އައްޑޫއާއި މާލެ އަތޮޅާ ދެމެދަށް ގަދަވަޔާއެކު ބޯކޮށް ވާރޭވެހި ގުގުރާނެ ކަމަށް މޫސުމާއި ބެހޭ ގައުމީ އިދާރާއިން ބުނެފިއެވެ.
ރާއްޖެއަށް މިހާރު ކުރަމުންދާ ވިއްސާރައާއި ގުޅިގެން މޫސުމާއި ބެހޭ ގައުމީ އިދާރާއިން ވަނީ މިއަދު ކ އަތޮޅަށާއި ތ އަތޮޅާ ދެމެދަށް ޔެލޯ ޔެލޯ އެލާޓު ނެރެފައެވެ. އެ އިދާރާއިން ވަނީ އެ ސަރަހައްދަށް ގަދަވަޔާއެކު ހުއްޓާ ނުލާ ބޯކޮށް ވާރޭވެހޭނެ ކަމަށާއި ގުގުރުން ވެސް އެކަށީގެންވާ ކަމަށް ބުނެފައެވެ.
އޭގެ އިތުރުން ކ އަތޮޅަށާއި ސ އަތޮޅާއި ދެމެދުގެ ރަށަރަކަށް ފަތިހު 05:15 އިން 11:15 ގެ ނިޔަލަށް ވަނީ ވައިޓް އެލާޓް ނެރެފައެވެ. އަދި އެ ސަރަހައްދަށް ގަދަވަޔާއެކު ބޯކޮށް ވާރޭވެހި ގުގުރުން ވެސް އެކަށީގެންވާ ކަމަށް މޫސުމާއިބެހޭ އިދާރާ ބުނެއެވެ.
ރާއްޖޭގެ އެކިހިސާބަށް ވިއްސާރަކުރާނެ ކަމަށާއި ގުގުރުންވެސް އެކަށީގެންވާ ކަމަށް މެޓް އޮފީހުން މައުލޫމާތު ދެއެވެ. އަދި ބައެއް ރަށްތަކަށް ބޯކޮށް ވާރޭވެހޭނެ ކަމަށްވެސް ލަފާކުރެވޭ ކަމަށް އެ އިދާރާއިން ބުނެއެވެ.
ވައިޖެހޭނީ ހުޅަނގާއި ހުޅަނގު އުތުރުން ދެކުނާއި މެދުތެރޭގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ކަމަށާއި އުތުރުގެ އަތޮޅުތަކަށް ގަޑިއަކު 08 މޭލާ 18 މޭލާ ދެމެދުގެ ބާރުމިނުގައި އަދި ވިލާގަނޑުގައި ގަޑިއަކު ގާތްގަޑަކަށް 45 މޭލަށް ވައިގަދަވާނެ ކަމަށް ލަފާކުރެވޭ ކަމަށް މޫސުމާއިބެހޭ އިދާރާއިން ވަނީ ބުނެފައެވެ.
މޫސުމާއިބެހޭ ގައުމީ އިދާރާއިން ބުނިގޮތުގައި ދެކުނާއި މެދުތެރޭގެ ކަނޑުތައް ގަދަވާނެއެވެ. އަދި އުތުރުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެއެވެ.
އެ އިދާރާއިން ވަނީ ހާއްސަކޮށް ކަނޑުދަތުރު ކުރައްވާ ފަރާތްތަކުން މޫސުމަށް ސަމާލުވުމަށް އިލްތިމާސް ކޮށްފައެވެ.