އިނގިރޭސި ޕްރިމިއާ ލީގުގައި މިއަދު ވެސްޓްހޭމް ޔުނައިޓެޑާ ދެކޮޅަށް ކުޅެ މެންޗެސްޓަރ ޔުނައިޓެޑް ބަލިވެ އެޓީމުގެ ކޯޗް ހޯސޭ މޮރީނިއޯ އަށް ހާސްކަމާއި ކުރިމަތިލާން ޖެހިއްޖެއެވެ. މިމެޗުން ވެސްޓްހޭމް މޮޅުވީ 3-1 އިންނެވެ.
މިއީ ޔުނައިޓެޑާ ދެކޮޅަށް ވެސްޓްހޭމް އެންމެފަހުން ކުޅުނު 20 މެޗުގެ ތެރެއިން މޮޅުވި ފުރަތަމަ ފަހަރެވެ. އަދި، މިއީ ޔުނައިޓެޑް އެންމެފަހުން ކުޅުނު ތިން މެޗުގެ ތެރެއިން މޮޅުނުވެ ނިންމާލަން ޖެހުނު ތިންވަނަ މެޗެވެ.
ލަންޑަން ސްޓޭޑިއަމްގައި ކުޅުނު މިމެޗު ފެށިގެން ފަސްވަނަ މިނެޓުގައި ވެސްޓްހޭމަށް ލީޑް ނަގައިދިނީ ބްރެޒިލްގެ ފެލިއްޕޭ އެންޑަސަން އެވެ. މިއީ ވެސްޓްހޭމްގެ އާޖެންޓީނާ ފުލްބެކް ޕަބްލޯ ޒަބަލޭޓާ ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ.
މިހާފުގައި ޔުނައިޓެޑަށް ލިބުނު އެންމެ ރަނގަޅު ފުރުޞަތު، މެޗުގެ 22 ވަނަ މިނެޓުގައި ބެލްޖިއަމްގެ ފޯވާޑް ރޮމެލޫ ލުކާކޫ ބޮލުން ފޮނުވާލުމުން ގޯލްގެ ދަނޑީގައިޖެހިފައިވެއެވެ.
ފުރަތަމަ ހާފު ނިމެން ދެމިނެޓަށްވެފައިވަނިކޮށް، ޔުނައިޓެޑްގެ ޑިފެންޑަރު ވިކްޓަ ލިންޑެލޯފް އަތުން ބައިކޮޅަށް ވަން ގޯލަކުން ވެސްޓްހޭމް ވަނީ ދެލަނޑުގެ ލީޑެއް ނަގައިފައެވެ. މިއީ އެޓީމުގެ އަންދްރެއި ޔާމޮލެންކޯ ފޮނުވާލި ހަމަލާއެއް ޔުނައިޓެޑްގެ ލިންޑެލޯފްގެ ގައިގަ ޖެހިފައި ބޯޅައިގެ މިސްރާބު ބަދަލުވެގެން ވަން ގޯލެކެވެ. މިހާފު ނިމުނީ 2-0 އިން ވެސްޓްހޭމް ކުރީގައިއޮވެގެންނެވެ.
ދެވަނަ ހާފު ފެށިގެން، ޔުނައިޓެޑަށް ލިބުނު އެންމެ ރަނގަޅު ފުރުޞަތުގައި މެޗުގެ 66 ވަނަ މިނެޓުގައި އެޓީމުގެ ކެޕްޓަން އޭޝްލީ ޔަންގް ނަގައިދިން ހުރަހަކުން މަރުއާން ފެލައިނީ ބޮލުން ފޮނުވާލި ބޯޅަ ވެސްޓްހޭމްގެ ގޯލްކީޕަރު ލޫކަސް ފަބިއާންސްކީ ވަނީ ގޯލަށް ވަނަނުދީ ސަލާމަތްކޮށްފައެވެ.
މިމެޗުގައި ޔުނައިޓެޑުން ޖެހި ހަމައެކަނި ލަނޑު، މެޗުގެ 71 ވަނަ މިނެޓުގައި ކާމިޔާބުކޮށްދިނީ މިހާފުގައި ކުޅެން ނިކުތް އިނގިރޭސި ފޯވާޑް މާކަސް ރަޝްފޯޑް އެވެ. މިއީ އެޓީމުގެ ފުލްބެކް ލޫކް ޝޯ ނަގައިދިން ހުރަހަކުން ލިބުނު ބޯޅަ އެއް ވަރަށް ރީއްޗަށް ގޯލްގެތެރެއަށް ވައްދާލައިގެން އޭނާ ކާމިޔާބުކުރި ރީތި ގޯލެކެވެ.
އޭގެ ތިން މިނެޓުފަހުން، މާކޯ އާނައުޓޮވިޗް ވަނީ ވެސްޓްހޭމަށް އަލުން ދެލަނޑުގެ ލީޑް ހޯދައިދީ އެޓީމަށް ތިން ޕޮއިންޓް ކަށަވަރުކޮށްދީފައެވެ. މިއީ އެޓީމުގެ ކެޕްޓަން މާކް ނޯބަލް ދިން ވަރަށް ރީތި ޕާހަކުން އާނައުޓޮވިޗް ކާމިޔާބުކުރި ގޯލެކެވެ.
އޭގެފަހުން، ޔުނައިޓެޑްގެ ސްކޮޓް މެކްޓޮމިނޭ އަށް ލިބުނު ފުރުޞަތެއްގައި ޕެނަލްޓީއޭރިޔާ ބޭރުން ފޮނުވާލި ހަމަލާއެއް ވެސްޓްހޭމްގެ ކީޕަރު ފަބިއާންސްކީ ވަނީ މަތަކޮށްފައެވެ.
މިމެޗުން މޮޅުވެ ވެސްޓްހޭމް ވަނީ 7 ޕޮއިންޓާއެކު ލީގު ތާވަލްގެ 12 ވަނަ އަށް ޖެހިލައިފައެވެ. މިމެޗުން ބަލިވި ޔުނައިޓެޑް އަދިވެސް އޮތީ 10 ޕޮއިންޓާއެކު 10 ވަނައިގައެވެ.