އިލެކްޝަންސް ކޮމިޝަނުގެ ރަސްމީ ޓްވިޓަރ އެކައުންޓް ހެކްކޮށްފައިވާ ކަމަށް އެކޮމިޝަނުން ބުނެފިއެވެ.
އިލެކްޝަންސް ކޮމިޝަނުގެ ރަސްމީ ޓްވިޓަރ އެކައުންޓް ހެކްކޮށްފައިވާ ކަމަށް ބުނެފައި މިވަނީ އާދީޢްތަ ދުވަހު ބޭއްވި ރިޔާސީ އިންތިހާބުގެ ރަސްމީ ނަތީޖާ އިލެކްޝަންސް ކޮމިޝަނުން އެންޑޯޒް ކޮށްފައިވާ ކަމަށާއި ދާއިމީ ނަތީޖާއާއި ވަގުތީ ނަތީޖާއާއި ފަރަގެއް ނެތްކަމަށް ބުނެ ޓްވީޓް ކުރިތާ ގިނައިރުތަކެއް ނުވަނީސް އެވެ.
ނަމަވެސް އޭގެ ކުޑައިރުކޮޅެއްފަހުން އެޓްވިޓްވަނީ ޑިލީޓްކޮށްފައެވެ.
އިލެކްޝަންސް ކޮމިޝަނުގެ މެމްބަރު އަހުމަދު އަކްރަމް ވިދާޅުވީ އީސީގެ ރަސްމީ ޓްވިޓަރ އެކައުންޓް ހެކްކޮށްފައިވާކަމަށާއި އެކަން ރަނގަޅު ކުރުމުގެ މަސައްކަތް ކުރަމުން ގެންދާ ކަމުގައެވެ.
އިންތިޚާބުގެ ދާއިމީ ނަތީޖާ މިއަދު 10:30 އިއުލާން ކުރައްވާނެ ކަމަށް އީސީން ވަނީ ބުނެފައެވެ. އީސީން ވަނީ ނަތީޖާ ގުނާ ނިމިފައިވާ ކަމަށާއި މާބޮޑު ބަދަލެއް ނަތީޖާއަށް އައިސްފައިނުވާ ކަމަށް ބުނެފައެވެ.
ނަތީޖާ އިއުލާން ކުރުމަށް ހަމަޖެހިފައިވަނީ އީސީން ބާއްވާ ޕްރެސް ކޮންފަރެންސް އެއްގައެވެ.
އިލެކްޝަންސް ކޮމިޝަނުން ދާއިމީ ނަތީޖާ އެންޑޯޒް ކުރެއްވުމާއި ގުޅިގެން ގިނަ ބަޔަކު ދިޔައީ ދާއިމީ ނަތީޖާ އިއުލާން ކުރުން އަވަސް ކުރުމަށް ގޮވާލަމުންނެވެ. ކުރިން ނަތީޖާ އިއުލާން ކުރުން އާދީއްތަ ދުވަހަށް އޮތް ނަމަވެސް މިހާރު ވަނީ މިއަދަށް ބަދަލު ކުރައްވާފައެވެ.