ދައުލަތުން ދިވެހި ރައްޔިތުން ހަމަހަމަ ކަމާއެކު މައުލޫމާތު ފޯރުކޮށްދޭން އުފައްދާފައިވާ ޕަބްލިކް ސާވިސް މީޑިއާގެ ޗެނަލްތަކުން ރިޔާސީ އިންތިހާބު ގެނެސްދީފައި ވަނީ ވަކި ފަރާތަކަށް ޖެހިގެން ކަމަށް ބްރޯޑްކާސްޓިން ކޮމިޝަނުން ބުނެފިއެވެ.
ބްރޯޑްކާސްޓިން ކޮމިޝަނުން މިއަދު ނެރުނު ރިޕޯޓުގައި ބުނެފައި ވަނީ އިންތިހާބީ ކަންކަމާއި ގުޅިގެން މައުލޫމާތު ހަމަހަމަކަމާއެކު އާއްމުންނަށް ގެނެސްދިނުމުގެ އެންމެ ބޮޑު ޒިންމާއެއް އެޅިފައިވާ ޕަބްލިކް ސާވިސް މީޑިއާގެ ދެ ޗެނަލުންވެސް އެނގިތިބެ، ވަކި ފަރާތަކަށް ޖެހޭ ގޮތަށް ކޮންޓެންޓް ގެނެސްދީފައިވާ ކަމަށެވެ.
"އިންތިހާބީ ކަންކަމާއި ގުޅެ މައުލޫމާތު ގެނެސްދިނުމުގައި ޕަބްލިކް ސާވިސް ބްރޯޑްކާސްޓްކުރާ ދައުލަތުގެ މީޑިއާއަކީ ހާއްސަ މަސްއޫލިއްޔަތެއް އަދާކުރާ ދެ ފަރާތެއްކަން ދެނެ ތިބެ. އިންތިހާބާއިބެހޭ ކަވަރޭޖް ވަކިފަރާތަކަށް ބުރަވުމެއްނެތި ސިޔާސީ ކެންޑިޑޭޓުންގެ މައުލޫމާތު އިންސާފުވެރިކަމާއި ހަމަހަމަ ކަމާއެކު ގެނެސްދިނުމާއި، ވޯޓްލާމީހުން ހޭލުންތެރިކުރުމަށްޓަކައި މައުލޫމާތު ސައްހަކަމާމެދު ދެފުށްފެންނަ ގޮތަށް ގެނެސްދީފައި ނުވާކަން އަޅުގަނޑުމެންގެ މި ދިރާސާއިން ފާހަގަ ކުރެވުނު" ޝަހީބު ވިދާޅުވިއެވެ.
ރިޕޯޓް ހުށަހަޅައި ދެއްވަމުން ކޮމިޝަނުގެ ރައީސް މުހައްމަދު ޝަހީބު ވިދާޅުވީ ޕީއެސްއެމުގެ ޗެނަލްތަކުން އިންތިހާބާއިބެހޭ ކަވަރޭޖް ވަކިފަރާތަކަށް ބުރަވުމެއްނެތި ސިޔާސީ ކެންޑިޑޭޓުންގެ މައުލޫމާތު އިންސާފުވެރިކަމާއި ހަމަހަމަ ކަމާއެކު ގެނެސްދީފައި ނުވާކަމަށެވެ.
ޝަހީބު ވިދާޅުވީ މި ރިޕޯޓް ތައްޔާރުކުރުމަށް ނުވަ ޗެނަލެއްގެ ހުރިހާ ޕްރޮގްރާމެއް މޮނީޓާ ކުރެވުނު ކަމަށެވެ. އަދި ގިނަ ޗެނަލްތަކުން ކޮންޓެންޓު ގެނެސްދީފައި ވަނީ ވަކި ކެންޑިޑޭޓަކަށް ބުރަވާ ގޮތަށް ކަމަށެވެ. ޝަހީބު މިހެން ވިދާޅުވި ނަމަވެސް އިންތިހާބުގެ ތެރޭގައި ވަކި ފަރާތަކަށް ޖެހިގެން އެއްވެސް މީޑިއާއަކަށް ބްރޯޑްކޮމް އިން ނަސޭހަތް ދީފައެއް ނުވެއެވެ.
ދާދި ފަހުން ދައުލަތުގެ މީޑިއާ އެއްގައި ހުންނަންޖެހޭ ގިނަ ސިފަތަކެއް ފާހަގަ ކުރައްވާ އެ ސިފަތައް ރާއްޖޭގެ ދައުލަތުގެ މީޑިއާ ކަމަށްވާ ޕީއެސްއެމްގައި ނެތްކަމަށް ވިދާޅުވެ އެތަނުގެ އެގްޒެކްޓިވް އެޑިޓަރ- ސްޕޯޓްސް ހަފްސީ ޢަބްދުﷲ ވެސް ވަނީ މަގާމުން އިސްތިއުފާދެއްވާފައެވެ.