ސުޕްރީމް ކޯޓުން ބުދަ ދުވަހުގެ ރޭ ނެރުނު އަމުރަކުން 12 މެންބަރުންގެ ގޮނޑިއާ މެދު އިލެކްޝަންސް ކޮމިޝަނުން ބުދަ ދުވަހު ނިންމި ނިންމުންތައް ބާތިލްކޮށްފައި ވާތީ، އެ އަމުރަށް ފުރިހަމަޔަށް ބޯލެނބުމަށް އެންމެހާ ސިޔާސީ ޕާޓީތަކަށް އިލެކްޝަން ކޮމިޝަނުން މިރޭ އިލްތިމާސްކޮށްފި އެވެ.
އީސީއިން ބުދަ ދުވަހު ނިންމީ، 12 މެންބަރުންގެ ގޮނޑި ގެއްލިފައިވާ ކަމަށް އެ ކޮމިޝަނުން ނިންމާފައިވާ ނިންމުން ބާތިލްކޮށް، އެ މެންބަރުންގެ ގޮނޑި ގެއްލިފައިވާ ކަމަށް ބުނެ ރައްޔިތުންގެ މަޖިލީހަށް އެންގި އެންގުން އަނބުރާ ގެނައުމަށެވެ. އަދި އެ 12 ދާއިރާގެ ބައި-އިލެކްޝަން ބޭއްވުމުގެ މަސައްކަތްތައް ވެސް އީސީ އިން ވަނީ މަޑު ޖައްސާލާފައެވެ. އެހެން ނަމަވެސް ސުޕްރީމް ކޯޓުން ބުދަ ދުވަހުގެ ރޭ އަމުރެއް ނެރެ ބުނެފައިވަނީ 12 މެންބަރުންގެ ގޮނޑީގެ މައްސަލަ އެ ކޯޓުން ބަލަމުން ދާތީ އެ ކަމާ މެދު އެ ކޯޓުން ހުކުމެއް ކުރަން ދެން އެ މެންބަރުން ޖަލްސާތަކުގައި ބައިވެރި ނުކުރެވޭނެ ކަމަށާއި އީސީގެ ނިންމުންތައް ބާތިލް ކުރާ ކަމަށެވެ.
އެ އަމުރު އެގޮތަށް ނެރުމާ ގުޅިގެން، އީސީ އިން ވަނީ ބުދަ ދުވަހުގެ ރޭ ބަޔާނެއް ނެރެފައެވެ. އެބަޔާނުގައި އީސީއިން ބުނެފައިވަނީ އެ އަމުރުގައިވާ އެންމެހާ ކަންކަމަށް ފުރިހަމައަށް ބޯލަނބައި، އެ ކަންކަން އެމަގުން ހިންގުމުގައި އިލެކްޝަންސް ކޮމިޝަނުގެ ފުރިހަމަ ތާއީދާއި އެއްބާރުލުން ސުޕްރީމް ކޯޓަށާއި ކަމާ ބެހޭ އެންމެހާ މުއައްސަސާތަކަށް ފުރިހަމައަށް ދޭނެ ކަމަށެވެ.
ސިޔާސީ ޕާޓީތަކުގެ ބެލެނިވެރި ފަރާތުގެ ހައިޞިއްޔަތުން، ހުރިހާ ސިޔާސީ ޕާޓީތަކުންނާއި ރައްޔިތުންގެ މަޖިލީހުގެ މެންބަރުން އެ ޢަމުރަށް ބޯލަނބާ ޢަމުރާ އެއްގޮތަށް ޢަމަލުކުރުމަށް އެ ކޮމިޝަނުން ވަނީ އެ ބަޔާނުގައި އިލްތިމާސް ކޮށްފައެވެ.