އިނގިރޭސިވިލާތުގައި ދިރިއުޅުއްވާ އަދި ސ. ހިތަދު އަށް ނިސްބަތްވެވަޑައިގަންނަވާ މަޝްހޫރު ޕްރޮފެސަރު ހަސަން އުގެއިލްގެ މަންމަ އަވަހާރަވެއްޖެ އެވެ.
"އައްޑޫ ލައިވް" އަށް އެނގިފައިވާ ގޮތުގައި އުގެއިލްގެ މަންމަ ހިތަދޫ ވެސްޓް ބްރީޒް މަރިޔަންފާން އަވަހާރަވީ އާލާސްކަންފުޅާ އުޅުއްވާތާ ގިނަ ދުވަސްތަކެއް ފަހުން ރޭގެ ވަގުތެއްގައި މާލޭގަ އެވެ. އަދި މައްޔިތާގެ ހަށިގަނޑު މިއަދު ހެނދުނުގެ ވަގުތެއްގައި އައްޑު އަށް ވަނީ ގެނެސްފަ އެެވެ.
އައްޑޫ ރައްޔިތުން އެ ބޭފުޅަކަށްޓަކައި ފަހުރުވެރިވާ އުގެއިލްއަކީ ސައިންސްގެ ރޮނގުން އެންމެ ފުރަތަމަ ޕްރޮފެސަރަކަށް ވެވަޑައިގެންނެވި ދިވެހި އިލްމުވެރިޔާ އެވެ. އަދި ޕްރޮފެސަރު އުގެއިލް އަކީ ރާއްޖޭގެ އެންމެ މަޝްހޫރު އެއް އިލްމުވެރިޔާ އެވެ.
އޭނާ މިހާރު މަސައްކަތް ކުރައްވަނީ ސިމިއުލޭޝަން ބޭސްޑް ޑިޒައިން ނުވަތަ ހިސާބު އިލްމާއި، ކޮމްޕިއުޓަ އިލްމު އެކުވެގެން އެއްޗެހި އީޖާދުކުރުމުގެ ދާއިރާގަ އެވެ. އޭނާ އީޖާދުކުރެއްވި ހަތަރު އުފެއްދުމެއް އެމެރިކާ އާއި ޔޫރަޕްގައި ވަނީ ރަޖިސްޓްރީކޮށްފަ އެވެ. އޭނާ ގެންދަވަނީ އެމެރިކާގެ ޖައްވީ އިދާރާ ނާސާގެ ބައެއް މަޝްރޫއުތަކަށް ވެސް އެހީތެރިވެދެއްވަމުންނެވެ.
އޭނާ މިހާރު ހުންނެވީ އިނގިރޭސިވިލާތުގެ ބްރެޑްފޮޑް ޔުނިވަސިޓީގެ ވިޝުއަލް ކޮމްޕިއުޓިން ސެންޓަރުގެ ޑިރެކްޓަރުގެ މަގާމުގަ އެވެ.