ބައިނަލްއަގުވާމީ ރެޑް ކްރޮސްއާއި ރެޑް ކްރެސެންޓްގެ ހަރަކާތްތަކަށް 150 އަހަރުފުރުން ފާހަގަ ކުރުމުގެ ގޮތުން ރެޑް ކްރެސެންޓްގެ ހުޅުމީދޫ ޔުނިޓްގެ ފަރާތުން ހުޅުމީދޫގައި ރޯޑް ޝޯއެއް ބާއްވައިފި އެވެ.
ހުޅުމީދޫ އެސްޓީއޯ ބިލްޑިން އާ ދިމާއަށް ބޮޑުމަގުގައި ބޭއްވި ރޯޑް ޝޯވްގައި ރެޑްކްރެސެންޓާއި ބެހޭ މައުލޫމާތު ވަނީ އާއްމުންނަށް ދީފި އެވެ.
ހުޅުމީދޫ ޔުނިޓުން އިންތިޒާމް ކުރި މި ރޯޑް ޝޯވް އާއި ބެހޭގޮތުން ޔުނިޓް ބޯޑުން ބުނީ މި ޝޯވް އަކީ ރެޑް ކްރެސެންޓްއަށް ވޮލަންޓިއަރުން ހޯދުމަށާއި، ރެޑް ކްރެސެންޓް ހަރަކާތާއި ގުޅޭ މައުލޫމާތު އާއްމުންނަށް ފޯރު ކޮށްދިނުމަށް ކުރިއަށް ގެންދެވުނު ހަރަކާތެއް ކަމަށެވެ.
އެގޮތުން ރެޑް ކްރެސެންޓުން ކުރިއަށް ގެންދާ "އިންސާނިއްޔަތު ކަމަށްޓަކައި އަހަރެން" މިޝިއާރު އާއްމުންގެ ތެރޭގައި ޕްރޮމޯޓް ކުރުން ހިމެނެ އެވެ.
ރޯޑް ޝޯވްގައި ވަނީ ރެޑް ކްރެސެންޓްގެ މައިގަނޑު 7 އަސާސް އާއި ބެހޭ ގޮތުން އާއްމުންނަށް މައުލޫމާތު ފޯރުކޮށްފައެވެ. އަދި ކުއްލި ހާލަތަށް އިޖާބަ ދިނުމާއި ފުރަތަމަ އެހީގެ ހިދްމަތްތަކާ ބެހޭ މައުލޫމާތު ވެސް ވަނީ ދީފައެ ވެ.
އިއްޔެގެ ރޯޑް ޝޯވްއަށް ވަރަށް ގިނަ ބަޔަކު ހާޒިރުވި އިރު ގިނަ ބަޔަކު ވަނީ ވޮލަންޓިއަރުންގެ ގޮތުގައި ރަޖިސްޓްރީވެފަ އެވެ.