ރިޔާސީ އިންތިހާބުގެ ނަތީޖާ އާއި މެދު ސުވާލު އުފައްދަވައި އިލެކްޝަންސް ކޮމިޝަނުން ކޮށްފައިވާ "ހަޑިމުޑުދާރު ކަންކަން" އެ ކޮމިޝަނުން ސާފުކޮށްދެއްވަން ޖެހޭނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން މިހެން ވިދާޅުވީ، ރިޔާސީ އިންތިހާބުގެ ވޯޓު އޮޅުވާލާފައިވާކަމަށް ބުނެ ރޭ މާލޭގައި ޕީޕިއެމް ފަރާތުން މަދު ބަޔަކާއި އެކު ބޭއްވި އެއްވުމުގައި ވާހަކަ ދައްކަވަމުންނެވެ.
ޕީޕީއެމްގެ މަޖިލިސް މެންބަރުންގެ މެޖޯރިޓީ އާއި އެކު އިލެކްޝަންސް ކޮމިޝަނަށް އައްޔަން ކުރި އެކޮމިޝަނުގެ ރައީސް ޝަރީފް އާއި އެހެން މެންބަރުންގެ މިނިވަންކަމާއި މެދު ޕީޕީއެމުން ސުވާލު އުފައްދާފައި މިވަނީ، ސޯޝަލް މީޑިޔާގައި ދައުރުވަމުންދާ އޯޑިއޯ އަކާއި ގުޅިގެންނެވެ. އެހެން ނަމަވެސް ޝަރީފު ވިދާޅުވެފައި ވަނީ އެއީ އެޑިޓްކޮށްފައިވާ އޯޑިއޯ އެއް ކަމަށެވެ.
ރޭގެ އެއްވުމުގައި ރައީސް ޔާމީން ވިދާޅުވީ، ރިޔާސީ އިންތިޚާބުގައި ރައްޔިތުން އެމަނިކުފާނަށް ދިނީ 96000 ވޯޓް ކަމަށް މިއަދު ގަބޫލު ނުކުރެއްވޭ ކަމަށެވެ.
"ހަމަ ހަގީގަތުގައި ވެސް އަޅުގަނޑަށް ގަބޫލު ކުރެވޭ މިއަށް ވުރެ ގިނައިންނޭ އަޅުގަނޑަށް ވޯޓް ލިބޭނީ." ރައީސް ޔާމީން ވިދާޅުވިއެވެ.
މީގެ އިތުރުން ރައީސް ޔާމީން ވަނީ އިލެކްޝަންސް ކޮމިޝަނުގެ މެންބަރުންގެ މައްޗަށް ޕީޕީއެމުން ތުހުމަތު ކުރާ މައްސަލައިގައި ވަކި ގޮތަކަށް ޖަވާބު ދޭން ޖެހެންދެން މުޒާހަރާ ކުރިއަށް ގެންދަން ގޮވާލައްވާފައެވެ.