ސ. ގަމުގެ ވައިގެ ބަނދަރަށް ސްރީ ލަންކަންގެ ބޯޓު ޖެއްސުމަށް މޯލްޑިވިއަން އިން ދެކޮޅު ހަދަނީ އެ އެއާލައިން ބަނގުރޫޓް ވެދާނެތީ ކަމަށްވެ އެވެ. އަދި އެ އެއާ ލައިނަކީ އެތައް ބައެއްގެ ބުރަ މަސައްކަތުން ކޮޅަށް ޖެހި ތަނަކަށް ވާތީ އެވެ.
ގަން އިންޓަނޭޝަނަލް އެއާޕޯޓުން ރާއްޖޭން ބޭރަށް ދެވޭނެ ދުވަހަކީ އައްޑޫ ރައްޔިތުން އެންމެ އުފާވާނެ ދުވަހެވެ. ގަމުގެ އެއާޕޯޓްގެ ވާހަކައަކީ އައްޑޫ މީހުން އެންމެ އަޑު އަހާ ކިޔާ ހަބަރެވެ. ސަބަބަކީ އެތަނާ ދޭތެެރޭ ކުރާ އުއްމީދުތައް ބޮޑުވުމެވެ.
ކުރީގެ ރައީސް މުހައްމަދު ނަޝީދުގެ ސަރުކާރުން ގަމުގެ ވައިގެ ބަނދަރު ތަރައްޤީ ކުރާނެ ވާހަކަ ފެށި ހިސާބުން މިކަމަށް ފޯކަސް ކުރި މީހުން ވަރަށް ގިނަ އެވެ. އެކަމަކު އަބަދުވެސް ކިޔާ އެއް ވާހަކަ އޮވެ އެވެ؛ މާލޭ މީހުން ނޫނީ ސަރުކާރުގައި ތިބޭ ބަޔަކު އައްޑުއަކަށް ހެވެއް ނޭދޭނެ އެވެ.
ގަމުގެ ވައިގެ ބަނދަރު ތަރައްޤީ ނުކޮށް މުޅިން ބަހަނާ ދައްކާނެ ވާހަކަ އެވެ. އަދިވެސް މި ފެންނަނީ އެ މަންޒަރެވެ. އެއީ ގަބޫލް ކުރަން ޖެހޭ އަދި ފެންނަން އޮތް ހަގީގަތެެކެވެ.
ދާދި ފަހުން ގަމުގެ ވީއަޕީ ލައުންޖް ޝަންގްރިއްލާ އާ ހަވާލު ކުރުމަށް ބޭއްވި ރަސްމިއްޔާތުގައި އޭރު ޓްރާންސްޕޯޓް މިނިސްޓްރީ ހިންގެވުމާ ހަވާލުވެ ހުންނެވި ރިޓަޔަޑް މުހައްމަދު ނާޒިމް ގަމުން ލަންކާ އަށް އަވަހަށް ދަތުރުތައް ފެށޭނެ ވާހަކަ އިއުލާން ކުރުމާ ގުޅިގެން ކޮންމެވެސް ވަރެއްގެ އުއްމީދެއް ލިބުނެވެ.
ފަހަރުގައި މޯލްޑިވިއަނުން ވެސް ރައްޔިތުން "ނުރުހޭ ޒާތުގެ" ވާހަކައެއް މި ދައްކަނީ، އައްޑުއަކީ އެ ކުންފުންޏަށް އެންމެ ބޮޑު ފައިދާއެއްވާ ސެކްޓަރަށްވުން ހިމެނެ އެވެ. އެހެން ނުވާންވީ ސަބަބެއް ނެތެވެ. އަބަދު ވެސް އެންމެ ބޮޑު ޓްރެފިކަށް އެ ކުންފުންޏަށް އޮންނަނީ ގަމާއި މާލެ އާ ދޭތެރޭގަ އެވެ.
ހަމަ އެއާ އެކު ގަމުގެ ވައިގެ ބަނދަރު ތަރައްޤީ ކުރަން އުފެއްދި ކުންފުނީގެ އައްޑޫ އިންޓަނެޝަނަލް އެއާޕޯޓް (އޭއައިއޭ) ގެ 30 ޕަސެންޓް ހިއްސާވާ ޗަމްޕާ ހުސައިން އަފީފް ވެސް މި މަަސައްކަތް ކުރަމުން އަންނަ ވާހަކަ ވަނީ އިވިފައެވެ. އަދި ސްރީ ލަންކަންގެ އިސް ވެރިންތަކެއް އައްޑު އަށް ޒިޔާރަތްކޮށް ޝަންގްރިއްލާ އާ އޭއައިއޭގެ އިސް ވެރިންނާ އެކު މިތަނުގެ ވިޔަފާރީގެ ހުރި ފުރުސަތު ބަލާފައިވެ އެވެ.
އެކަމުގައި ސްރީ ލަންކަން އަށް ފެނުނީ އުއްމީދީ މަންޒަރުތަކެކެވެ. ޝަންގްރިއްލާ އިން ބުނީ ރިޒޯޓަށް ޒިޔާރަތް ކުރާ ގިނަ ފަތުރުވެރިންނަކީ ލަންކާގައި މަޑުކޮށްފައި އަންނަ ފަތުރުވެރިން ކަމަށެވެ. އަދި ރިސޯޓަށް ބޭނުންވާ ތަރުކާރީ އާއި މޭވާ ތާޒާކޮށް ގެނައުމަށް ސްރީ ލަންކަން ބޭނުން ކަމަށެވެ.
މި ލަފާގެ މަތިން ހަފުތާއަކު ދެ ފްލައިޓް ބާއްވަން ސްރީ ލަންކަން އިން ވަނީ ސަރުކާރުގައި އެދިފަ އެވެ.
ހަމަ މިއާ އެކު ގަމުގައި ހިންގާ އީކްއޭޓަރ ވިލެޖްގެ އެންމެ ބޮޑު ހާސްކަމަކީ ވެސް މިއެވެ. އެތަނަށް އަންނަ ޓޫރިސްޓުން ވެސް މިހާރު އަންނަން ޖެހެނީ މާލޭ އެއާޕޯޓަށް މަޑުކޮށްފައި ގަމަށް އަންނާށެވެ. ބޭރުން ސީދާ ގަމަަށް އާދެވޭނެ ގޮތެއް ނެތެވެ. އެހެންވެ ޓޫރިސްޓުން އައްޑު އައުމަށް ދަތުރުފަތުރަށް ބޮޑު ހޭދައެއް ކުރަން ޖެހެ އެވެ.
ދެން އޮތީ ގައުމީ އެއާލައިން މޯލްޑިވިއަންގެ ވާހަކަ އެވެ. ފްލައި މީގެ ދަތުރު ފެށުމަށް އިންތިހާ އަށް ދެކޮޅު ހެދި އެވެ. އެކަމަށް އެޅެން އޮތް ހުރަހެއް އެޅި އެވެ. ހަމަ އެ މީހުން ބަނގުރޫޓްވެދާނެތީ އެވެ.
ނަމަވެސް ފްލައި މީގެ ދަތުރުތައް ފެށުމާއި އެކު އަގު ދަށް ކުރި އެވެ. މޯލްޑިވިއަނުން ކޮންޓްރޯލް ކުރަމުން ދިޔަ މޮނޮލީ ގެއްލުނެވެ. ވަތަނިއްޔާ އައުމުން ދިރާގުގެ މޮނޮޕޮލީ ގެއްލި ހިދުމަތުގެ އަގަށް އައި ބޮޑެތި ބަދަލުތަަކާ އެއްގޮތަށެވެ. މީގެ ހުރިހާ ލުއެއް ލިބުނީ ހަމަ ރައްޔިތުންނަށެވެ.
ހަމަ އެގޮތަށް ފްލައި މީ އުނދުހެން ފެށުމުން ފަސިންޖަރުންނަށް ލުއިވެގެން ދިޔަ އެވެ. މިއަދުވެސް މޯލްޑިވިއަން އިން ދަތުރުކުަރުމަކީ ބޮޑު ވޭނެކެވެ. ރާއްޖޭގެ ދެތިން އެއާޕޯޓަށް ނުޖައްސައި ދެވެނީ މަދު ފަހަރަކު އެވެ.
އައްޑޫން ފުރާއިރު އެހެން ރާއްޖޭން ބޭރުގެ ފްލައިޓަކުން ދަތުރު ކުރަން ބޭނުން ނަމަ ގިނަ ފަހަރު އެފްލައިޓް މިސް ވެ އެވެ. މިހާރު މޯލްޑިވިއަން އަކީ އަތޮޅު ތެރޭ ދުއްވާ ފެރީއަކާ އެއް ފަދަ އެވެ.
ނަމަވެސް ފްލައިމީ އާއި އެކު މަންޒަރު ބަދަލުވެއްޖެ އެވެ. އަގު ހެޔޮކޮށް ދަތުރު ކުރެވެން ފަށައިފި އެވެ. އައްޑޫން ފުވައްމުލަކަށް ހަފުތާއަކު އެއް ދުވަހު ދެޥޭ އިރު ކޮންމެ ދުވަހަކު ފުވައްމުލަކުން އައްޑު އަށް ދެވޭނެ ގޮތް ވަނީ ފްލައި މީން ފަހިކޮށްފަ އެވެ. އަދިވެސް މިއިން ފަސޭހައެއް މޯލްޑިވިއަންއަކުން ނުލިބެ އެވެ.
ދެން އޮތީ ބަނގުރޫޓް ވުމެވެ. މޯލްޑިވިއަން އަށް ފައިދާ ހޯދައި ދޭން ހަދައިގެން އަހަރެމެން ބަނގުރޫޓް ވެއްޖެ އެވެ. ބުރިކަށި ބިނދި އެތައް ބަޔަކު ދުނިޔެ ދޫކޮށްފި އެވެ. ފްލައިމީ ފެށުމުން ރައްޔިތުންނަށް ހަމަ ނޭވާ ލެވެން ފަށައިފި އެވެ. މޯލްޑިވިއަންގެ ވާހަކަތަކަށް އައްޑޫން ބުނަން އޮތީ ސޮރީ އެވެ.
އަހަރެމެން ބަނގުރޫޓް ނުކޮށް އެހެން ގޮތެއް އޮތްތޯ ބަލާށެވެ. މޯލްޑިވިއަންގެ ވާހަކަތަކާ ގުޅިގެން އައްޑޫގެ ގިނަ ބައެއްގެ މެދުގައި މިހާރު މި ވަނީ ތަފާތު ގޮތްގޮތަށް ވާހަކަ ދެކެވެން ފަށާފަ އެވެ. އައްޑޫ ބައެއް މީހުން އެ އެއާލައިން "ބޮއިކޮޓްކޮށްފާނެ" ކަމުގެ ވާހަތަކެއް ވެސް މިހާރު ދެކެވޭ އަޑު އެބަ އިވެ އެވެ.
އެހެންވެ "ގައުމީ އެއާލައިންގެ" ނަން ބޯޑް އަޅުވައިގެން އޮތް މޯލްޑިވިއަން މިކަމާ ސީރިއަސްކޮށް ވިސްނަން ޖެހެ އެވެ. ރައްޔިތުންނަށް ލިބެން ލިބެން އޮތް ލުއި ފަސޭހަކަށް ހުރަސް އެޅުމުގެ ހިޔާލު ދޫކޮށްލާށެވެ. ތިޔަ ކުންފުނީގެ ހިދުމަތަށް ބަރޯސާވެގެން ތިބި ރައްޔިތުން މިހާރު ވެސް "ބަނގުރޫޓްވެފައި" ތިބި މިންވަރު ކުޑައެއް ނޫނެވެ.
އެހެންވެ މި މައްސަލާގައި ދެވަނަ ވިސްނުމަކަށް ދާން މޯލްޑިވިއަނުން ތައްޔާރުތޯ އެވެ؟