ރައީސް އަބްދުﷲ ޔާމީން އާއި ސިޔާސީ ގޮތުން ޚިޔާލު ތަފާތުވެވަޑައިގެންނެވި ހިސާބުން ޖަލުގައި ބަންދުކޮށްފައިވާ ކުރީގެ ރައީސް މައުމޫން އަބްދުލް ޤައްޔޫމް މިއަދުގެ ވަގުތެއްގައި ގޭބަންދަށް ބަދަލުކުރުމަށް ހަމަޖެހިފައިވާ ކަމުގެ މައުލޫމާތު އިތުބާރު ހުރި ގޮތެއްގައި "އައްޑޫލައިވް" އަށް ލިބިއްޖެއެވެ.
ރައީސް މައުމޫން ގޭބަންދަށް މިއަދު ބަދަލުކުރާއިރު މީގެ ހަފްތާއެއްހާ ދުވަސް ކުރިން ކަރެކްޝަނަލް ސާވިސްގެ މެޑިކަލް ބޯޑުން ވަނީ އެމަނިކުފާނު ގޭބަންދަށް ބަދަލުކުރުމަށް ނިންމާފައެވެ.
އެހެން ނަމަވެސް މިއަދާއި ހަމައަށް ކަރެކްޝަންސް އިން ވަނީ މެޑިކަލް ބޯޑުގެ ނިންމުން ތަންފީޒެއް ނުކުރެއެވެ. އެކަމާއި ގުޅިގެން މައުމޫނުގެ ވަކީލުންގެ ފަރާތުން ވަނީ ކަމިޝަނަރ އޮފް ޕްރިޒަންސްގެ މައްސަލަ ފުލުސް އޮފީހަށް ވެސް ހުށަހަޅާފައެވެ.
އުމުރުފުޅުން 80 އަހަރަށް ވުރެ މައްޗަށް ގޮސްފައިވާ ރައީސް މައުމޫން ގެންދަވަނީ، ބެނައިން ޕްރޮކްސިސިމަލް ޕޮޒިޝަނަލް ވާޓިގޯގެ ބައްޔަށް ފަރުވާ ހޯއްދަވަމުންނެވެ.
ވާޓިގޯ ބައްޔަކީ ކުއްލިއަކަށް ބޯއަނބުރައި ކޮއްޅަށް ހުންނަން ދަތިވެ އަމިއްލަ އަށް އެއްވެސް ކަމެއް ނުކުރެވޭ ހާލަތަށް ދާ ބައްޔެކެވެ.
ވާޓިގޯ ބަލީގައި ރައީސް މައުމޫނަށް ފަރުވާދެމުން އަންނައިރު، އެމަނިކުފާނަށް އަމިއްލަފުޅަށް ތެދުވެވަޑައިގެން، ޒަރޫރީ ބައެއް ކަންކަން ކުރެއްވުމުގައި ދަތިތަކެއް ކުރިމަތިވެވަޑައިގެންފައިވާތީ، ޑޮކްޓަރު ލަފާ ދެއްވީ، މައުމޫން ގޭބަންދަށް ބަދަލުކުރާށެވެ.
އެހެން ނަމަވެސް ރިޔާސީ އިންތިހާބު ރައީސް ޔާމީނަށް ނާކާމިޔާބު ވުމާއި ހަމައަށް ކަރެކްޝަނަލް ސާވިސްގެ މެޑިކަލް ބޯޑުން ވަނީ އެކަމަށް ދެކޮޅު ހަދާފައެވެ.
ރައީސް މައުމޫނު ގޭބަންދަށް ބަދަލުކުރަން ކަރެކްޝަންސްގެ މެޑިކަލް ބޯޑުން ނިންމީ ރިޔާސީ އިންތިހާބަށް ފަހު ކޯޓުތަކުން ސިޔާސީ ފަރާތްތައް ބަންދުން ދޫކުރަން ފެށުމުންނެވެ.