ސިޔާސީ ފަސް ބޭފުޅަކާއި ރައީސް މައުމޫންގެ ބޮޑީގާޑުގެ ޕާސްޕޯޓް އިމިގްރޭޝަނުން ދޫކޮށްލައިފިއެވެ.
ކޯޓު އަމުރާއެކު ޕާސްޕޯޓް ހިފަހައްޓާފައިވާ ފަރާތްތަކުގެ ތެރެއިން އިއްޔެ ދޫކޮށްލާފައިވަނީ، ދިއްގަރު ދާއިރާގެ މެންބަރު އަހުމަދު ފާރިސް މައުމޫނާއި ކުރީގެ ކޮމިޝަނަރ އޮފް ޕޮލިސް އަހުމަދު އަރީފާއި ކުރީގެ ރައީސް މައުމޫންގެ ބޮޑީގާޑު މުހައްމަދު އަޒްމީ އާއި މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާން އާއި ރައީސް މައުމޫންގެ ދަރިކަނބަލުން ޔުމްނާ މައުމޫނުގެ އިތުރުން ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ޕާސްޕޯޓް ކަމަށް އިމިގްރޭޝަނުން ވަނީ ބުނެފައެވެ.
ފާރިސް އާއި ގާސިމްގެ ޕާސްޕޯޓް ދޫކޮށްލާފައިވާއިރު ކަފާލާތުގެ ދަށުން އާދިއްތަ ދުވަހުގެ ރޭ ވަނީ ދެ ބޭފުޅުން ވަނީ ދޫކޮށްލާފައެވެ. ސުޕްރީމް ކޯޓުން ފެބްރުއަރީ އެއްވަނަ ދުވަހު ނެރުނު އަމުރަށް ފަހު ޓެރަރިޒަމްގެ ދައުވާ އުފުލާފައިވާ ސިނާން ވަނީ މިދިޔަ ސެޕްޓެމްބަރުގެ 24 ވަނަ ދުވަހު ކްރިމިނަލް ކޯޓުން ދޫކޮށްލާފައެވެ. ސިނާން މިނިވަންކޮށްފައިވަނީ ޝަރީއަތް ނިމެންދެން ބަންދުގައި ބަހައްޓަން އެކޯޓުން ކުރިން ނިންމާފައިވާ ނިންމުން ރިވިއު ކުރަން އެދުމުންނެވެ.
ކަފާލާތުގެ ދަށުން ގާސިމް އިބްރާހީމް ދޫކޮށްލުވުމުން އެ މަނިކުފާނު ވިދާޅުވީ، އަންނަ ބުދަދުވަހު ރާއްޖެ ވަޑައިގަންނަވާ ކަމަށެވެ. އަރިހުގައި ޖުމްހޫރީ ޕާޓީގެ ރައީސް އަލީ ވަހީދާއި، އެމަނިކުފާނުގެ ސިޔާސީ މުޝީރު އަދި ކުރީގެ ނާއިބް ރައީސް ޑރ. މުހަންމަދު ޖަމީލު އަހްމަދާއި، ޖޭޕީގެ މެމްބަރ ޑރ. ޝާހު މާހިރުވެސް ރާއްޖެ ވަޑައިގަންނަވާނެ ކަމަށް ވެސް ގާސިމް ވިދާޅުވިއެވެ.