ރިޔާސީ އިންތިހާބަށް ނުފޫޒު ފޯރުވާފައިވާކަން އެނގޭ ކަންތައްތަކެއް އެބަހުރި ކަމަށާއި އެހެންވެ ސުޕްރީމް ކޯޓަށް ގޮސްގެން ނަމަވެސް ހައްގުތައް ހޯދަން ޕީޕީއެމުން ބޭނުންވާ ކަމަށް އެޕާޓީން ބުނެފިއެވެ.
ރިޔާސީ އިންތިހާބަށް ނުފޫޒޫ ފޯރުވާފައިވާތީ ސުޕްރީމް ކޯޓަށް ދާނެ ކަމަށް ވިދާޅުވީ، ކެލާ ދާއިރާގެ ޕީޕީއެމްގެ މެމްބަރު އަލީ އާރިފެވެ.
"ވޯޓު އޮޅުވާލައިފި" ކަމަށް ބުނެ ގާތްގަނޑަކަށް 50 އެއްހާ މީހުންނާއި އެކު ޕީޕީއެމުން ރޭ ބޭއްވި ކުޑަ އެއްވުމުގެ ތެރެއިން މީޑިޔާއަކަށް ދެއްވި އިންޓަވިއުގައި އަލީ އާރިފު ވިދާޅުވީ، ދެފުށް ފެންނަ އިންތިޚާބެއް އަލުން ނުބާއްވާ ނަމަ ރައްޔިތުންގެ ޝުއޫރުތައް ނުހުއްޓޭނެ ކަމަށެވެ.
އިންތިހާބަށް ނުފޫޒު ފޯރުވި ކަމަށް ޕީޕީއެމުން ތުހުމަތުކުރާއިރު ރިޔާސީ އިންތިހާބުގެ އޮފިޝަލުންގެ ގޮތުގައި ވެސް ބޭތިއްބީ ސީދާ ޕީޕީއެމްގެ އޮފީސްތަކުން ފޮނުވި ލިސްޓުތަކުގައިވާ މީހުންނެވެ.
އަދި އިލެކްޝަންސް ކޮމިޝަނުގެ ރައީސަށް އައްޔަންކޮށްފައި ވަނީ ވެސް ރައީސް ޔާމީންގެ ކެމްޕެއިންގައި އެންމެ އިސްކޮށް އުޅުއްވި، އަދި އެމަނިކުފާނުގެ ސަރުކާރުގައި ސިޔާސީ މަގާމުތައް އަދާކުރެއްވި އަހްމަދް ޝަރީފެވެ.
އެހެން ނަމަވެސް އިންތިހާބުގައި ނާކާމިޔާބުވި ހިސާބުން ޕީޕީއެމުން ދަނީ ޝަރީފަށް ފާޑުކިޔަމުންނެވެ.