އީއައިއޭ ވެސް ނަހަދައި އަދި ޑިޒައިން ކުރުމެއް ވެސް ނެތި ކައުންސިލާއި ރައްޔިތުންގެ ބަހެއް ވެސް ނުހޯދައި ހިތަދޫގެ އިތުރު މަގުތަކެއް ހަދަން ނިންމައި އެ މަސައްކަތް ފަށާފައިވާތީ އެއީ ގާނޫނާއި ގަވައިދާ ހިލާފަށް ކުރާ ކަމެއް ކަމަށް ބުނެ އެކަން ހުއްޓުވުމުގެ ކޯޓް އަމުރަކަށް އެދި މިއަދު ކޯޓަށް ހުށަހަޅާނެ ކަމަށް އައްޑޫ ސިޓީ ކައުންސިލުން ބުނެފި އެވެ.
މޭޔަރު އަބްދުﷲ ސޯދިގް (ސޯބެ) ވިދާޅުވީ ތާރު އަޅައިގެން މިވަގުތަށް ހެދުން އެހާ މުހިއްމު ވެސް ނޫން މަގުތަކެއް ހަދަން ނިންމައި އެ މަސައްކަތް ފަށާފައި ވަނީ ސަދަން ޔުޓިލިޓީޒް ލިމިޓެޑް (އެސްޔޫއެލް) އަށާއި ސަރުކާރުގެ ކަމާ ބެހޭ މުއައްސަސާތަކަށް އިއްޔެ ސިޓީއެއް ވެސް ފޮނުވާފައިވާ ކަމަށެވެ.
"އަޅުގަނޑުމެން މި އުޅެނީ ކޮންމެހެން މަގު ހަދާތީ އެކަން ހުއްޓުވާކަށް ނޫން. މަގު ހެދުމަކީ އަޅުގަނޑުމެން ވެސް މަރުހަބާ ކިޔާ ކަމެއް. އެކަމަކު އެކަން ކުރަން ވާނީ ރާއްޖޭގައި ހެދިފައި ހުރި ގާނޫނާއި ގަވައިދުތަކާ އެއްގޮތަށް،" ސޯބެ ވިދާޅުވި އެވެ. "އީއައިއޭއެއް ނަހަދާ. ޑިޒައިނެއް ނެތް. މަގުގައި ޕޭވްމަންޓް ހަދާނެ ގޮތެއް އަދި ސިންކްޕިޓް ބަހައްޓާނެ ދުރު މިނެއް މިކަހަލަ އެއްވެސް ކަމެއް ބެލުމެއް ނެތި ހަމަ ނުކުމެ ތިބެގެން މަސައްކަތް ކުރުމަކީ ގަބޫލް ކުރެވޭނެ ކަމެއް ނޫން."
ސޯބެ ވިދާޅުވީ ރައްޔިތުން ހޮވާފައިވާ ކައުންސިލެއް އައްޑޫގައި އޮތް އިރު، މިފަދަ މަޝްރޫއެއް ކުރިއަށް ގެންދާ ނަމަ ކައުންސިލާ މަޝްވަރާކޮށް ހިޔާލު ހޯދަން ޖެހޭނެ ކަމަށެވެ. އަދި ރައްޔިތުންގެ ބަހެއް ވެސް މިކަމުގައި ހޯދަން ޖެހޭނެ ކަމަށް އޭނާ ވިދާޅުވި އެވެ.
ހިތަދޫގެ އިތުރު މަގުތަކެއްގައި ތާރު އަަޅައިގެން ހެދުމަށް މިދިޔަ ބުދަ ދުވަހު ހަވާލު ކުރީ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އާ އެވެ. އެގޮތުން މި އަހަރު ނިންމަން ކަނޑަައަޅާފައިވާ ފުރަތަމަ ފިޔަވަހީގައި 2.3 ކިލޯ މީޓަރު މަގު ހަދާ އިރު ދެވަނަ ފިޔަވަހީގައި 2.8 ކިލޯ މީޓަރު މަގު ހަދަން ވަނީ ނިންމާފަ އެވެ.