ނޮވެންބަރު 17 އިން ފެށިގެން ޕީޕީއެމުން މަސައްކަތް ކުރަނީ އިދިކޮޅު ސިޔާސީ ޕާޓީއެއް ގޮތަށް ކަމަށް އެޕާޓީގެ ކޮންގްރެސްއިން ފާސްކޮށްފިއެވެ.
މިކަން ބަޔާން ކޮށްފައިވަނީ ޕީޕީއެމްގެ ގައުމީ ޖަލްސާ ނިންމުމުގެ ރަސްމިއްޔާތުގައި އެޕާޓީން ހުށަހެޅުއްވި ބަޔާނެއްގައެވެ.
ޕީޕީއެމްގެ ނައިބް ރައީސް އާޒިމާ ޝަކޫރު ހުށަހެޅުއްވި ގަރާރުގައި ބުނެފައި ވަނީ ދިވެހިރާއްޖޭގެ ޖުމްހޫރިއްޔާ ގާނޫނު އަސާސީގެ 107 ވަނަ މާއްދާ ގައި ކަނޑައަޅައި ބަޔާންކޮށްފައިވާ ގޮތަށް، 17 ނޮވެންބަރު 2013 ވަނަ ދުވަހު ފެށުނު ރިޔާސީ ދައުރު ހަމަވެ, 17 ނޮވެންބަރު 2018ގައި އާ ރިޔާސީ ދައުރެއް ފެށޭނެ ކަމަށާއި އެ ދުވަހުން ފެށިގެން ޕީޕީއެމް ރަސްމީ އިދިކޮޅު ޕާޓީއެއް ގޮތުގައި ހަމަޖެހި، މިޕާޓީގެ ރައީސް އަބްދުﷲ ޔާމީން އަބްދުލްގައްޔޫމް ދިވެހި ގައުމާއި، ރައްޔިތުންގެ ހައްގުގައި އެންމެ ފުރިހަމައަށް ވަކާލާތު ކުރައްވާނެ އިދިކޮޅު ލީޑަރު ކަމަށް ހަމަޖެހިގެން ދާނެ ކަމަށެވެ.
މި ގަރާރު ފާސްކުރުމަށް އިއުތިރާޒުކުރި އެއްވެސް މެމްބަރަކު ކޮންގްރެސްގައި ނެތް ކަމަށް މައުލޫމާތު ލިބެއެވެ.
ރައްޔިތުންނާއި ގައުމަށް ކުޑަ ވެސް ގެއްލުމެއް ދިނުމަށް ފުރުސަތު ނުދޭނެ ކަމަށް އާޒިމާ ވަނީ ވިދާޅުވެފައެވެ. ޕީޕީއެމުން މަސައްކަތް ކުރާނީ އަމާންކަމާއި، ސުލްހަމަސަލަސްކަމާއެކު ކަމަށް ވެސް އޭނާ ވިދާޅުވިއެވެ. އަދި ސަރުކާރުން ކުރާ ކަންކަމަށް ފާރަވެރިވެ ސަރުކާރު ޖަވާބުދާރީ ކުރުމަށް މަސައްކަތް ކުރާނެ ކަމަށް ވެސް އޭނާ ވަނީ ވިދާޅުވެފައެވެ.
ރިޔާސީ އިންތިޚާބު ކާމިޔާބު ކުރެއްވި ކޯލިޝަން ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ރަނިންމޭޓް ފައިސަލް ނަސީމު ދިވެހި ގައުމާއި ދިވެހި ރައްޔިތުންގެ ހައްގުގައި މަސައްކަތް ކޮށްދެއްވުމަށް އާޒިމާ އިލްތިމާސްކުރެއްވެވި އެވެ.
"ޕާޓީ އުފެދިގެން އައިސް މިއަދާ ހަމައަށް އައިރު ހޯދާފައިވާ ކާމިޔާބީތަކަކީ މިޕާޓީގެ މެންބަރުން ނުގުޑާ ފަދަ އަޒުމާގައި ތިބެ، ހިތްވަރުން ހޯދުނު ކާމިޔާބީތަކެއް" އާޒިމާ ވިދާޅުވިއެވެ.
އާޒިމާ ވިދާޅުވީ ޕީޕީއެމްގެ ސަރުކާރުގައި ރާއްޖޭގެ މަގުތައް އަމާންވެ، ކުޑަކުދިންނާއި ދުވަސްވީ މީހުންނާއި ނުކުޅެދުންތެރިކަން ހުންނަ ފަރާތްތަކާއި ހިމެނޭ ގޮތަށް ދިވެހި ރައްޔިތުންގެ ކަންކަން ފަސޭހަވެފައިވާ ކަމަށެވެ. އަދި ޒުވާނުންނާއި އަންހެނުން ބާރުވެ، އިގްތިސާދީ ދުވެލި ހަލުހިވެ އިޖްތިމާއި ހަމަޖެހުން ގާއިމް ކުރެވި ތަރައްގީ ކުރެވިފައިވާ ކަމަށެވެ.
އެހެން ނަމަވެސް އިދިކޮޅު ފަރާތްތަކުންނާއި އާންމު ރައްޔިތުންގެ ގިނަ ބަޔަކު ގަބޫލު ކުރަނީ ރައީސް ޔާމީންގެ 5 އަހަރުގެ ވެރިކަމުގައި ރާއްޖޭގެ މަގުތައް ނާމާންވެ، މާރާމާރީ ހިންގުން އިތުރުވެ، ގިނަ ބައެއްގެ ފުރާނަތައް ގެއްލި ބަޔަކު ގެއްލި ހޯދާ އަދި އަދަށްވެސް ފެނިފައި ނުވާ ކަމަށެވެ. މިކަން ކަމަށް ސަރުކާރުން ގެނެވުނު އެއްވެސް ހައްލެއް ފެންނާކަށް ނެތެވެ. ހޯއްދަވައިދެއްވުނު އެއްވެސް އިންސާފެއް ނެތެވެ.
އާޒިމާ ވިދާޅުވީ ޕީޕީއެމްގެ ސަރުކާރުން ކޮށްދެއްވި މަސައްކަތް 960000 އަށްވުރެ ގިނަ ރައްޔިތުން ގަބޫލުކޮށްފައިވާ ކަމަށާއި، ރިޔާސީ އިންތިޚާބުގައި މިލިބުނު ނަތީޖާއަކީ ވެސް ކުރިއެރުމެއް ކަމަށެވެ. އަދި ކުރިއަށް އޮތްތާގައި ޕާޓީއަށް މެންބަރުން ގިނަ ވާނެ ކަމަށް ވެސް އާޒިމާ ވިދާޅުވިއެވެ.