ކްރިމިނަލް ކޯޓުން ޝަރީއަތް ނިންމި ގޮތުގެ ރިޕޯޓު ނުލިބި އޮތުމުން ރައީސް މައުމޫން އަބްދުލްގައްޔޫމަށް އިއްވާފައިވާ ހުކުމުގެ އިސްތިއުނާފު އަޑުއެހުން މިއަދު ކެންސަލުކޮށްފިއެވެ.
ހުކުމުގެ އިސްތިއުނާފު އަޑުއެހުން ބޭއްވީ މިއަދު 9:15 ގައެވެ. އެ އަޑުއެހުމުގައި ރައީސް މައުމޫންގެ ވަކީލުން ވަނީ މައްސަލަ ނިންމި ގޮތުގެ ރިޕޯޓު ނުލިބޭ ކަމަށާއި އިސްތިއުނާފު ކުރިއަށް ގެންދަން އެ ރިޕޯޓު ވަރަށް މުހިއްމުކަން ފާހަގަ ކުރައްވާފައެވެ.
ވަކީލުން އެގޮތަށް ފާހަގަ ކުރުމުން ހައިކޯޓުގެ ބެންޗުން ބުނީ ރިޕޯޓު ނުދެވި އޮތީ ވަކީލަކު ބަޔާންތަކުގައި ސޮއިނުކޮށް އޮތުމުން ކަމަށެވެ. ބެންޗުން އެހެން އެނގުމުން ރައީސް މައުމޫންގެ ވަކީލުންވަނީ އެބޭފުޅުން ސޮއި ކުރައްވާފައި ކަމަށާއި ވަކީލުން ސޮއި ނުކުރި ނަމަވެސް ގާނޫނު މިހާރު އޮތް ގޮތުން އެއީ މައްސަލައެއް ނޫން ކަމަށް ފާހަގަކޮށްފައެވެ.
ހައިކޯޓުގެ ބެންޗުން ވަނީ މިހާރު އެ ރިޕޯޓު ލިބޭނެ ކަމަށާއި ނުލިބިއްޖެ ނަމަ ހައިކޯޓުން އަޅަން ޖެހޭ ފިޔަވަޅުތައް އަޅާނެ ކަމަށެވެ. މިއަދުގެ އަޑުއެހުން ނިންމާލީ އެ މައްސަލައިގެ އަޑުއެހުމެއް އަންނަ ހަފުތާއަށް ތާވަލު ކުރުމަށްފަހުއެވެ.
ރައީސް މައުމޫން ޖަލަށްލުމަށް ހުކުމްކޮށްފައިވަނީ ފެބުރުއަރީ އެކެއްގެ އަމުރާއި ގުޅިގެން އެމަނިކުފާނު ހައްޔަރު ކުރުމުން ފުލުހުންނަށް ފޯނު ނުދެއްވި މައްސަލާގައެވެ. ފުލުހުން އެތައް ފަހަރެއްގެ މަތިން މަސައްކަތް ކޮށްގެން ވެސް ފޯނު ފެނިފައެއް ނުވެއެވެ.
ޖަލު ހުކުމް ތަންފީޒު ކުރަމުން ގެންދެވި ކުރީގެ ރައީސް އަލްއުސްތާޒު މައުމޫން އަބްދުލްގައްޔޫމް ކަފާލާތުގެ ދަށުން ހައިކޯޓުން ވަނީ މިނިވަން ކޮށްފައެވެ.
މައުމޫން މިނިވަން ކުރެއްވުމަށް ހައިކޯޓުން ނެރުނު އަމުރުގައި ބުނެފައިވަނީ ކަފާލާތުގެ ދަށުން ދޫކޮށްލުމަށް މައުމޫންގެ ފަރާތުން ހުށަހަޅުއްވާފައިވާ ކަންކަމުގެ މައްޗަށާއި، ހުކުމުގެ ބާވަތަށާއި، އަދި މައްސަލައިގެ ވަށައިގެންވާ އެންމެހާ ކަންކަމުގެ މައްޗަށް ރިޔާއަތްކޮށް ހައިކޯޓުން ވަކި ގޮތެއް ކަނޑައަޅަންދެން ކަފާލާތުގެ ދަށުން ދޫކޮށްލުމަށް އަމުރު ކުރާ ކަމަށެވެ.