ރިޔާސީ އިންތިހާބަށް އައްޑޫ ސިޓީ ހިތަދޫގައި ބެހެއްޓި ވޯޓު ފޮށިތަކުގެ ކައިރީގައި ތިބި އޮފިޝަލުންނަށް ޕީޕީއެމްގެ އޮފީހުން ގުޅައި ވަކި ގޮތަކަށް އަމަލުކުރަން އެންގި ކަމަށް އެ އޮފިޝަލުން ބުނެފިއެވެ.
'އައްޑޫލައިވް' އާއި ވާހަކަ ދައްކަމުން ހިތަދޫ އުތުރު ދާއިރާގެ ވޯޓު ފޮއްޓެއް ކައިރީގައި އޮފިޝަލެއްގެ ގޮތުގައި ހަރަކާތްތެރިވި ފަރާތަކުން ބުނީ، ވޯޓުލުމުގެ އެއް ދުވަސް ކުރިން ޕީޕީއެމް އޮފީހުން އޭނާއަށް ގުޅި ކަމަށެވެ.
"ޕީޕީއެމް އޮފީހުން ގުޅާފައި ބުނީ މީޓިން އަކަށޭ. ރޭގަނޑު 11 އަށް މީޓިން އަށް ކިޔާފައި ވަނީ، އެހާ ލަސްގަޑިއެއްގައި ނުދެވޭނެ އޭ ބުނުމުން، ވަރަށް މުހިއްމޭ ކިޔާފައި ބުނީ ވޯޓާސް ރަޖިސްޓްރީ ބާރަށް ނުކިޔުމަށް.އަދި ވޯޓުގެ ހުރިހާ ކަމެއް ވެސް ލަހުން ކުރިއަށް ގެންދިއުމަށް" ވޯޓިން ސްޓޭޝަނެއްގައި އޮފިޝަލެއްގެ ގޮތުގައި ހަރަކާތްތެރިވި ފަރާތުން ބުންޏެވެ.
އޭނާ އިތުރަށް ބުނިގޮތުގައި ޕީޕީއެމް އޮފީހުން ގުޅިފަހުން އިލެކްޝަންސް އިން ވެސް ގުޅާފައި ވޯޓު ފޮށި ބަދަލުކުރުމަށް ބައެއް އޮފިޝަލުންނަށް އެންގި ކަމަށެވެ. އެހެން ނަމަވެސް ގިނަ އޮފިޝަލުން އެގޮތަށް ނުރުހުމުން އެކަން ކުރެވިފައި ނުވާ ކަމަށެވެ.
ހިތަދޫ އުތުރު ދާއިރާގެ ވޯޓު ފޮށިތަކުން އިދިކޮޅު ކެންޑިޑޭޓް އިބްރާހިމް މުހައްމަދު ސޯލިހަށް ލިބުނު ވޯޓުތަކެއް ވެސް ވަނީ ބާތިލްކޮށްފައި ކަމަށް 'އައްޑޫލައިވް' އާއި ވާހަކަ ދެއްކި ފަރާތުން ވަނީ ބުނެފައެވެ.
'އައްޑޫލައިވް' އާއި ވާހަކަ ދެއްކި ފަރާތުން ވަނީ މީޓިން އަށް އައުމަށް އަންގައި ގުޅި ފަރާތުގެ މައުލޫމާތު ހިއްސާކޮށްފައެވެ. އެހެން ނަމަވެސް ޚިޔާލު ފާޅުކުރުމާއި އަބުރު ރައްކާތެރިކުރުމުގެ ގާނޫނު އޮތްގޮތުން އެފަރާތުގެ ބަހެއް ނުލިބޭތީ އެމައުލޫމާތު ހިއްސާކުރެވޭކަށް ނެތެވެ.
ވޯޓިން ސްޓޭޝަންތަކުގައި ހަރަކާތްތެރިވި އޮފިޝަލުންނަށް ގުޅާފައިވަނީ، ސަރުކާރުގެ ކުންފުންޏެއްގެ އިސް މަގާމެއް އަދާކުރާ އައްޑޫއަށް ނިސްބަތްވާ މުވައްޒަފެކެވެ.