ޔޫއެފާ ޗެމްޕިއަންސް ލީގުގައި ރޭ ކުޅުނު މެޗުގައި ޕައޮލޯ ޑިބާލާ ކާމިޔާބުކުރި ހެޓްރިކުން ޔަންގް ބޯއީސް އަތުން ޔުވެންޓަސް މޮޅުވިއިރު ސީއެސްކޭއޭ މޮސްކޯ އަތުން އެންމެ ފަހުގެ ޗެމްޕިއަން ރެއާލް މެޑްރިޑް ބަލިވެއްޖެއެވެ.
ސަސްޕެންޝަނުގެ ސަބަބުން ކްރިސްޓިއާނޯ ރޮނާލްޑޯ އާ ނުލައި ޔުވެންޓަސް ކުޅުނު މެޗުން އެޓީމު 3-0 އިން މޮޅުވިއިރު މޮސްކޯ އަތުން ރެއާލް ބަލިވީ 1-0 އިންނެވެ.
ޔުވެންޓަސްގެ އެލިއާންޒް ސްޓޭޑިއަމްގައި ކުޅުނު މެޗުގެ ފުރަތަމަ ހާފުގައި އެޓީމުން ވަނީ ދެ ގޯލް ކާމިޔާބުކޮށްފައެވެ. އެގޮތުން، ޔުވެންޓަސްގެ ފުރަތަމަ ލަނޑު، މެޗު ފެށިގެން ފަސްވަނަ މިނެޓުގައި ޖަހައިދިނީ ޑިބާލާ އެވެ. މިއީ އެޓީމުގެ ޑިފެންޑަރު ލިއޮނާޑޯ ބޮނޫޗީ ދިން ބޯޅައެއް ވަރަށް ރީއްޗަށް އެއްފަހަރުން ގޯލްގެ ތެރެއަށް ފޮނުވާލައިގެން އޭނާ ކާމިޔާބުކުރި ގޯލެކެވެ.
ފުރަތަމަ ހާފުގެ 33 ވަނަ މިނެޓުގައި ބްލައިސް މަޓުއިޑީ ތަނަވަސްކުރި ފުރުޞަތަކުން ޑިބާލާ ވަނީ އިތުރު ލަނޑެއްޖަހައި ޔުވެންޓަސް އަށް ދެލަނޑުގެ ލީޑެއް ނަގައިދީފައެވެ. މިހާފު ނިމުނީ 2-0 އިން ޔުވެންޓަސް ކުރީގައިއޮވެގެންނެވެ.
މެޗުގެ 69 ވަނަ މިނެޓުގައި ޔުވެންޓަސްގެ ޑިބާލާ ވަނީ ހެޓްރިކް ފުރިހަމަކޮށް ނަތީޖާ 3-0 އަށް ބަދަލުކޮށްލާފައެވެ. މިއީ އެޓީމުގެ ހުއާން ކުއަޑްރާޑޯ ދިން ބޯޅައަކުން ޑިބާލާ ކާމިޔާބުކުރި ގޯލެކެވެ. މިމެޗުގައި ކާމިޔާބުކުރި ތިން ގޯލާއެކު ޑިބާލާ ވެފައިވަނީ ޗެމްޕިއަންސް ލީގުގައި ޔުވެންޓަސް އަށް ހެޓްރިކް ހަދައިދިން ހަތަރުވަނަ ކުޅުންތެރިޔާ އަށެވެ. މީގެކުރީން، ފިލިއްޕޯ އިންޒާގީ އާއި އަލެސެންދްރޯ ޑެލްޕިއޭރޯގެ އިތުރުން އާތުރޯ ވިޑާލް ވެސް ވަނީ އެޓީމަށް ކުޅެމުން ހެޓްރިކް ހަދާފައެވެ.
އޭގެފަހުން، މެޗުގެ 78 ވަނަ މިނެޓުގައި ޔަންގް ބޯއީސް އަށް އިތުރު މައްސަލަތައް ދިމާވީ ޔުވެންޓަސްގެ ޑިބާލާގެ މޫނުމަތީގައި އުޅަބޮށިން ޖެހުމުން އެޓީމުގެ ކަމަރާ އަށް ދެވަނަ ރީނދޫ ކާޑާއެކު ރަތްކާޑު ދައްކާ ދަނޑުން ފޮނުވާލުމުންނެވެ.
މެޗުގެ ފަހުބައި، 10 ކުޅުންތެރިންނާއެކު ކުޅެމުންދިޔަ ޔަންގް ބޯއީސް ކޮޅަށް އިތުރު ލަނޑެއްޖެހުމުގައި ޔުވެންޓަސް އަށް ވަނީ ނާކާމިޔާބީއާ ކުރިމަތިލާންޖެހިފައެވެ. އެގޮތުން، އެޓީމުގެ ސާމީ ކެދީރާ އާއި މޮއިސޭ ކިއަން ފޮނުވާލި ހަމަލާތައް ގޯލަށް އަމާޒުވާގޮތެއްނުވިއެވެ.
ގްރޫޕް ޖީ ގައި ހިމެނޭ ރެއާލް ރޭ ރަށުން ބޭރުގައި މޮސްކޯ އާ ދެކޮޅަށް ނިކުތީ ފުރަތަމަ އެގާރައަށް ގިނަ ބަދަލުތަކެއް ގެނެސްގެންނެވެ. އެގޮތުން، އެޓީމުގެ ސާޖިއޯ ރާމޯސް އާއި މާސެލޯ އަދި ގަރެތު ބޭލް މިމެޗަށް ނިކުތް ސްކޮޑުގައި ހިމަނާފައިނުވާއިރު ލޫކާ މޮޑްރިޗަށްވެސް ފުރަތަމަ އެގާރައިން ޖާގަ ދީފައެއްނުވެއެވެ.
ރަޝިއާގެ ލުޒްނިކީ ސްޓޭޑިއަމްގައި ކުޅުނު މިމެޗުގައި ފެނިގެންދިޔަ ހަމައެކަނި ގޯލް، ފުރަތަމަ ހާފުގެ ކުރީކޮޅު ކާމިޔާބުކޮށްދިނީ މޮސްކޯގެ ނިކޮލާ ވްލަސިޗް އެވެ. މިއީ ރެއާލްގެ ޖަރުމަން މިޑްފީލްޑަރު ޓޯނީ ކްރޫޒް އަށް ހެދުނު ގޯހެއްގެ ފައިދާނަގައި ވްލަސިޗް ކާމިޔާބުކުރި ގޯލެކެވެ.
މިމެޗުގައި ރެއާލުން ލަނޑުޖެހުމަށް ގިނަ ފުރުޞަތުތަކެއް ތަނަވަސްކޮށްފައިވާއިރު، އެޓީމުގެ ކަސެމީރޯ އާއި ކަރީމް ބެންޒެމާގެ އިތުރުން މަރިއާނޯ ޑިއާޒް އަށް ލިބުނު ފުރުޞަތުތަކުގައި އެ ކުޅުންތެރިން ފޮނުވާލި ހަމަލާތައް ގޯލްގެ ހުރަސްދަނޑިއަށް އަމާޒުވެފައިވެއެވެ.
މިމެޗުގެ އިތުރު ވަގުތުގެ ތެރޭގައި ސީއެސްކޭއޭގެ ގޯލްކީޕަރު އިގޯ އަކިންފީވަށް ވަނީ ދެ ވަނަ ރީނދޫ ކާޑާ އެކު ރަތްކާޑެއް ދައްކައިފަ އެވެ. އޭނާ ވަނީ މި މެޗުގައި މުހިއްމު ސޭވްތަކެއް ވެސް ކޮށްފައެވެ.
މިއީ ޗެމްޕިއަންސް ލީގުގައި އެންމެ ފަހުން ކުޅުނު 30 މެޗުގެ ތެރެއިން ރެއާލަށް ލަނޑެއް ކާމިޔާބުނުކުރެވި ނިންމާލަންޖެހުނު ފުރަތަމަ މެޗެވެ.
މި ގުރޫޕުގައި ހިމެނޭ އިޓަލީގެ އޭއެސް ރޯމާ ވަނީ ރޭ އަމިއްލަ ދަނޑުގައި ކުޅުނު މެޗުގައި 5-0 ގެ ނަތީޖާއަކުން ވިކްޓޯރިއާ ޕްލެޒެން އަތުން މޮޅުވެފައެވެ.