ކުރީގެ ރައީސް މުހައްމަދު ނަޝީދު، ކުރީގެ ޑިފެންސް މިނިސްޓަރ ކާނަލް މުހައްމަދު ނާޒިމް އަދި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲގެ މައްޗަށް އިއްވާފައިވާ ޖަލު ހުކުމާއި މެދު މި ހަފްތާގައި ސުޕްރީމް ކޯޓުން ގޮތެއް ނިންމާނެ ކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
މައުލޫމާތު ލިބިފައިވާ ގޮތުގައި މި ތިން ބޭފުޅުންގެ އިތުރުން ކުރީގެ ޑިފެންސް މިނިސްޓަރު ތޮލްހަތުގެ ޖަލު ހުކުމާއި މެދު ވެސް ސުޕްރީމް ކޯޓުން މިހަފްތާގައި ގޮތެއް ނިންމާނެއެވެ.
ރައީސް ނަޝީދު ޖަލަށް ލާފައިވަނީ އެމަނިކުފާނުގެ މައްޗަށް ޓެރަރިޒަމްގެ ދައުވާ ސާބިތުވާކަމަށް ކަނޑައަޅައި 2015 ވަނަ އަހަރުގެ މާޗް މަހުގެ 13 ވަނަ ދުވަހުއެވެ. އެމަނިކުފާނުގެ މައްޗަށް ޝަރީޢަތް ކުރިއަށް ގެންދިޔައިރު ދައުވާއިން ދިފާޢުވުމުގެ އެއްވެސް ފުރުސަތެއް ދީފައެއް ނުވެއެވެ.
ކުރީގެ ޑިފެންސް މިނިސްޓަރު ކާނަލް ނާޒިމްގެ މައްޗަށް ޖަލު ހުކުމެއް އިއްވީ ހަނގުރާމަވެރި ހަތިޔާރު ގެންގުޅުނު ކަމުގެ ކުށުގައެވެ. އެ މައްސަލައިގައި ކަންހިނގާފައިވާ ގޮތަށް ބަލާއިރު، ޖިނާއީ މައްސަލަތަކުގައި އާއްމުގޮތެއްގައި އަމަލުކުރާ ގޮތާއި މުޅިން ޚިލާފަށެވެ.
އަދި މީގެ އިތުރުން ޝެއިޚް އިމްރާން ޖަލަށް ލާފައިވަނީ، މޭޑޭ މުޒާހަރާގައި ދެއްކެވި ވާހަކަތަކާއި ގުޅިގެންނެވެ. އިމްރާންގެ ޝަރީޢަތް ވެސް ފެށުމާއި އެކުހެން މައްސަލަ ބައްލަވާ ގާޒީ "ގޮތެއް ނިންމަވައިގެން ހުރިކަމަށް" ވިދާޅުވެފައިވެއެވެ.