އަންނަ އަހަރު ބާއްވާ ރައްޔިތުން މަޖިލީސް އިންތިހާބުގެ އިދާރީ ދާއިރާތައް ކަނޑައެޅިފައިވާ ގޮތުގެ ވަގުތީ ރިޕޯޓު އިލެކްޝަން ކޮމިޝަން (އީސީ) އިން މިއަދު ނެރެފި އެވެ.
އީސީ އިން މިއަދު ނެރުނު ރިޕޯޓުގައި ބުނެފައިވާ ގޮތުގައި އަންނަ އަހަރު ބާއްވާ ރައްޔިތުން މަޖިލީހުގެ އިންތިހާބުގައި، އިންތިޚާބު ކުރަންޖެހޭ ގޮނޑީގެ އަދަދު ކަނޑައަޅާފައިވަނީ މިދިޔަ މެއި މަަހު 31 ވަނަ ދުވަހުގެ ނިޔަލަށް ރަޖިސްޓްރީ ކޮށްފައިވާ އާބާދީއަށް ރިއާޔަތް ކުރުމަށް ފަހުގައެވެ. އެގޮތުން އަންނަ އަހަރު ބާއްވާ ރައްޔިތުން މަޖިލީހުގެ އިންތިހާބުގައި ޖުމުލަ 87 ގޮނޑިއަށް މެންބަރުން އިންތިހާބު ކުރަން ޖެހޭ ކަމަށް އެ ރިޕޯޓްގައި ބުނެފައިވެއެވެ. މިހާރު މި ހިނގާ 18 ވަނަ ރައްޔިތުންގެ މަޖިލީހުގައި އިންތިހާބުކޮށްފައި ވަނީ 85 މެންބަރުންނެވެ. އީސީ އިން ބުނީ އިދާރީ ދާއިރާތައް ބެހުމަށް މުރާޖައާ ކުރިއިރު ދާއިރާތަކަށް އައިސްފައިވާ ބަދަލާ ގުޅިގެން ދެ އިންތިހާބީ ދާއިރާ މާލެ ސިޓީއަށް އިތުރުވެފައިވާ ކަމަށެވެ.
މާލޭގެ އާބާދީގައި 65،000 އަށް ވުރެ ގިނަ މީހުން ހިމެނޭ އިރު އީސީ އިން ބުނީ ގޮނޑި ބަހާފައި ވަނީ ކޮންމެ 4300 އެއްހާ މީހުންނަށް ބަލާފައި ކަމަށެވެ. މީގެ ކުރިން މާލޭގައި އޮންނަނީ 13 ދާއިރާ އެކެވެ. އީސީ އިން ބުނީ އެ އަދަދު މުރާޖާ ކުރުމަށް ފަހު ފަހުން ދާއިމީ ރިޕޯޓު ނެރޭނެ ކަމަށެވެ.
އިދާރީ ދާާއިރާއެއްގައި ރަޖިސްޓްރީ ކޮށްފައިވާ އާބާދީގެ ފުރަތަމަ 5000 މީހަކަށް ނުވަތަ އެ އަދަދަށް މީހުން ހަމަނުވާ ދާއިރާއަކަށް ދެ މެންބަރުން ކަނޑައަޅަން ޖެހެ އެވެ. އަދި ދާއިރާގައި ރަޖިސްޓްރީ ކޮށްފައިވާ އާބާދީ 5000 އަށް ވުރެ އިތުރު ވާނަމަ އިތުރުވާ ކޮންމެ 5000 އަކަށް މެންބަރަކު ކަނޑައަޅަން ޖެހެ އެވެ.