ޔޫއެފާ ޗެމްޕިއަންސް ލީގުގެ ގުރޫޕް ސީ ގައި ރޭ ކުޅުނު މެޗުގައި ރެޑް ސްޓަރ ބެލްގްރޭޑް ކޮޅަށް ނޭމާ ކާމިޔާބުކުރި ހެޓްރިކުން ޕީއެސްޖީ އަށް ބޮޑު މޮޅެއް ލިބިއްޖެއެވެ.
ޕީއެސްޖީގެ ޕާކް ޑެސް ޕްރިންސަސް ސްޓޭޑިއަމްގައި ކުޅުނު މިމެޗުން ޕީއެސްޖީ މޮޅުވީ 6-1 އިންނެވެ. މިމެޗުގައި ޕީއެސްޖީއިން ކާމިޔާބުކުރި ހަ ގޯލްގެ ތެރެއިން ނޭމާ ތިން ގޯލް ޖަހައިދިންއިރު އެޑިންސަން ކަވާނީ އާއި އެންހެލް ޑި މާރިއާގެ އިތުރުން ކިލިއަން އެމްބާޕޭ ވެސް ގޯލެއް ކާމިޔާބުކުރިއެވެ.
ޕީއެސްޖީ އަށް މިމެޗު ފެށިގެން މާ ރަނގަޅު ކުޅުމެއް ނުދެއްކުނުނަމަވެސް، 9 ވަނަ މިނެޓުގައި އެޓީމުގެ އެމްބާޕޭ އަށް ލިބުނު ފުރުޞަތެއްގައި ފޮނުވާލި ބޯޅައެއް ހުރަސްދަނޑީގައިޖެހިފައިވެއެވެ.
މެޗުގެ 20 ވަނަ މިނެޓުގައި ޕީއެސްޖީއަށް ލިބުނު ހިލޭޖެހުމަކުން ނޭމާ ލީޑް ނަގައިދިންއިރު، އޭގެ ދެ މިނެޓުފަހުން އެމްބާޕޭ ތަނަވަސްކުރި ފުރުޞަތަކުން ނޭމާ ވަނީ އިތުރު ލަނޑެއްޖަހައި ނަތީޖާ 2-0 އަށް ބަދަލުކޮށްލާފައެވެ. މިއީ، ނޭމާ އެންމެފަހުން ކުޅުނު 40 މެޗުގައި އެޓީމަށް ކާމިޔާބުކޮށްދިން 37 ވަނަ ގޯލެވެ.
ޕީއެސްޖީއިން ވަނީ ފުރަތަމަ ހާފު ނިމުމުގެކުރީން، އިތުރު ދެލަނޑު ކާމިޔާބުކޮށް ހަތަރު ލަނޑުގެ ލީޑެއް ނަގައިފައެވެ. މެޗުގެ 37 ވަނަ މިނެޓުގައި އެޓީމުގެ ތިންވަނަ ލަނޑު ކަވާނީ ޖަހައިދިންއިރު މިހާފު ނިމެން ތިން މިނެޓަށްވެފައިވަނިކޮށް ތޯމަސް މޫނިއޭ ދިން ރީތި ބޯޅައަކުން ޑި މާރިއާ ވަނީ ހަތަރުވަނަ ގޯލް ކާމިޔާބުކޮށްދީފައެވެ. މިމެޗުގެ ފުރަތަމަ ހާފު ނިމުނީ 4-0 އިން ޕީއެސްޖީ ކުރީގައިއޮވެގެންނެވެ.
ޕީއެސްޖީގެ ފަސްވަނަ ގޯލް، މެޗުގެ 70 ވަނަ މިނެޓުގައި އެމްބާޕޭ ޖަހައިދިންއިރު އޭގެ ހަތަރު މިނެޓުފަހުން، ރެޑް ސްޓަރ ބެލްގްރޭޑަށް ސުން ކަނޑުވާލައިދިނީ ލޮރެންޒޯ އެބިސީލިއޯ ދިން ބޯޅައަކުން ޖަރުމަނުގެ މިޑްފީލްޑަރު މާކޯ މެރިން އެވެ.
މެޗުގެ 81 ވަނަ މިނެޓުގައި ލިބުނު ހިލޭޖެހުމަކުން ނޭމާ ވަނީ ޕީއެސްޖީގެ ހަވަނަ ގޯލް ކާމިޔާބުކޮށް އެޓީމަށް ބޮޑު މޮޅެއް ހޯދައިދީފައެވެ.
މި ގުރޫޕުގައި ހިމެނޭ ނަޕޯލީ ވަނީ އަމިއްލަ ދަނޑުގައި 1-0 އިން ލިވަޕޫލްގެ މައްޗަށް ކުރި ހޯދައި، ހަތަރު ޕޮއިންޓާއެކު ތާވަލްގެ އެންމެ ކުރިއަށް ޖެހިލައިފައެވެ. މިމެޗުގައި އެޓީމުން ކާމިޔާބުކުރި ހަމައެކަނި ގޯލް، އެންމެ ފަހު މިނެޓުގައި ޖަހައިދިނީ ލޮރެންޒޯ އިންސީނޭ އެވެ.
މިމުބާރާތުގައި ރޭ ކުޅުނު އެހެން މެޗުތަކަށް ބަލާއިރު، ގްރޫޕް ޑީ ގައި ހިމެނޭ ޝާލްކޭ ވަނީ 1-0 އިން ލޮކޮމޯޓިވް މޮސްކޯ ބަލިކޮށްފައެވެ. މިގުރޫޕުގައި ހިމެނޭ ގަލަތަސާރޭ އަތުން ޕޯޓޯ މޮޅުވީވެސް ހަމަ މި ނަތީޖާއިންނެވެ.