ހިތަދޫ ސަރަހައްދީ ބަނދަރުގައި އެންޓި ކޮރަޕްޝަން ކޮމިޝަން (އެސީސީ)ގެ އޮފިޝަލުން ހަރަކާތްތެރިވަމުން އެބަގެންދެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ހިތަދޫ ޕޯޓްސް ލިމިޓެޑްގެ އޮފީހުގެ އިތުރުން ބަނދަރުގައި އޭސީސީގެ އޮފިޝަލުން ހަރަކާތްތެރިވަމުން ދަނީ އެ ކޮމިޝަނުން ކުރަމުން ގެންދާ ތަހުގީގަކަށް ބޭނުންވާ މައުލޫމާތު ހޯދުމަށެވެ.
އޭސީސީގެ މީޑިއާ އޮފިޝަލް ވިދާޅުވީ އެކަމިޝަނުން މައްސަލަ ބަލާ ތަންތަނުގެ ތަފްސީލު ނުދެއްވާ ކަމަށެވެ.
އޭސީސީން ހިތަދޫ ބަނދަރުގެ މައްސަލަތަކެއް ބަލަމުން އަންނަ އިރު ނިމިގެން ދިޔަ ރިޔާސީ އިންތިހާބަށް އެތަނުގެ 16 މުވައްޒަފަކު ވަޒީފާއަށް ނުނިކުންނަ ގޮތަށް ވަނީ 3 މަސް ދުވަހުގެ މުއްދަތަށް ދޫކޮށްލާފައެވެ. އެމުވައްޒަފުންނަށް މުސާރަ އާއި އެލެވެންސް ހަމަޖައްސާދީފައިވަނީ ގަވާއިދާއި ހިލާފަށްކަމަށް މައުލޫމާތު ލިބެއެވެ.
މީގެ އިތުރުންވެސް ރިޔާސީ އިންތިހާބަށް ދެ ދުވަހަށް ވެފައިވަނިކޮށް އިއްލާން ކުރުމެެއް ނެތި ބައެއް ފަރާތްތަކަށް ވަޒީފާ ހަމަޖައްސާ އެމީހުންނަށް އޮފީސް ޔުނިފޯމް ދިން މައްސަލައެެއް ފެންމަތިވިއެވެ. ވަޒީފާ ލިބުނު މީހަކާއި ހަވާލާދީ ސޯޝަލް މީޑިއާގައި ޕޯސްޓުކޮށްފައިވާ ލިއުމެއްގައި ބުނެފައިވަނީ ވަޒީފާ ހަމަޖެއްސިކަމަށް ބުނެ މުވައްޒަފުން އެޗްޕީއެލްއަށް ގޮސް އިނގިލީގެ ނިޝާން އެޓެންޑެންސްއަށް އެންޓަރ ކުރުމަށް ފަހު ޔުނިފޯމް ދިން ކަމަށެވެ.
އަދި އެމީހުންވެސް ކެމްޕެއިންނަށް ކަމަށް ބުނެ ފޮނުވާލާފައިވަނީ އެނބުރި ސެޕްޓެމްބަރ މަހުގެ 24 ވަނަ ދުވަހު ވަޒީފާއަށް ނިކުންނަ ގޮތަށެވެ. ނަމަވެސް އިންތިހާބް ނާކާމިޔާބު ވުމުން އެމީހުންނަށް އަލުން ވަޒީފާ ނުލިބުނުކަމަށް ބުނެ ސޯޝަލް މީޑިއާގައި ހިއްސާކޮށްފައިވެއެވެ.