ޖެންޑާ މިނިސްޓްރީން އާންމު ކޮށްފައިވާ ތަފާސް ހިސާބު ދައްކާ ގޮތުން މިދިޔަ މަހު އެ މިނިސްޓްރީއަށް 193 މައްސަލައެއް ހުށަހެޅިފައިވެއެވެ.
އޭގެ ތެރެއިން 89 މައްސަލަ އަކީ ކުޑަކުދިންނަށް ކުރާ އަނިޔާތަކާއި ގުޅިގެން ހުށަހެޅުނު މައްސަލަތައް ކަމަށް އެ ހިސާބުތަކުން ދައްކައެވެ. އެއީ ހުށަހެޅުނު މައްސަލަތަކުގެ 46 ޕަސެންޓު މައްސަލަ އެވެ.
ކުޑަކުދިންނަށް ކުރާ އަނިޔާގެ ތެރެއިން އެންމެ ގިނައިން ހުށަހަޅާފައިވަނީ ޖިންސީ އަނިޔާގެ މައްސަލަތަކެވެ. އެބާވަތުގެ 26 މައްސަލަ ހުށަހަޅާފައިވެއެވެ. އެއްމަސް ދުވަސްތެރޭ އެ އަދަދަށް ޖިންސީ އަނިޔާގެ މައްސަލަ ހުށަހެޅިފައިވުމުން އެނގިގެންދަނީ އެ ފަދަ މައްސަލަތައް މިމުޖުތަމައުގައި ގިނަވަމުންދާ ކަމެވެ. މި ބާވަތުގެ މައްސަލަތަކުގެ އިތުރުން ޖިސްމާނީ ހާނީއްކައިގެ 20 މައްސަލަ އާއި އިހުމާލުވުމުގެ 18 މައްސަލައިގެ އިތުރުން ނަފްސާނީ ހާނީއްކައިގެ 8 މައްސަލަ ހުށަހެޅިފައިވެއެވެ.
އޭގެ އިތުރުން ނަހަމަ ގޮތުގައި އިންޓަނެޓް ބޭނުންކުރުމުގެ 6 މައްސަލައަކާއި އެހެން ކުދިންގެ ފަރާތުން އިންޓަރނެޓް މެދުވެރިކޮށް ގަނާލިބުމުގެ 4 މައްސަލަ އަދި އެހެން ކުދިންގެ ފަރާތުން ގަނާލިބުމުގެ އަދި ފުރައްސާރައިގެ ޝިކާރައަކަށްވުމުގެ 4 މައްސަލަ ހުށަހެޅިފައިވެއެވެ. ގެވެށި އަނިޔާ ކުރާތަން ދެއްކުން ނުވަތަ ފެނުމުގެ 2 މައްސަލަ އަދި ނަހަމަ ގޮތުގައި ވިޔަފާރި ފައިދާއަށް ބޭނުންކުރުމުގެ 1 މައްސަލަ ހިމެނެއެވެ.
ޖެންޑާ މިނިސްޓްރީއަށް ހުށަހެޅުނު އިތުރު މައްސަލަތަކުގެ ތެރޭގައި ޙައްޤުތަކުން ކުޑަކުދިން މަޙްރޫމުކުރުމުގެ 2 މައްސަލަ މިދިޔަ މަހު ހުށަހަޅާފައިވެއެވެ. އެއީ ތަޢުލީމަށް ހުރަސް އެޅުމުގެ 2 މައްސަލައެވެ.
ޢާއިލީ މައްސަލަތަކަށް ބަލާއިރު 29 މައްސަލަ މިދިޔަ މަހު މިނިސްޓްރީއަށް ވަނީ ހުށަހަޅައިފައެވެ. މިއީ އޮގަސްޓު 2018ގައި ރިޕޯޓުކޮށްފައިވާ މައްސަލަތަކުގެ ޖުމުލަ 15 އިންސައްތަ ކަމަށް އެ މިނިސްޓްރީން ބުނެއެވެ. މި ފަދަ މައްސަލަތަކުގެ ތެރޭގައި ޙަޟާނާ ނުވަތަ ކުދިންނާ ބައްދަލުނުކުރެވޭ 21 މައްސަލައާއި ކުދިން ބެލުމުގައި ދިމާވާ 6 މައްސަލަ އަދި ދަރިންގެ ޚަރަދު ދިނުމުގައި ދިމާވާ 2 މައްސަލަ ހިމެނެއެވެ.