ޑިސިޕްލިނަރީ މައްސަލައެއް ބެލުމަށް ފަހު، ފުލުހުންގެ ވަޒީފާ އިން ވަކިކުރަން ނިންމާފައި ހުރި އެސިސްޓެންޓް ކޮމިޝަނާ އޮފް ޕޮލިސް، އަބްދުލް މަންނާން ޔޫސުފް އަލުން ފުލުހުންގެ ވަޒީފާ އަށް ނުކުތުމުގެ ހުއްދަ މިދިޔަ ހަފުތާގައި ދީފި އެވެ.
ފުލުހުންގެ ޑިސިޕްލިނަރީ ބޯޑުން މަންނާނު ފުލުހުންގެ ވަޒީފާ އިން ވަކިކުރަން ނިންމާފައިވަނީ މިދިޔަ މޭ މަހުއެވެ. އެއީ ސިއްރު މައުލޫމާތުތަކެއް ހިއްސާ ކުރަން ނުޖެހޭ މީހަކާ ހިއްސާކުރި މައްސަލައިގަ އެވެ.
މަންނާނަކީ ކުރީގެ ކޮމިޝަނާ އޮފް ޕޮލިސް އަބްދުﷲ ރިޔާޒާއި އަހުމަދު އަރީފާ ގާތް ގުޅުމެއް އޮންނަ ބޭފުޅެކެވެ. އެކެއް ފެބްރުއަރީގައި ސުޕްރީމް ކޯޓުން ނެރުނު އަމުރަށް ފަހު ހިނގައި ދިޔަ ކަންތައްތަކަށް ފަހު މަންނާނު ހުރީ އެއްވެސް ޒިންމާއެއް ހަވާލުނުކޮށް ބަހައްޓާފަ އެވެ.
މަންނާނު ވަޒީފާ އިން ވަކިކުރަން ނިންމި މަންނާނުގެ ފަރާތުން ވަނީ މައްސަލަ ފުލުހުންގެ އިސްތިއުނާފު ބޯޑު ކަމަށްވާ އެޕީލް ބޯޑަށް ހުށަހަޅާފައެވެ. އެ ބޯޑުން ނިންމީ ޑިސިޕްލިނަރީ ބޯޑުގެ ނިންމުން އަލުން މުރާޖައާ ކުރުމަށެވެ.
މިދިޔަ ހޯމަ ދުވަހުން ފެށިގެން މަންނާނު ވަޒީފާ އަށް ނުކުމެވަޑައިގަންނަވަ އެވެ.