ރައީސް އަބްދުﷲ ޔާމީން އާއި ސިޔާސީ ގޮތުން ޚިޔާލު ތަފާތުވެ ވަޑައިގެންނެވި ހިސާބުން ޖަލުގައި ބަންދުކޮށްފައިވާ ކުރީގެ ރައީސް މައުމޫން އަބްދުލްގައްޔޫމާއި އެމަނިކުފާނުގެ ދަރިކަލުން ފާރިސް މައުމޫން މިނިވަން ކުރުމަކީ ރައީސް ޔާމީން އެންމެ ހިތްދަތިވާނެ ކަންތައް ކަމުގައި ގަލޮޅު ދެކުނު ދާއިރާގެ މެންބަރު އަހްމަދް މަހްލޫފް ވިދާޅުވެއްޖެއެވެ.
މަހްލޫފް މިހެން ވިދާޅުވެފައި ވާއިރު، އުމުރުފުޅުން 83 އަހަރުވެފައިވާ ރައީސް މައުމޫން ގޭބަންދަށް ބަދަލުކުރުމަށް ކަރެކްޝަނަލް ސާވިސްގެ މެޑިކަލް ބޯޑުން ވަނީ ނިންމާފައެވެ.
އެހެން ނަމަވެސް ވަކި ސަބަބެއް އެންގުމެއް ނެތި އެ ނިންމުން ތަންފީޒު ކުރުން ކަރެކްޝަންސް އިން ވަނީ މަޑު ޖައްސާލާފައެވެ.
އެކަމާއި ގުޅިގެން ކަރެކްޝަނަލް ސާވިސްގެ ކޮމިޝަނާ އޮފް ޕްރިޒަން އަހުމަދު ޝިހާންގެ މައްސަލަ ތަހުގީގުކޮށް ދިނުމަށް އެދި ކުރީގެ ރައީސް މައުމޫނުގެ ގާނޫނީ ވަކީލުންގެ ފަރާތުން ވަނީ ފުލުސް އޮފީހަށް ވެސް ހުށަހަޅާފައެވެ.
މަހްލޫފްގެ ޓްވީޓްގައި ވިދާޅުވެފައި ވަނީ "ގޮޅި މަރާމާތު ކުރުމަށް ކަމަށް ބުނެ ނަމަވެސް ސިޔާސި ހައްޔަރީން ގޭބަންދަށް ބަދަލުކުރުމަށް ޝިހާން އަށް ގޮވާލާ" ކަމަށެވެ.