ޕީޕީއެމްގެ "އާދަޔާ ހިލާފު" ކޮންގްރެސްގައި ހޮވާލެވުނު 4 ނައީބު ރައީސުންގެ ނަންތައް އެ ޕާޓީން ހާމަކުރައްވައިފިއެވެ.
މީޑިއާ ނުވައްދައި، ދަރުބާރުގޭގައި ބާއްވާ މި ކޮންގްރެސްގައި ޕީޕިއެމްގެ ރައީސްގެ މަގާމުގެ އިތުރުން ނައިބު ރައީސުންގެ މަގާމަށް ކުރިމަތިލެއްވީ، މިހާރު ވެސް އެ ޕާޓީގެ ނައިބު ރައީސުން ކަމަށްވާ އަބްދުއްރަހީމް އަބްދުﷲ އާއި ޓޫރިޒަމް މިނިސްޓަރު މޫސާ ޒަމީރުގެ އިތުރުން އިކޮނޮމިކް މިނިސްޓަރު މުހައްމަދު ސައީދާއި ފިޝަރީޒް މިނިސްޓަރު މުހައްމަދު ޝައިނީ އަދި ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރެވެ.
މީގެ ތެރެއިން، ހަތަރު ނައިބު ރައީސުންނަށް އިންތިޚާބުވެވަޑައިގަތީ އަބްދުއްރަހީމް (234 ވޯޓު) އާއި ޒަމީރު (220 ވޯޓު) އަދި ސައީދު (168 ވޯޓު) އެވެ. އާޒިމާ، ނައިބު ރައީސަކަށް ކަނޑައެޅީ އެ މަގާމަށް ކުރިމަތިލެއްވި ހަމައެކަނި އަންހެން ބޭފުޅާގެ ހައިސިއްޔަތުން، ވޯޓަކާ ނުލަ އެވެ.
މިނިސްޓަރު ޝައިނީ، ޕީޕީއެމްގެ ނައިބު ރައީސްގެ މަގާމުގެ އިންތިޚާބުން ކެޓީ 140 ވޯޓާ އެކު އެވެ.
ޕީޕީއެމްގެ ކޮންގްރެސްއަށް މީޑިއާ ނުވައްދާ އެ ބޭފުޅުން ދަނީ ކޮންގްރެސްގެ ފޮޓޯތަކާއި އަޕްޑޭޓްތައް ޕީޕީއެމްގެ ރަސްމީ ޓްވިޓާ އެކައުންޓްގައި ހިއްސާ ކުރައްވަމުންނެވެ.