އެކަންޏެވެ. އޭގެފަހުން، ކުރިއަށް އޮތް ޔުނައިޓެޑާ ދެކޮޅަށް ކުޅޭ ދެމެޗުގައިވެސް އޭނާ އަށް ކުޅެވޭނެއެވެ.
ސްޕެއިނުގެ ރެއާލް މެޑްރިޑް ދޫކޮށް ޔުވެންޓަސް އަށް ބަދަލުވެ އިޓާލިއަން ސެރިއޭގައި އެޓީމާއެކު ރަނގަޅު ކުޅުމެއް ދައްކަމުން އަންނަ ރޮނާލްޑޯ ވަނީ މިހާތަނަށް ކުޅުނު ހަމެޗުގައި އެޓީމަށް ތިން ގޯލް ކާމިޔާބުކޮށްދީ އިތުރު ދެލަނޑުޖެހުމަށް އެހީތެރިވެދީފައެވެ.
އިޓާލިއަން ލީގުގައި، ޔުވެންޓަސް އެންމެ ފަހުން ކުޅުނު މެޗުގައި ބޮލޯނިއާ އަތުން 2-0 އިން މޮޅުވިއިރު އެޓީމަށް ދެން އޮތީ އަމިއްލަ ދަނޑުގައި ނަޕޯލީ އާ ދެކޮޅަށް ކުޅޭ މެޗެވެ. ލީގު ތާވަލްގެ އެންމެ ކުރީގައި އުޅޭ ދެޓީމު ބައްދަލުކުރާ ފޯރިގަދަ މެޗު ކުޅުމަށް ހަމަޖެހިފައިވަނީ ހޮނިހިރު ދުވަހު މާލޭގަޑިން ރޭގަނޑު 9 ޖަހާއިރުއެވެ.