ބޮލީވުޑްގެ މަޝްހޫރު ފިލްމީ ތަރި ރަންބީރް ކަޕޫރްގެ މާމަ އަދި ފިލްމު އުފެއްދުންތެރިއެއް ކަމަށްވާ ރާޖް ކަޕޫރުގެ އަންހެނުން ކްރިޝްނާ ރާޖް ކަޕޫރު 87 އަހަރުގައި މިއަދު މަރުވެއްޖެއެވެ.
ރިޕޯޓްތައް ބުނާ ގޮތުން އޭނާ މި ދުނިޔެއަށް އަލްވަދާއު ކިޔާފައިވަނީ ރޭ ފަތިހު 4 ޖަހާކަންހާއިރުއެވެ. ކްރިޝްނާގެ މާމަ ދަރިއެއް ކަމަށްވާ ރިދިމާ ކަޕޫރު ސަހްނީ ވަނީ އޭނާގެ މާމަގެ ފޮޓޯއެއް ހިއްސާކޮށް މި ހަބަރު ކަށަވަރު ކޮށްދީފައެވެ. އިންސްޓަގްރާމް ފޯސްޓްގައި ރިދިމާ ވަނީ އޭނާގެ މާމަ ދެކެ ލޯބިވާ ކަމަށާއި އަބަދުވެސް ލޯބިވާނެ ކަމަށް ބުނެފައެވެ.
ރާޖް ކަޕޫރުއާއި ކްރިޝްނާ ކައިވެނި ކޮށްފައިވަނީ 1946 ވަނަ އަހަރު މޭ މަހުގައެވެ. ދެމަފިރިންގެ ކައިވެންޏަށް 5 ކުދިން ވަނީ ލިބިފައެވެ. އެއީ ރަންދީރް ކަޕޫރް، ރިޝީ ކަޕޫރް، ރާޖިވް ކަޕޫރް އަދި ދެ އަންހެން ދަރިން ކަމަށްވާ ރީތޫ ނަންދާ އަދި ރިމީ ޖެއިން އެވެ.
ބޮލީވުޑްގެ ގިނަ އަދަދެއްގެ ތަރިންނާއި ކަމުވޮށިގެންވާ ފަރާތްތަކުން ދަނީ އެ އާއިލާއަށް ޓްވިޓާ އަދި އިންސްޓަގްރާމް މެދުވެރިކޮށް ތައުޒިޔާ ކިޔަމުންނެވެ.