ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަދި ޕީޕީއެމް ޕީޖީ ގްރޫޕް ލީޑަރު އަހުމަދު ނިހާން ހުސެއިން މަނިކަށް މަރުގެ އިންޒާރު ދިން މައްސަލައެއް ފުލުހަށް ހުށަހަޅައިފި އެވެ.
މި މައްސަލައެއް ހުށަހަޅާފައިވާ ކަމަށް ކަށަވަރު ކޮށްދެއްވާފައިވަނީ ޕީޕީއެމްގެ އޮފިޝަލް ޓްވީޓާގައި ކޮށްފައިވާ ޓްވީޓެއްގައެވެ. އެމްޑީޕީ އެކްޓިވިސްޓަކު ނިހާނަށް މަރުގެ އިންޒާރުދިން މައްސަލައެއް މިއަދު ހަވީރު ފުލުހަށް ހުށަހަޅާފައިވާ ކަމަށް ޕީޕީއެމުން ވަނީ ބުނެފައެވެ. އެކަމާ ގުޅިގެން އެމްޑީޕީގެ ލީޑާޝިޕް އިން މާފަށް އެދުމަށްވެސް ޕީޕީއެމުން ގޮވާލާފައި ވެއެވެ.
https://twitter.com/PPM_MDV/status/1047879191809556481
ނިހާނަށް މަރުގެ އިންޒާރު ދީފައިވާއިރު، ރައީސް އޮފީހުގެ ތަރުޖަމާނު އިބްރާހިމް މުއާޒު އަލީއަށް މަރުގެ އިންޒާރުދިން މައްސަލައެއްވެސް ވަނީ އޭނާގެ ފަރާތުން ފުލުހަށް ހުށަހަޅާފަ އެވެ. އޭނާއަށް އިންޒާރު ދީފައިވަނީ ފޭސްބުކް އިން މެސެޖް ކޮށްފައި ކަމަށް މައުލޫމާތު ލިބެއެވެ.
މީގެ އިތުރުން އިލެކްޝަން ކޮމިޝަނު މެންބަރު އަލީ ނަޝާތުގެ އާއިލާއަށް އެކި ފަރާތްތަކުން ބިރު ދައްކަމުން ގެންދާ ކަމަށް އެކޮމިޝަނުން އިއްޔެ ވަނީ ބުނެފަ އެވެ. އަދި އީސީގެ ސެކެރެޓަރީ ޖެނެރަލް ސޮލާހު ރަޝީދަށް ވެސް ވަނީ ބަޔަކު މަރުގެ އިންޒާރު ދީފަ އެވެ. އޭނާއަށް މަރުގެ އިންޒާރު ދީފައިވަނީ މަގުމަތިން ދަނިކޮށް މޫނު ނިވާކޮށްގެން ތިބި ގްރޫޕަކުން އެވެ. މި ދެމައްސަލަ ފުލުހަށް ހުށަހަޅާފައިވާކަމުގެ ޚަބަރެއް އަދި ލިބިފައެއް ނުވެއެވެ.
އޮޅުވާލި ވޯޓުގެ ނަމުގައި ޕީޕީއެމުން ކޮންމެ ރެއަކުވެސް ދަނީ ފަންސާހަކަށް މީހުން ގޮވައިގެން މުޒާހަރާ ކުރަމުންނެވެ.