ޕީޕީއެމްގެ ރައީސްގެ މަގާމަށް، އެ ޕާޓީގެ މުސްތަަޝާރު އަދި ރިޔާސީ އިންތިހާބުގައި ނާކާމިޔާބީއާ ކުރިމަތިވި، ރައީސް އަބްދުﷲ ޔާމީން ހޮވުމަށް އެ ޕާޓީގެ ކޮންގްރެސްއިން ފާސްކޮށްފި ކަމަށް އެ ޕާޓީ އިން ބުނެފި އެވެ.
އެ ޕާޓީގެ ރަސްމީ ޓްވިޓާ އެކައުންޓުން ކުރި ޓްވީޓެއްގައި ބުނީ، އެގޮތަށް ފާސްކުރީ ކޮންގްރެސްގެ ބައިވެރިންގެ އިއްތިފާގުން ކަމަށެވެ. އެހެން ނަމަވެސް މީޑިއާ ނުވައްދާ ކޮންގްރެސް ބާއްވާތީ އެކަން ކަށަވަރު ކުރެވޭ ގޮތެއް ނުވި އެވެ.
ޕީޕީއެމްގެ އެ ބޭފުޅުން ވިދާޅުވާ "އާދަޔާ ޚިލާފު" މި ކޮންގްރެސްގެ މި ދަންފަޅިއަށް އެއްވެސް މީޑިއާއެއް ވައްދާފައެއް ނުވެއެވެ. އެ ޕާޓީން ބުނެފައިވަނީ މީޑިއާއަށް ވަދެވޭނީ މިރޭ ބާއްވާ ނިންމުމުގެ ރަސްމިއްޔާތަށް ކަމަށެވެ، އެހެން ކަމުން މި ކޮންގްރެސްގައި ހިނގާ ކަންތައްތައް ގާތުން ޚަބަރުތައް ގެނެސްދެވޭނެ އެއްވެސް ގޮތެއް މީޑިއާ ތަކަކަށް ނެތެވެ. ހަމަ އެކަނި ފެންނަމުންދަނީ ފޭސްބުކް އަދި ޓްވިޓާގައި ޝެއަރ ކުރަމުން ގެންދަވާ ފޮޓޯތަކާއި އެބޭފުޅުން އާންމު ކުރައްވާ ޚަބަރުތަކެވެ،