ސުޕްރީމް ކޯޓަށް އިލްތިމާސް ކުރުމުގެ ހުއްދައަށް އެދި ހުށަހަޅާ މައްސަލަތަކުގައި އިޖުރާއީ އަޑުއެހުމެއް ބާއްވަން ނިންމައިފި ނަމަ 3 ފަނޑިޔާރުންގެ މަޖިލީހަކު ވެސް އެ މައްސަލަތަކުގައި ގޮތް ނިންމޭނެ ކަމަށް އެކޯޓުން ކަނޑައަޅައިފިއެވެ.
ސުޕްރީމް ކޯޓުން މިގޮތަށް ކަނޑައަޅާފައި ވަނީ، ރޭގެ ވަގުތެއްގައި ނެރުނު "ދިވެހިރާއްޖޭގެ ސުޕްރީމް ކޯޓަށް އިލްތިމާސް ކުރުމުގެ ހުއްދައަށް އެދި ހުށަހެޅޭ މައްސަލަތަކުގައި އިޖުރާއީ އަޑުއެހުން ބޭއްވުމުގައި ޢަމަލުކުރާނެ ގޮތުގެ އުޞޫލު" ގައެވެ.
ސުޕްރީމް ކޯޓުން ނެރުނު އުސޫލުގައި ބުނެފައިވާ ގޮތުގައި، އިލްތިމާސް ކުރުމުގެ ހުއްދައަށް އެދޭ މައްސަލަތަކުގައި ފަނޑިޔާރުންގެ މަޖިލީހުން އެހެން ގޮތަކަށް ކަނޑަނާޅާހާ ހިނދަކު، އެ އިޖުރާއީ އަޑުއެހުން ބާއްވާނީ މަދުވެގެން ސުޕްރީމް ކޯޓުގެ 3 ފަނޑިޔާރުންގެ މަޖިލީހަކުން ކަމަށެވެ.
ރޭގެ ވަގުތެއްގައި ސުޕްރީމް ކޯޓުން މިފަދަ އުސޫލެއް ނެރުނު އިރު، ކެލާ ދާއިރާގެ މެންބަރު އަލީ އާރިފު ވަނީ ރިޔާސީ އިންތިހާބު "އޮޅުވާލާފައިވާ" ކަމަށް ތުހުމަތުކޮށް ސުޕްރީމް ކޯޓަށް ގޮސްގެން ނަމަވެސް ހައްގުތައް ހިމާޔަތް ކުރަން ޕީޕީއެމުން ބޭނުންވާ ކަމަށް ވިދާޅުވެފައެވެ.