ޔޫއެފާ ޗެމްޕިއަންސް ލީގުގެ ގްރޫޕް ޖީ ގައި މާދަމާ ރޭ ރަށުން ބޭރުގައި ރަޝިޔާގެ ސީއެސްކޭއޭ މޮސްކޯ އާ ދެކޮޅަށް އެންމެފަހުގެ ޗެމްޕިއަން ރެއާލް މެޑްރިޑް ކުޅުމަށް ހަމަޖެހިފައިވާ މެޗުގައި އަނިޔާގެ ސަބަބުން އެޓީމުގެ ވޭލްޝް ވިންގާ ގަރެތު ބޭލް އަށް ނުކުޅެވޭނެއެވެ.
ބޭލްގެ ފައިގެ ފަލަމަސްގަނޑަށް އަނިޔާވެފައިވަނީ ލީގުގައި މިދިޔަ ހޮނިހިރު ދުވަހު، އެތުލެޓިކޯ މެޑްރިޑާ ދެކޮޅަށް ރެއާލް ކުޅުނު މެޗުގައެވެ.
ރެއާލް ދޫކޮށް ޔުވެންޓަސް އަށް ބަދަލުވި ކްރިސްޓިއާނޯ ރޮނާލްޑޯ ނެތްތަން ފޫބެއްދުމުގެ އެންމެ ބޮޑު މަސްއޫލިއްޔަތު އެޅިފައިވާ ބޭލް ވަނީ މިސީޒަނުގައި މިހާތަނަށް ކުޅުނު 8 މެޗުގައި ހަތަރު ގޯލް ކާމިޔާބުކޮށް އިތުރު ތިން ލަނޑު ޖެހުމަށް އެހީތެރިވެދީފައެވެ.
ބޭލް ނެތުމުން ރެއާލްގެ ފޯވާޑްލައިންގައި މާދަމާ ރޭ ކަރީމް ބެންޒެމާ އަދި މާކޯ އަސެންސިއޯ އާއެކުގައި ހަރަކާތްތެރިވާނެކަމަށް ބެލެވެނީ ލޫކަސް ވަޒްކޭޒް އެވެ. މީގެއިތުރުން، މަރިއާނޯ ޑިއާޒް އާއި ވިނީޝިއަސް ޖޫނިއަރ އަށް ކުޅުމުގެ ފުރުޞަތު ދިނުމަކީ ވެސް އެކަށީގެންވާ ކަމެކެވެ.
މޮސްކޯ އާ ދެކޮޅަށް ރެއާލް ކުޅުމަށް ހަމަޖެހިފައިވާ މެޗުގައި އަނިޔާގެ ސަބަބުން އެޓިމުގެ ކެޕްޓަން ސާޖިއޯ ރާމޯސްގެ އިތުރުން މާސެލޯ އަދި އިސްކޯ އަށް ވެސް ނުކުޅެވޭނެއެވެ.
މޮސްކޯގައި މާދަމާ ރޭ ރެއާލް ކުޅުމަށް ހަމަޖެހިފައިވާ މިމެޗު ފަށާނީ މާލޭގަޑިން 00:00 ގައެވެ.